ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބ. ކެންދޫ މޮނިޓަރިންގެ ހާލަތަށް ގެނެސް އެ ރަށަށް އަރާ ފޭބުން މަނާކޮށްފި އެވެ.
ކެންދޫ މޮނިޓަރިންގެ ހާލަތަށް ގެނައިކަން އެ ރަށު ކައުންސިލުުގެ ރައީސް އަހުމަދު ސަލީމް ވަނީ "ސަން"އަށް ކަށަވަރުކޮށްދެއްވައިފަ އެވެ.
އޭނާ ވިދާޅުވީ، ރަށް މޮނިޓަރިންގެ ހާލަތަށް ގެނައީ ހޯމް ކަރަންޓީނުގައި ހުއްޓާ ޕޮޒިޓިވްވި މީހަކާއި އެހެން މީހަކު ކޮންޓެކްޓިވިކަން އެނގުމުން ކަމަށެވެ. ކަރަންޓީނުގައި ހުރި މީހާ ކޮންޓެކްޓުވީ އޭނާ ހުރި ގޭގެ އެހެން ބައެއްގައި އުޅޭ މީހަކާ އެވެ.
"ހޯމް ކަރަންޓީނުގައި ހުރީ ގެއެއްގެ އެހެން ބައެއްގައި އުޅޭ މީހަކާ ކޮންމެވެސް ކަހަލަ ގޮތަކަށް ކޮންޓެކްޓެއް ހިނގާފައިވާ ކަމަށް ހޯމް ކަަރަންޓީނުގައި ހުރި ފަރާތުން ހަބަރު ދެނީ،" ސަލީމް ވިދާޅުވި އެވެ.
ސަލީމް ވިދާޅުވީ، ފިޔަވަޅުތައް ވަރުގަދަ ކުރީ ކޮންޓެކްޓުވުމުގެ ސަބަބުން އިތުރަށް ބަލި ފެތުރުމުގެ ފުރުސަތު އޮތުމުން ކަމަށެވެ.
މިހާރު ކޮންޓެކްޓުންގެ ސާމްޕަލް ނެގުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
ކެންދޫ މޮނިޓަރިންގެ ހާލަތަށް ގެނެސްފައިވާއިރު، އައްޑޫ ސިޓީ ހުޅުމީދޫވެސް މިއަދު ވަނީ މޮނިޓަރިންގެ ހާލަތަށް ގެނެސްފަ އެވެ.