މިއީ ގައުމީ މަސްލަހަތު އިސްކޮށް، އެންމެން އެއްބައިވާންވީ ވަގުތު ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެއެވެ.
ދިވެހީންގެ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އެއްބައިވަންތަކަމުގެ ދުވަހެއް މި ފާހަގަކުރަނީ، ރާއްޖެއަށް ކުރިމަތިވި ވަރަށް ބިރުވެރި، ވަރަށް ނުރައްކާތެރި ކާރިސާއަކުން ސަލާމަތްވުމުގައި، އަޅުގަނޑުމެން ދެއްކި އެއްބައިވަންތަކަން ހަނދާންކުރުމުގެ ގޮތުން ކަމަށެވެ.
"އެއީ 2004 ވަނަ އަހަރުގެ ޑިސެންބަރު މަހުގެ 26ވީ އާދީއްތަ ދުވަސް. ސުނާމީގެ ބިޔަ ރާޅުގައި މުޅި ރާއްޖެ ދޮވެލި ދުވަސް. މިއަދަކީވެސް ޑިސެންބަރު މަހުގެ 26 ވީ އާދީއްތަ ދުވަހެއް. އެ ހިތާމަވެރި ހާދިސާގައި އަޅުގަނޑުމެންގެ ތެރެއިން 82 މީހުން މަރުވެ، 26 މީހަކު ވަނީ ވީނުވީއެއް ނޭނގި ގެއްލިފައި." ރައީސް ވިދާޅުވިއެވެ.
ރައީސް ވިދާޅުވީ ސުނާމީ އަރައިގެން އައި ވަގުތު ވެސް، މީހުންގެ ފުރާނައާއި މުދާ ސަލާމަތްކުރުމުގައި ދިވެހިން އިސްކުރީ އެއްބައިވަންތަކަން ކަމަށާއި އެކަކު އަނެކަކަށް އެހީތެރިވެދިނީ، އެއް ޢާއިލާއެއްގެ މީހުން ފަދައިން ކަމަށެވެ.
"ސުނާމީގައި ލިބުނު ގެއްލުންތަކުގެ ސަބަބުން، ފަނަރަހާހަށްވުރެ ގިނަ މީހުންގެ ގެދޮރު ހަލާކުވެގެންދިޔަ. އަހަރުތަކެއް ވަންދެން އެމީހުން ދިރިއުޅެން ޖެހުނީ އެކި ރަށްރަށުގައި ހެދި ވަގުތީ ހިޔާތަކުގައި. އެއީ ވަރަށްދަތި ދިރިއުޅުމެއްކަން އަޅުގަނޑުމެން އެންމެންނަށްވެސް އެނގޭ. އެ ދަތިކަމުގެ ތެރޭގައިވެސް އަޅުގަނޑުމެންގެ މެދުގައި އޮތީ ވަރަށް ބޮޑު އެއްބައިވަންތަކަމެއް." ރައީސް ވިދާޅުވިއެވެ.
ސުނާމީގެ ލިބުނު ގެއްލުންތަކުން އަރައިތުމުގައި އެންމެ މުހިންމު ދައުރެއް އަދާކުރީ، ދިވެހިންގެ ތެރޭގައި އޮތް އެކުވެރިކަމާއި އޯގާތެރިކަން ކަން ފާހަގަކުރައްވައި ރައީސް އިތުރަށް ވިދާޅުވީ އަޅުގަނޑުމެން މިހާރު ތަހައްމަލު ކުރަމުން މިދަނީ، ގުދުރަތީ ބޮޑު ކާރިސާއެއް ނޫން ނަމަވެސް ވަރަށް ދަތި އުނދަގޫ ދުވަސްތަކެއް ކަމަށެވެ.
"ކޮވިޑް-19ގެ ބަލިމަޑުކަމުގެ ތެރޭގައި އުޅޭތާ މިވަނީ ދެ އަހަރު. ރާއްޖޭގައި ކޯވިޑް ފެތުރެން ފެށުމާއެކު، އަޅުގަނޑުމެން އުޅެންޖެހުނީ ވަރަށް ދަތި ޙާލެއްގައި. ރާއްޖެ ފުރަބަންދުކުރުމާ ގުޅިގެން، ރާއްޖޭގެ މުޅި އާބާދީއަށް، އެކަމުގެ ގެއްލުންތައް ލިބުނު." ރައީސް ވިދާޅުވިއެވެ.
ރައީސް އިތުރަށް ވިދާޅުވީ ކޮވިޑް ތެރޭގައި ވެސް ލިބުނު އެންމެ ބޮޑު ތަސައްލީއަކީ ދިވެހިންގެ ތެރޭގައި އޮތް އެއްބައިވަންތަކަން ކަމަށެވެ.
"ގޭގެޔަށް ބޭނުންވާ ކާބޯތަކެއްޗާއި ބޯފެނާއި، އެނޫން ތަކެތި ފޯރުކޮށްދިނުމުގައި، ހިލޭ ސާބަހަށް އެތައް ހާސް ބަޔަކު މަސައްކަތް ކުރި. އަމިއްލަ ޢާއިލާއާ ދުރުގައި، ރެޔާއި ދުވާލު، އަތްވާއި ވާރޭގައި އެތައް ދުވަހެއް ވަންދެން، ހިލޭ ސާބަހަށް މަސައްކަތްކުރި އެތައް ބަޔަކު އަޅުގަނޑުމެންގެ ތެރޭގައި އެބަތިބި." ރައީސް ވިދާޅުވިއެވެ.
އިގްތިސޯދީ ގޮތުން މިހާރު ރާއްޖެ އޮތީ އުންމީދީ ހިސާބެއްގައި ކަން ފާހަގަކުރައްވައި ރައީސް ވިދާޅުވީ ކޮވިޑުގެ ކުރިން އޮތް ޙާލަތަށް ނުވަތަ އެއަށްވުރެ ރަނގަޅު ޙާލަތަކަށް، ގައުމުގެ އިގްތިސޯ ގެންދިޔުމަށްޓަކައި، އަޅުގަނޑުމެން އެންމެން އެކުގައި މަސައްކަތް ކުރަންޖެހޭ ކަމަށެވެ.
"މިއީ ގައުމީ މަޞްލަޙަތު އިސްކޮށް، އެންމެން އެއް ޢަޒުމެއްގައި، އެއް ވާނެއްގައި މަސައްކަތް ކުރަންވީ ވަގުތު" ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ދިވެހިންގެ މެދުގައި އެއްބައިވަންތަކަން ދެމެހެއްޓުމަކީ، ސަރުކާރުގެ ވަރަށް އިސް ސިޔާސަތެއް ކަމަށާއި ސިޔާސަތު ދެމެހެއްޓޭނީ ރައްޔިތުންގެ އަޑުއަހައިގެން ކަމަށެވެ.