ލޮނުމެދަކީ ވަރަށް ގިނަ ދިވެހިން ކާނާ ތައްޔާރު ކުރުމުގައި ބޭނުން ކުރާ ވަރަށް އާންމު ތަރުކާރީއެކެވެ. ބައެއް މީހުންނަށް ލޮނުމެދުން ލާ ރަހަ ކަމުނުދިޔަ ނަމަވެސް އެއިން ލިބޭ ފައިދާ އެނގޭނަމަ ލޮނުމެދު ބޭނުން ނުކޮށް ނުހުންނާނެ ކަން ޔަގީނެވެ.
އެގޮތުން ލޮނުމެދުން ލިބޭ ފައިދާތަކުގެ ތެރޭގައި ދަތްތައް ވަރުގަދަކޮށް ބެހެއްޓުން ފާހަގަ ކޮށްލެވެއެވެ. ލޮނުމެދު ކެއުމުން އަނގަ ތެރޭގައި ހުންނަ ނުބައި ޖަރާސީމުތައް ނައްތާލައި، އަނގައިގެ ހިރުގަނޑު ރީތިކޮށް ހުރުމަށް އެހީތެރިވެދެއެވެ.
މީގެއިތުރުން، އަބަދުވެސް މީހާ ތާޒާކޮށް ހުރުމަށް ވެސް ލޮނުމެދު އެހީތެރި ވެދެއެވެ. ސަބަބަކީ، ލޮނުމެދުގެ ސަބަބުން މަސައްކަތްކުރާ މީހާގެ ލޮޑުކަން ފިލުވައި، ވަރުބަލިކަމުން ދުރުކޮށްދޭތީއެވެ.
ހަމައެއާއެކު، ލޮނުމެދު ކެއުމުގެ ސަބަބުން ގިނަ ދުވަހު ޒުވާންކޮށް ހުރުމަށް އެހީތެރި ވެދެއެވެ. "އޮކްސިޑޭޓިވް ސްޓްރެސް" އަކީ ހަށިގަނޑުގެ ހަންގަޑު ކުރަކިވެ އަދި ސިކުނޑި މަސަތްކަތް ކުރުމަށް ބުރުއަރާ ވަރަށް ނުރައްކާތެރި ބައްޔެކެވެ. ނަމަވެސް ލޮނުމެދު ކެއުމުން އެކަމުން ސަލާމަތް ވެވޭނެ ކަން ސައިންސް ވެރިން ވަނީ ދިރާސާތަކުން ހޯދައިފައެވެ.
ދުޅަހެޔޮ ސިއްހަތެއްގައި ހުރުމަށް އިންފެކްޝަންގެ ކިބައިން ސަލާމަތްވެހުރުމަކީ މުހިންމު ކަމެކެވެ. އިންފެކްޝަންގެ ސަބަބުން ގިނަ ފަހަރު ވަރަށް ބޮޑެތި ބަލި ޖެހުމުގެ ބިރުވެރިކަން އޮވެއެވެ. އެހެންނަމަވެސް މިކަމަށް ވެސް ލޮނުމެދު އެހީތެރިވެދެއެވެ.
ލޮނުމެދަކީ ލޭ މައްޗަށް ދިއުން ހިފަހައްޓައި، ކޮލެސްޓްރޯލް އެއްވަރެއްގައި ހިފެހެއްޓުމަށް ވެސް ވަރަށް ބޮޑު އެހީތެރިކަމެއް ވެދޭ ތަރުކާރީއެކެވެ.