ރ. އިންނަމާދޫ ފެނުގެ ނިޒާމު ގާއިމްކުރުމުގެ އަމަލީ މަސައްކަތް މިއަދު ފަށައިފިއެވެ.
މިއަދު އެރަށުގައި ބޭއްވި ރަސްމިއްޔާތެއްގައި އެ މަސައްކަތް ފައްޓަވައިދެއްވީ އެމްޑަބްލިޔުއެސްސީގެ މެނޭޖިން ޑިރެކްޓަރު ހަސަން ޝާހު އާއި ޗެއާމަން އަހްމަދު މައުސޫމާއި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު ހަސަން އަހްމަދާއި ރ. އަތޮޅު ކައުންސިލްގެ ރައީސް ހުސައިން ނާސިފްގެ އިތުރުން އިންނަމާދޫ ކައުންސިލްގެ ރައީސް އަހްމަދު އަޒުމީނެވެ.
އެމްޑަބްލިއުއެސްސީން ބުނީ އެ މަޝްރޫއަށް ބޭނުންވާ ހޮޅިއާއި އެހެނިހެން ތަކެތި މިހާރު އެެރަށަށް ގެންގޮސްފައި ވާކަމަށެވެ.
"މިހާރު ކުރަނީ ހޮޅި ވަޅުލުމުގެ މަސައްކަތް. ފެން ޕްލާންޓު ބެހެއްޓުމަށް އިމާރާތްކުރާ ފެސިލިޓީ ބިލްޑިންގެ 70 ޕަސަންޓު މަސައްކަތް ވަނީ ނިމިފައި،" އެމްޑަބްލިއުއެސްސީން ބުންޏެވެ.
ރ އިންނަމާދޫގެ ފެނުގެ ނިޒާމުގެ އަމަލީ މަސައްކަތް ފެށުން --- ފޮޓޯ / އެމްޑަބްލިޔުއެސްއީ
އެ މަޝްރޫއުގެ ދަށުން އިންނަމާދޫގައި 8.33 ކިލޯ މީޓަރުގެ ދިގު ފެން ހޮޅީގެ މައި ނެޓްވޯކް ގާއިމުކުރާނެއެވެ. އަދި އާރްއޯ ފެސިލިޓީ ބިލްޑިން އިމާރާތް ކުރުމާއި، ފެން އުފެއްދުމަށްޓަކައި ދެ އާރްއޯ ޕްލާންޓް ބަހައްޓާނެއެވެ. ހަމައެހެންމެ ފެން ރައްކާކުރުމަށްޓަކައި ތިން ތާންގި ބަހައްޓާނެ ކަމަށް އެ ކުންފުނިން ބުންޏެވެ.
"ގޭގޭގައި ފެންމީޓަރު ބަހައްޓައި، ފެނުގެ ކަނެކްޝަން ގުޅައިދީ، އެ ގެތަކަށް ރައްކާތެރި ބޯފެން ވެސް މި މަޝްރޫއުގެ ދަށުން ފޯރުކޮށްދޭނެ،" އެމްޑަބްލިއުއެސްސީން ބުންޏެވެ.
ފެނުގެ ނިޒާމު ހިންގައި ބެލެހެއްޓުމަށް ބޭނުންވާ ޖަނަރޭޓަރު ސެޓާއި ފެން ތަހުލީލު ކުރުމަށް ބޭނުންވާ ސަމާނުވެސް އެ މަޝްރޫއުގެ ދަށުން އެ ރަށަށް ފޯރުކޮށްދިނުމަށް ހަމަޖެހިފައި ވާކަމަށް އެކުންފުނިން ބުންޏެވެ.
ޕްލޭނިން މިނިސްޓްރީން އެބްޑަބްލިޔުއެސްސީއާ ހަވާލުކޮށްގެން ކުރިއަށް ގެންދާ އެ މަޝްރޫއަކީ 50.7 މިލިއަން ރުފިޔާގެ މަޝްރޫއެކެވެ.
އެ މަޝްރޫއުގެ މަސައްކަތް ނިމުމުން، އިންނަމާދޫ ރައްޔިތުންނަށް ސާފު ބޯފެނުގެ ނިޒާމެއް ލިބޭނެއެވެ.
މިއަދުގެ ރަސްމިއްޔާތުގައި ވާހަކަދައްކަވަމުން އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ވިދާޅުވީ އަންނަ މާޗު މަހަށް މި މަސައްކަތް ނިންމުމަން މަސައްކަތް ކުރަމުން އަންނަ ކަމަށެވެ.
"އަޅުގަނޑުމެން ފޫގަޅާލައިގެން ތިބޭނީ އިރާދަކުރެއްވިއްޔާ މާޗު މަހުގެ ނިޔަލަށް ނުވަތަ އެއަށްވުރެ ކުރިން މި ޕްރޮޖެކްޓް ނިންމާލުމަށްޓަކައި،" ޝާހު ވިދާޅުވިއެވެ.