މިހާރާއި ކުރިމަގުގެ ޖީލުތަކުގެ ސިއްހީ ދުޅަހެޔޮކަން ކަށަވަރުކުރުމަށް، ސިއްހީ އިބްތިދާއީ ހިދުމަތް (ޕްރައިމަރީ ހެލްތުކެއާ)ގެ އާ މަޝްރޫއެއް ރާއްޖޭގައި ފަށަން ނިންމާފައިވާ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
މިއަދު ފާހަގަކުރާ ދުނިޔޭގެ ސިއްހަތު ދުވަހާ ގުޅިގެން ދެއްވި ހިތާބުގައި މިނިސްޓަރު ނަސީމް ވިދާޅުވީ ރައްޔިތުންނާއި ގާތުން ސިއްހީ ހިދުމަތްދީ، ސިއްހީ ރައްކާތެރިކަން ދުރާލާ ކަށަވަރު ކުރުމުގެ މަސައްކަތް މުޅި ރާއްޖޭގައި ކުރާނެ ކަމަށެވެ.
އެގޮތުން ޕްރައިމަރީ ހެލްތުކެއާގެ ވިސްނުމަކީ، ހެލްތުކެއާ ވޯކަރުން ކުރީ ސަފުގައި ތިބެގެން އަދި އެހެނިހެން ހެލްތު ޕްރޮފެޝަނަލުންގެ ވެސް ދައުރު ފުޅާކޮށް ޓީމެއްގެ ގޮތުގައި، ރަށު ފެންވަރުގައި، ރައްޔިތުންނާއި ގާތުން ހިދުމަތްތައް ފޯރުކޮށްދީ، ބަލިވުމުން ސިއްހީ މަރުކަޒަށް އައުމުން ފަރުވާ ދިނުމަށްވުރެ، ބަލިތަކުން ރައްކާތެރިވުމަށް ދުރާލާ މަސައްކަތް ކޮށް، ރައްޔިތުންގެ ޖިސްމާނީ، ނަފުސާނީ އަދި އިޖްތިމާއީ ދުޅަހެޔޮކަން ކަށަވަރުކުރުން ކަމަށް މިނިސްޓަރު ވިދާޅުވި އެވެ.
މިނިސްޓަރު ނަސީމް ވިދާޅުވީީ ރައްޔިތުންގެ ސިއްހީ ދުޅަހެޔޮކަމާ، ގައުމުގެ ތަރައްގީ އާއި ކުރިއެރުން ގުޅިފައިވާ ކަމަށާއި މި ދުޅަހެޔޮކަން ނެތިއްޖެނަމަ ދިމާވާނެ ހިތްދަތިކަން ކޮވިޑުވެ ވަބާގެ ތެރެއިން ފެނިގެން ދާ ކަމަށެވެ.
މިނިސްޓަރު ވިދާޅުުވީ ރައްޔިތުންގެ ދުޅަހެޔޮކަން ކަށަވަރު ކުރުުމަށް ވެކްސިން ޕްރޮގްރާމް އިތުރަށް ހަރުދަނާކޮށް ކޮރޯނާ ވައިރަސްއާއި އަދި އެނޫންވެސް ގައުމީ ވެކްސިން ޕްރޮގްރާމްގެ ތެރެއިންދޭ ވެކްސިންތައް ކަށަވަރުކުރާނެ ކަމަށެވެ.
މީގެ އިތުރުން ސިއްހީ ކުއްލި ނުރައްކަލެއް ނުވަތަ އެފަދަ އެހެން ކާރިސާއަކަށް ތައްޔާރުވުމަށް ދާއިމީ ކަރަންޓީނު ފެސިލިޓީތައް ގާއިމުކޮށް، ރާއްޖޭގެ އެކި ހިސާބުގައި ގާއިމު ކޮށްފައިވާ ކޮވިޑް ފެސިލިޓީތައް ކުރިމަގުގައިވެސް ބޭނުންކުރެވޭނެހެން ދަމަހައްޓާނެ ކަމަށް މިނިސްޓަރު ނަސީމް ވިދާލުވިއެވެ.
ސިއްހީ ދާއިރާ އިތުރަށް ތަރައްގީކުރުމަށް، ކޮވިޑް އިޖާބައިގެ ތެރެއިން އަދި ކޮވިޑް ވެކްސިން ޕްރޮގްރާމުގެ ތެރެއިން އެއްކުރެވުނު ޒާތީ ސިއްހީ މައުލޫމާތުތައް ޑިޖިޓަލް ޑޭޓާބޭސްތަކުގައްޔާއި އެފަދަ އެހެނިހެން ޕްލެޓްފޯމްތަކުގައި ރައްކާތެރިކަމާއިއެކު ބަލަހައްޓާ، އެ މައުލޫމާތުތަކުގެ އަލީގައި ރައްޔިތުންނަށް ދޭ ސިއްހީ ހިދުމަތްތަށް އިތުރަށް ތަރައްގީ ކުރެވޭނެ ކަމަށްވެސް މިނިސްޓަރު ނަސީމް ވިދާޅުވި އެވެ.
"އުއްމީދަކީ މިއަހަރު ނިމުމުގެ ކުރިން ދިވެހި ކޮންމެ ރައްޔިތެއްގެ ފުރިހަމަ ސިއްހީ މައުލޫމާތުގެ ރެކޯޑެއް ގަވައިދުން އަދާހަމަ ކުރެވޭނެ ނިޒާމެއްގެ ތެރެއިން އެއްކޮށް ބެލެހެއްޓުން،" ހެލްތު މިނިސްޓަރު ވިދާޅުވި އެވެ.
މިނިސްޓަރު ނަސީމް ވަނީ ސިއްހީ ދާއިރާ ތަރައްގީކޮށް ކުރިއެރުވުމަށް ހާރިޖީ ގުޅުންތަކުގެ ތެރެއިން ކުރެވޭ މަސައްކަތްތައް ފާހަގަ ކުރައްވާ، އެފަރާތްތަކުން ރާއްޖޭގެ ސިއްހީ ދާއިރާގެ ތަރައްގީ އަށް ފޯރުކޮށްދޭ އެހީތެރިކަން ފާހަގަ ކުރައްވައިފައެވެ.
މިނިސްޓަރު ވަނީ ކޮވިޑްގެ މަސައްކަތުގައި ހަރަކާތްތެރިވެފައިވާ އަދި މިހާރު ވެސް ހަރަކާތްތެރިވަމުންދާ ސިއްހީ ހިދުމަތްތެރިންނާ، ވޮލަންޓިއަރުން އަދި ފްރޮންޓްލައިންގައި މަސައްކަތް ކުރާ ހުރިހާ ފަރާތްތަކަށް ޝުކުރު އަދާކުރައްވައިފަ އެވެ.