ދ.ކުޑަހުވަދޫގައި ހުންނަ ދާލު އެއާޕޯޓުގެ މުވައްޒަފުން މަސައްކަތް ހުއްޓާލާ، އިހުތިޖާޖުކުރަމުން އެބަދެއެވެ.
އެ އެއާޕޯޓުގެ މުވައްޒަފަކު "ސަން"އަށް ބުނީ މިއަދު އެއާޕޯޓު އޮޕަރޭޝަންގެ މުވައްޒަފުން ވަޒީފާއަށް ނިކުތް ކަމުގައި ވިޔަސް އެއްވެސް މަސައްކަތެއް ނުކުރާކަމަށެވެ.
މިވަގުތު މުވައްޒަފުން ތިބީ އެއާޕޯޓުގެ އޮފީހެއްގެ ތެރޭގައި މަޑުކޮށްލައިގެން ކަމަށާއި އެއްވެސް ހަމަ ނުޖެހުމެއް ހިނގަމުން ނުދާކަމަށް ވެސް އޭނާ ބުންޏެވެ.
ދާލު އެއާޕޯޓްގެ މުވައްޒަފުން މަސައްކަތް ހުއްޓާލައިގެން، ގިނަ ކަންތައްތަކަކަށް ޑިމާންޑް ކުރޭ-- ސަން ފޮޓޯ
އިހުތިޖާޖު ކުރާ ސަބަބާ ގުޅޭގޮތުން އޭނާ ބުނީ އެ އެއާޕޯޓަކީ ރާއްޖޭގައި އެންމެ ކުޑަ މުސާރައެއް ދޭ އެއާޕޯޓުކަމަށާއި، މިނިމަމް ވޭޖާއި އެކު ވެސް މުސާރައަށް ބަދަލެއް އައިސްފައި ނުވާ ކަމަށެވެ.
އަދި، މުސާރައިގެ އޮނިގަނޑެއް ވެސް އެކުލަވާލައިފާ ނުވާ ކަމަށާއި، މުވައްޒަފުން ލައްވާ ބުރަކޮށް މަސައްކަތްކުރުވާ ކަމަށް ވެސް އެ އެއާޕޯޓުގެ މުވައްޒަފުން ބުނެއެވެ.
އިހުތިޖާޖުކުރަމުން ދާ މުވައްޒަފުންގެ ޑިމާންޑުތައް ހިމަނައިގެން ޕެޓިޝަނެއްގައި ވެސް ދަނީ ސޮއި ކުރަމުންނެވެ. އެ ޕެޓިޝަންގައި ފާހަގަކޮށްފައިވާ ކަންކަމަކީ:
- މަގާމުގެ ޒިންމާއާއި އެކަށޭނަ މުސާރައެއް ނުލިބުން
- ވަޒީފާގެ ކޮންޓްރެކްޓު އާ ނުކުރުން
- މުސާރައިގެ ރަނގަޅު އޮނިގަނޑެއް ނެތުން
- މިނިމަމް ވޭޖު ކަނޑައެޅިފައި ނެތުން
- އެކަށީގެންވާ އަދަދަކަށް މުވައްޒަފުންނާއި، ސާމާނު ނެތުން
- މަގާމަށް އަންނަން ޖެހޭ ކުރިއެރުން ނަައުން
- ޔުނީފޯމް ނުލިބުން
- ލިބެންޖެހޭ އެލަވަންސްތައް ނުލިބުން
- މުސާރަ ސްލިޕުގައި މުސާރައިގެ އިތުރުން ލިބޭ އެލަވަންސްތައް ހިމެނިފައި ނުހުރުން
- މުސާރަ ސްލިޕު ލިބުން ލަސްވުން
- ޑިޕާޓްމަންޓުތަކުގެ މެދުގައި ތަފާތުކުރުން ގެންގުޅުން
މީގެ އިތުރުން އެ ޕެޓިޝަންގައި ވަނީ ބުރަކޮށް މަސައްކަތް ކުރަން ޖެހޭއިރު ގެއަށް ކާން ދާނެ ވަގުތެއް ވެސް ނުލިބޭ ކަމަށެވެ. އެހެންވިޔަސް، ފޫޑް އެލަވަންސްގެ ގޮތުގައި ވެސް އެއްވެސް ފައިސާއެއް ނުލިބޭ ކަމަށް އެ ޕެޓިޝަނުގައި ވެއެވެ.
މި ޑިމާންޑުތަކަކީ މީގެ ހަތަރު އަހަރު ކުރީން ސުރެ، ކުރަމުން އައި ޑިމާންޑުތަކެއް ކަމަށާއި އެހެން ނަމަވެސް މި ކަންކަމަށް އެއްވެސް ހައްލެއް ލިބިފައި ނުވާކަމަށް އެތަނުގެ މުވައްޒަފުން ބުނެއެވެ.
ދާލު ހޯލްޑިންގްސްއިން ހިންގާ އެއާޕޯޓްގެ މުވައްޒަފުން މަސައްކަތް ހުއްޓާލުމާ ގުޅިގެން އެއާޕޯޓްގެ ބަހެއް އަދި ވަނީ ލިބޭގޮތްނުވެފައެވެ.
މިއީ ދ. އަތޮޅުގައި އޮންނަ ހަމައެކަނި އެއާޕޯޓެވެ. އެ އެއާޕޯޓަށް އާއްމުކޮށް ދަތުރުކުރަނީ މަންތާއެއާއެވެ.