މޯލްޑިވްސް ނޭޝަނަލް ޔުނިވާސިޓީގެ ސްޓޫޑަންޓް ޔޫނިއަން (އެމްއެންޔޫއެސްޔޫ)އާއި ގިޔާސުއްދީން އިންޓަނޭޝަނަލް ސްކޫލު ގުޅިގެން ރަސްފަންނު ސަރަހައްދު ސާފުކުރުމުގެ ހަރަކާތެއް ކުރިއަށް ގެންގޮސްފިއެވެ.
މިިދިޔަ ހޮނިހިރު ދުވަހު ކުރިއަށް ގެންދިޔަ މި ހަރަކާތުގައި ސާފުކޮށްފައި ވަނީ ރަސްފަންނުން ފެށިގެން މާލޭ އިންޑަސްޓްރިއަލް ސަރަހައްދާ ހަމައަށެވެ.
އެމްއެންޔޫއިން މައުލޫމާތު ދިން ގޮތުގައި މި ހަރަކާތަކީ، ޔޫރަޕިއަން ޔުނިއަންގެ އެހީގައި ހިންގާ ސަރަހައްދީ މަޝްރޫއެއް ކަމަށްވާ "ޕްރިވެންޝަން އޮފް މެރިން ލިޓާ އިން ދަ ލަކްޝަދީބް ސީ" (ޕްރޮމިސް)ގެ ދަށުން ކުރިއަށް ގެންދިޔަ ހަރަކާތެކެވެ.
މި ހަރަކާތުގައި ޕްލާސްޓިކާއި އެހެނިހެން ކުނީގެ ގޮތުގައި ހިމެނޭ 130 ކިލޯގެ ކުނި ވަނީ ނަގާފައެވެ.
އެމްއެންޔޫއިން ބުނީ މި ކުނިތަކުގެ ތެރޭގައި ހިމެނޭ ޕްލާސްޓިކް ކުނި ރިސައިކަލް ކުރުމަށް ޕާލޭ މޯލްޑިވްސްއާ ހަވާލު ކޮށްފައިވާ ކަމަށާއި އެހެނިހެން ކުނި ނައްތާލަން ފޮނުވީ ވެމްކޯއަށް ކަމަށެވެ.
'ޕްރޮމިސް' ގެ ދަށުން ދެ އަހަރުގެ މުއްދަތަށް ސާފު ކުރުމުގެ ހަރަކާތް ރޭވިފައި ވާއިރު، މިއީ އޭގެތެރެއިން ހަރަކާތެއް ކަމަށް އެމްއެންޔޫއިން ބުންޏެވެ.
ކުރިއަށް އޮތް ސާފު ކުރުމުގެ ހަރަކާތް ބޭއްވުމަށް ހަމަޖެހިފައި ވަނީ އަންނަ ޖެނުއަރީ މަހުގެ މެދުތެރޭގައި، ކ. ތުލުސްދޫގައެވެ.