ޅ. ފެލިވަރުން 66 މީހަަކު ކޮވިޑް19 އަށް ޕޮޒިޓިވް ވެއްޖެ އެވެ.
ޅ އަތޮޅު ހޮސްޕިޓަލުން އާންމުކޮށްފައިވާ މައުލޫމާތަށް ބަލާއިރު ފެލިވަރުން ވަނީ 104 ސާމްޕަލް ނަގައިފަ އެވެ. އޭގެ ތެރެއިން 88 ސާމްޕަލްގެ ނަތީޖާ ލިބިފައިވާއިރު 22 ސާމްޕަލެއް ވަނީ ނެގެޓިވް ވެފައެވެ.
ފެލިވަރުގައި މަސައްކަތް ކުރާ ޅ ނައިފަރު މީހަކު ކޮވިޑަށް ޕޮޒިޓިވްވެ އެ ދެ ރަށް ވެސް އޮތީ މޮނީޓަރިންގަ އެވެ. ރ. އުނގޫފާރަށް ދަތުރުކުރި ނައިފަރު މީހަކުވެސް ވަނީ ކޮވިޑަށް ޕޮޒިޓިވް ވެފައެވެ. މިވަގުތު ނައިފަރުގައި ކޮވިޑްގެ ތިން ކޭސް އެބައޮތެވެ.
އެޗްޕީއޭ އިން ވަނީމި މަހުގެ 10 ވަނަ ދުވަހުގެ ފަހުން ނައިފަރުން އެހެން ރަށަކަށް ގޮސްފައިވާ ފަރާތެއްވާނަމަ، އަނބުރާ ރަށަށް ދިޔަ ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށް އަންގައިފައެވެ.
ހަމައެއާއެކު މި މަހުގެ ފުރަތަމަ ދުވަހުން ފެށިގެން ފެލިވަރުން ފުރި އެންމެން ވެސް އެގޮތަށް އަމަލުކުރުމަށް އެޗްޕީއޭ އިން ވަނީ އަންގައިފަ އެވެ.
އެ މުއްދަތުން ފެށިގެން 10 ދުވަސް ހަމަވެފައިވާ ފަރާތްތަކުންވެސް ސާމްޕަލް ނަގަައި ޓެސްޓްކުރުމަށް ވަނީ އިލްތިމާސްކޮށްފަ އެވެ. އެޗްޕީއޭ އިން ބުނީ އެ ރަށެއްގެ ހެލްތު ސެންޓަރުން ނުވަތަ ހޮސްޕިޓަލުން އެފަރާތްތަކުގެ ސާމްޕަލް ނެގުމުގެ އިންތިޒާމު ހަމަޖައްސައިދޭނެ ކަމަށެވެ.
ހަމައެއާއެކު އެ މުއްދަތުތަކުގައި އެ ދެ ރަށުން މާލެއަށް އައިސްފައިވާ ފަރާތްތަކުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، އަދި ވިލިމާލޭ ފްލޫ ކްލިނިކަށް ގޮސް ސާމްޕަލް ނަގަން ދިއުމަށް ވެސް ވަނީ އިލްތިމާސްކޮށްފަ އެވެ.
އެޗްޕީއޭ އިން ބުނީ ނަތީޖާ ނެގެޓިވްވި ކަމުގައި ވިޔަސް، އެ ދެ ރަށުގައި އުޅުމަށްފަހު އަނބުރާ ރަށަށް ދިޔަ ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށާއި، އެރަށަށް ކުރި ދަތުރުގެ މައުލޫމާތު 1676އަށް ހިއްސާކުރަންވާނެ ކަމަށެވެ. އަދި އެ މުއްދަތުން ފެށިގެން 10 ދުވަސް ހަމަވެފައިވާ ފަރާތްތަކުންވެސް ސާމްޕަލްއެއް ނަގަައި ޓެސްޓްކުރަންވާނެ ކަމަށެވެ.