ގަތަރުގެ ދޯހާގައި މިހާރު ކުރިއަށްދާ އޭޝިއަން ޓޭބަލް ޓެނިސް ޗެމްޕިއަންޝިޕްގައި ރާއްޖޭގެ ހުނަރުވެރި ދެ ކުޅުންތެރިންކަމަށްވާ ފާތިމަތު ދީމާ އަލީ އާއި އައިޝަތު ރަފާ ނާޒިމްގެ ޕެއާ އިން ސަރަހައްދުގެ ގަދަބާރު ސްރީ ލަންކާގެ އެއް ވަނަ ޕެއާ ބަލިކޮށްފިއެވެ.
އޭޝިއާގެ ގައުމުތަކުގެ މެދުގައި ކުޅޭ އެ މުބާރާތުގެ ކުޅުން ފަށާފައިވަނީ މިދިޔަ އަންގާރަ ދުވަހުއެވެ. އެ މުބާރާތް ކުރިއަށްދާނީ އަންނަ އަންގާރަ ދުވަހުގެ ނިޔަލަށެވެ.
އޭޝިއާގެ ބޮޑު ވާދަވެރިކަމެއް އޮންނަ މި މުބާރާތުގައި އިއްޔެ ލަންކާގެ ޓީޓީ ރޭންކިންގެ އެއްވަނަ އިޝާރާ މަދުރަންގީ އާއި ރޭންކިންގެ ހަތަރު ވަނަ ބިމާންދީ ބަންޑާރަ ހިމެނޭ ޕެއާގެ މައްޗަށް ދީމާ އާއި ރަފާގެ ޕެއާ ކުރި ހޯދީ ސީދާ ތިން ސެޓުންނެވެ.
މިފަހަކަށް އައިސް ބައިނަލް އަގުވާމީ ގިނަ މެޑަލްތަކެއް ހޯދި ރަފާއާއި ދީމާގެ ޕެއާއިން ލަންކާ މެޗުގެ ސެޓުތައް ގެންދިޔައީ 11-08، 11-06 އަދި 12-10 އިންނެވެ.
މި މެޗުން ލިބުނު މޮޅާ އެކު ރަފާއާއި ދީމާގެ ޕެއާ ވަނީ މުބާރާތުގެ ދެ ވަނަ ބުރަށް ދަތުރުކޮށްފައެވެ. އެކަމަކު އެ ބުރުގައި ރާއްޖެ ކުޅެން ޖެހުނީ ހޮންކޮންގްގެ އުމުރުން ދޮށީ ދެ ކުޅުންތެރިން ކަމަށްވާ، ޒީހޫ ޗެންޗޫ އަދި އެން ވިންގް ނާމްގެ ޕެއާއާ ދެކޮޅަށެވެ. ހޮންކޮންގެ ޕެއާ މެޗު ކާމިޔާބު ކުރީ ސީދާ ތިން ސެޓުންނެވެ. އެ ޕެއާ މެޗު ކާމިޔާބު ކުރީ 11-4، 11-4 އަދި 11-5 އިންނެވެ.
އެ މުބާރާތަކީ ކޮވިޑްގެ ބަލިމަޑުކަމަށްފަހު ރާއްޖޭގެ ގައުމީ ޓީޓީ ޓީމުން ބައިވެރިވާ ފުރަތަމަ ބައިނަލްއަގުވާމީ މުބާރާތެވެ. ރާއްޖޭގެ ގައުމީ އަންހެން ޓީމުން ވަނީ ފަހުގެ ތާރީހުތަކުގައި ގިނަ މެޑަލްތަކެއް ޓީޓީއިން ހޯދައިފައެވެ.
އޭޝިއާ މުބާރާތުގެ ޓީމު އިވެންޓް ބައިގައި ވެސް ރާއްޖޭގެ ނަތީޖާ ރަނގަޅެވެ. އަންހެން ޓީމުން ގަތަރާއި ބަންގްލަދޭޝްގެ މައްޗަށް ކުރިހޯދިއިރު، ފިރިހެން ޓީމު ވަނީ އޮމާންގެ މައްޗަށް ކުރިހޯދައިފަ އެވެ. އެހެން އިވެންޓްތަކުގައި ވާދަކޮށް ގައުމީ ޓީޓީ ޓީމުން މި ފަހަރުގެ މުބާރާތުގައި ވަނީ ބޮޑެތި ކުރިއެރުންތަކެއް ހޯދައިފަ އެވެ.