ޅ. ފެލިވަރުގެ ބިން ހިއްކުމާއި، ބަނދަރު ތަރައްގީ ކުރުމުގެ ގޮތުން 113.3 މިލިއަން ރުފިޔާގެ ބިޔަ މަޝްރޫއެއް ފަށައިފިއެވެ.
ފެލިވަރުގައި މަސްވެރިކަމަށް ބޭނުންވާ އިތުރު ފެސިލިޓީތައް ގާއިމުކުރުމަށް ޓަކައި ބިން ހިއްކުމާއި، ބަނދަރު ތަރައްގީ ކުރުމުގެ މަސައްކަތް ފަށާފައިވަނީ މި ހިނގާ ޑިސެމްބަރުމަހުގެ ހަތް ވަނަ ދުވަހުއެވެ.
އެއް އަހަރުދުވަހުގެ ތެރޭގައި ނިންމާން އެއްބަސްވެފައިވާ މި މަޝްރޫއު ހަވާލު ކޮށްފައިވަނީ މޯލްޑިސްވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީ)އާއެވެ.
އެމްޓީސީސީ އިން ބުނީ މި މަޝްރޫއުގެ ދަށުން، ހައެއް ހެކްޓަރުގެ ބިން ހިއްކުމާއި، 229,663.36 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރާނެ ކަމަށެވެ.
މީގެ އިތުރުން 220 މީޓަރުގެ ސަރަހައްދެއްގައި އެއްގަމުތޮށި ލުމާއި، 148 މީޓަރުގެ ސަރަހައްދެއްގައި ބޭރުތޮށި ލުމާއި، 270 މީޓަރުގެ ސަރަޙައްދެއްގައި ރިވެޓްމެންޓް ޖެހުމުގެ މަސައްކަތް ހިމެނޭ ކަމަށް އެ ކުންފުނިން ބުންޏެވެ.
ފެލިވަރުގެ ބިން ހިއްކުމާއި، ބަނދަރު ތަރައްގީ ކުރުމުގެ މި މަޝްރޫއުއަކީ އިންޑިއާ ސަރުކާރުގެ އެހީގައި ކުރިއަށްގެންދާ މަޝްރޫއުއެކެވެ.
ފެލިވަރުގެ ބިން ހިއްކުމާއި ބަނދަރު ތަރައްގީ ކުރުމުގެ މަޝްރޫއު -- ފޮޓޯ/ އެމްޓީސީސީ
ޕްލޭނިން މިނިސްޓްރީން ބުނީ މިމަޝްރޫއުގެ ބޭނުމަކީ ލަފާފުރާ ބަނދަރަކާއިއެކު ކޯލްޑް ސްޓޯރޭޖް ވަސީލަތްތައް ފެލިވަރުގައި ފުޅާކުރުމަށް ބޭނުންވާ ބިން ހިއްކުން ކަމަށެވެ.
މިނިސްޓްރީން ބުނީ މި މަޝްރޫއުއަށް ހަރަދު ކުރާން ހަމަޖައްސާފައިވަނީ ހަތަރު އަހަރު ދުވަހުގެ މުއްދަތަކަށް ބަހާލައިގެން ޑިފާޑް ޕޭމަންޓް އުސޫލުން ކަމަށެވެ.