އެމެރިކާގައި 17 އަހަރުގެ ކުއްޖަކަށް ޓީޗަރަކު އަމިއްލައަށް ވެކްސިން ދިން މައްސަލައެއްގައި އޭނާ ހައްޔަރުކޮށްފިއެވެ.
އެ ޓީޗަރު ހައްޔަރުކޮށްފައިވަނީ އެއްވެސް މެޑިކަލް ކޮލިފިކޭޝަނެއް ނެތި ކޮވިޑް ވެކްސިން ދިނުމުގެ ކުށުގައެވެ.
އެމެރިކާގެ ނިއު ޔޯކް ސްޓޭޓުގެ ސްކޫލެއްގައި ބަޔޮލޮޖީ މާއްދާ ކިޔަވައިދޭ ލޯރާ ރޫސޯ ނަމަކަށް ކިޔާ ޓީޗަރަކު 17 އަހަރުގެ އެ ކުއްޖާއަށް ވެކްސިން ދީފައިވަނީ އެ ކުއްޖާގެ ބެލެނިވެރިންގެ ހުއްދަ ނުހޯދައެވެ. ނަމަވެސް ރިޕޯޓުތައް ބުނާގޮތުން އެ ކުއްޖާ ވަނީ ވެކްސިން ދިނުމަށް އެދިފައެވެ.
އެމެރިކާގެ ފުލުހުން ދަނީ އެ ޓީޗަރަށް ކޮވިޑް ވެކްސިން ލިބުނު ގޮތް ތަހުގީގު ކުރަމުންނެވެ.
އުމުރުން 18 އަހަރުން ދަށުގެ ކުދިންނަށް އެމެރިކާގައި ދެނީ ހަމައެކަނި ފައިޒާ ވެކްސިނެވެ.
އެ ޓީޗަރުގެ މައްޗަށް ކުރެވޭ ދައުވާގެ އަޑުއެހުން މިމަހުގެ 21 ވަނަ ދުވަހުގައި އޮންނާނެއެވެ. މި މައްސަލަ އެ ޓީޗަރުގެ މައްޗަށް ސާބިތުވެއްޖެނަމަ، ހަތަރު އަހަރުގެ ޖަލު ހުކުމެއް ކުރެވިދާނެއެވެ.