ހިއްސާ، ބޮންޑު އަދި ސުކޫކް ފަދަ މާލީ ވަސީލަތްތައް މޯލްޑިވްސް ސްޓޮކް އެކްސްޗޭންޖްގައި ލިސްޓުކޮށްފައިވާ ކުންފުނިތަކުގެ އިންޑިޕެންޑެންޓް ޑިރެކްޓަރުކަން ކުރެވޭނީ ގިނަވެގެން ހަ އަހަރު ދުވަހުގެ މުއްދަތަކަށް ކަމަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ)އިން ކަނޑައަޅައިފި އެވެ.
ސީއެމްޑީއޭއިން އެގޮތަށް ނިންމީ އިންޑިޕެންޑެންޓް ޑިރެކްޓަރުންގެ މިނިވަންކަން ދެމެހެއްޓުމުގެ ގޮތުން ކަމަށެވެ.
އެ ނިންމުން ދިވެހި ހިއްސާގެ ބާޒާރުގައި ލިސްޓުކޮށްފައިވާ ކުންފުނިތަކަށް ސީއެމްޑީއޭއިން މިހާރު ވަނީ އަންގާފަ އެވެ.
ހަމައެއާއެކު ބޯޑުގެ ކޮންޓިނުއިޓީ ދެމެހެއްޓުމަށްޓަކައި ހުރިހާ ޑިރެކްޓަރުން އެއްފަހަރާ ބަދަލުވިޔަ ނުދީ، ބޯޑުން ކަނޑައަޅާ އުސޫލެއްގެ ދަށުން ނޮން އެގްޒެކެޓިވް ޑިރެކްޓަރުންގެ ތިންބައިކުޅަ އެއްބައި، އަހަރު އެއްފަހަރު އިންތިހާބުވާ ގޮތަށް ހަމަޖެއްސުމަށްވެސް ސީއެމްޑީއޭއިން ވަނީ ކުންފުނިތަކަށް އަންގާފަ އެވެ.
ހިއްސާ، ބޮންޑު އަދި ސުކޫކް ފަދަ މާލީ ވަސީލަތްތައް ހިމެނޭ ގޮތަށް މޯލްޑިވްސް ސްޓޮކް އެކްސްޗޭންޖްގައި މިވަގުތު ލިސްޓުކޮށްފައިވަނީ ޖުމުލަ 10 ކުންފުންޏެކެވެ.