އދ. ހަންޏާމީދޫއިން ނެގި ރެންޑަމް ސާމްޕަލްއެއް ކޮވިޑް-19އަށް ޕޮޒިޓިވްވެއްޖެއެވެ.
ހަންޏާމީދޫގެ ކޮމިއުނިޓީ ހެލްތް އޮފިސަރު އަހްމަދު ތޮލްހަތު "ސަން" އަށް ވިދާޅުވީ މިމަހުގެ އަށްވަނަ ދުވަހު ނެގެޓިވް ރިޒަލްޓްއަކާއެކު މާލެއިން ދަތުރުކުރި މީހެއްގެ ކިބައިން އަލާމާތް ފެނިގެން ނެގި ސާމްޕަލްއެއް ޕޮޒިޓިވް ވެފައިވާކަމަށެވެ.
"މާލެއިން މިމަހުގެ އަށްވަނަ ދުވަހު ނެގެޓިވް ޕީސީއާރު ޓެސްޓްއަކާއެކު ދަތުރުކޮށްފައި އިނީ. ދެން ކުޑަކޮށް ސިމްޓޮމްސް ފެނިގެން އަތޮޅު ހޮސްޕިޓަލްއިން ސާމްޕަލް ނެގީ 12 ވަނަ ދުވަހު. ރޭގަ ނަތީޖާ ލިބުނީ،" ތޮލްހަތް ވިދާޅުވިއެވެ.
ތޮލްހަތް ވިދާޅުވީ އެ ކޭސްއާއެކު މިހާރު ރަށުގައި ހުރި އެކްޓިވް ކޭސްގެ އަދަދަކީ ހަތަރެއްކަމަށާއި އަދި ފަހުން މި ފެނުނު ކޭސްއަކީ ރެންޑަމްކޮށް ނަގައިގެން ރަށުން ޕޮޒިޓިވްވި ފުރަތަމަ ކޭސްކަމަށެވެ.
"ޓޯޓަލް ކަރަންޓީން ޕޮޒިޓިވް އާއެއްކޮށް ހަތަރުވަނަ ޕޮޒިޓިވް އެއީ. ކުރިއަކުން ރެންޑަމް ކޭސް އެއް ނުފެނެ. ކަރަންޓީންގަ ތިބި ބައެއް ޕޮޒިޓިވްވެފަ ތިބީ މީގެ ކުރިން،" ތޮލްހަތް ވިދާޅުވިއެވެ.
އިތުރަށް ވާހަކަ ދައްކަވަމުން ތޮލްހަތް ވިދާޅުވީ ޕޮޒިޓިވް ކޭސް ފެނުނުކަން އެޗްޕީއޭއަށް އަންގާފައިވާ ކަމަށާއި ކޮންޓެކްޓް ޓްރޭސިންގެ މަސައްކަތް މިހާރު ރަށުގައި ކުރިޔަށްދާ ކަމަށެވެ.
"ކޮންޓެކްޓް ޓްރޭސިންގެ މަސައްކަތް މިހާރު ކުރިޔަށް ދަނީ. އެއްކޮށް ނުއެއް ނިމޭ ކޮންޓެކްޓް ޓްރޭސިން ހަދާ. ނިމުނީމަ މޮނިޓަރިންއަށް ލުމާމެދު ގޮތެއް ނިންމާނީ،" ތޮލްހަތު ވިދާޅުވިއެވެ.
ހަންޏާމީދޫގެ ވެކްސިން ޖެހޭ އާބާދީގެ 99 ޕަސަންޓް މީހުން ވަނީ ވެކްސިންގެ ދެ ޑޯޒް ފުރިހަމަ ކޮށްފައެވެ.