ގަލޮޅު ސުކޫލުގައި ހަތަރު އަހަރުގެ ކުއްޖަކަށް ޖިންސީ ގޯނާ ކުރި މައްސަލައިގައި އަންހެނަކު ހައްޔަރު ކޮށްފިއެވެ.
ފުލުހުންގެ މީޑިއާ އޮފިޝަލް "ސަން"އަށް ވިދާޅުވީ މި މައްސަލައިގައި ކޯޓު އަމުރެއްގެ ދަށުން 63 އަހަރުގެ ދިވެހި އަންހެނަކު ހައްޔަރު ކޮށްފައިވާ ކަމަށެވެ.
މި މައްސަލައިގައި މިދިޔަ ހޮނިހިރު ދުވަހު ސްކޫލު ތެރޭގައި ކެމެރާ ހަރުކޮށް، ހުރިހާ މަސައްކަތު އަންހެނުން ވަނީ ސަސްޕެންޑު ކޮށްފައެވެ.
އެ ސުކޫލުން އެ ދުވަހު ނެރުނު ދެންނެވުމެއްގައި ބުނެފައިވަނީ އެ ސްކޫލުގެ ހުރިހާ މަސައްކަތު އަންހެނުން ވަޒީފާއިން ސަސްޕެންޑުކޮށްފައިވާ ކަމަށާއި ކުދިން ފާހާނާއަށް ދާނީ ޓީޗަރުންގެ ބެލުމުގެ ދަށުން ކަމަށެވެ.
އޭރު، މި މައްސަލައިގައި ގަލޮޅު ސްކޫލުގެ ހުރިހާ މަސައްކަތު އަންހެނުން ސަސްޕެންޑު ކުރީ، އަންހެން ކުއްޖާއަށް ޖިންސީ ގޯނާކުރީ ސީދާ އެތަނުން ކާކު ކަން ނޭނގޭތީއެވެ.
މި މައްސަލައާ ގުޅިގެން އެޑިއުކޭޝަން މިނިސްޓްރީން ބުނީ ދަރިވަރަކަށް ޖިންސީގޯނާ ކުރި މައްސަލައެއް ސުކޫލަށް ހުށަހެޅި ކަމުގެ މައުލޫމާތު ލިބުމާއެކު އެކަން ސީރިއަސް ކަމެއްގެ ގޮތުގައި ބަލަމުން އަންނަ ކަމަށެވެ.
މިކަމާ ގުޅިގެން ގިނަ ބައެއްގެ ބަޔާން ވަނީ ނަގާފައެވެ. އޭގެ ތެރޭގައި އެ ސުކޫލުގެ އިސްވެރިން ވެސް ހިމެނެއެވެ.