ފެނާއި ގޭހުގެ ހިދުމަތް ރޭގަނޑު 11:00އަށް ދެވޭނެ ކަމަށް ފުލުހުން ބުނެފި އެވެ.
ކޮވިޑް19ގެ ކޭސްތައް އިތުރުވުމުގެ ސަބަބުން ބަލި ކޮންޓްރޯލްކުުރުމަށް މާލެ ސަރައްހަދުގައި އާ ފިޔަވަޅުތަކެއް އަޅަން އެޗްޕީއޭއިން ވަނީ އާ ފިޔަވަޅުތަކަށް އަޅަން ނިންމާފަ އެވެ. އެގޮތުން މިރެއިން ފެށިގެން ރޭގަނޑު 8:30 އިން ފަތިހު 4:30 އަށް އެއްގަމު އުޅަނދުފަހަރު ދުއްވުން ވަނީ މަނާކޮށްފަ އެވެ. އަދި ރޭގަނޑު 11:00 އިން ފަތިހު 4:30އަށް މަގުމައްޗަށް ނުކުތުންވެސް ވަނީ މަނާކޮށްފަ އެވެ.
އެޗްއީއޯސީ އާއި ފުލުހުން ގުޅިގެން މިއަދު ބޭއްވި ނޫސްވެެރިންގެ ބައްދަލުވުމުގައި ސުޕްރިޑެންޓް އޮފް ޕޮލިސް ހުސައިން ސަމީރު ވިދާޅުވީ، ވެހިކަލް ދުއްވުން މަނާ ވަގުތު ކަމުގައިވާ ރޭގަނޑު 8:30 އާއި 11:00ގައި ވެސް ޒަރޫރީ ބައެއް ހިދުމަތްތައް ރައްޔިތުންނަށް ލިބޭ ގޮތަށް އިންތިޒާމްތައް ހަމަޖައްސާފައިވާ ކަމަށެވެ. އެގޮތުން އެ ވަގުތުގައި ފެނާއި ގޭސް ގޭގެއަށް ޑެލިވަރީކޮށްދިނުމަށް އެ ކުންފުނިތަކަށް އުޅަނދު ބޭނުން ކުރެވޭ ގޮތަަށް ހުއްދަ ދޭނެ ކަމަށް ސަމީރު ވިދާޅުވި އެވެ.
"ކޮންމެ ތަނަކަށްވެސް [ކުންފުންޏަކަށް] ދެ އުޅަނދު އެ ހިދުމަތްތައް ފޯރުކޮށްދިނުމަށް [ހުއްދަ ދެވޭނެ]،" ސަމީރު ވިދާޅުވި އެވެ.
ނޫސްވެރިންގެ ބައްދަލުވުމުގައި ސަމީރު ވާހަކަ ދައްކަވަނީ -- ފޮޓޯ/ އެޗްއީއޯސީ
އޭނާ ވިދާޅުވީ، އެ ވަގުތުގައި ދެ އުޅަނދަށް ހުއްދަދިން ނަމަވެސް ކާފިއު ނޫން ވަގުތުގައި ކުރިންވެސް ހިދުމަތް ދެމުން އަންނަ ގޮތަށް ހިދުމަތް ދެވޭނެ ކަމަށެވެ.
ކާފިއު ވަގުތުގައި ޓެކްސީތަކަށްވެސް ކުރިއެކޭ އެއްގޮތަށް ހާއްސަ ހުއްދަ ދޭނެ ކަމަށް ސަމީރު ވިދާޅުވި އެވެ. އެގޮތުން ކޮންމެ ޓެކްސީ ސެންޓަރަކަށް 10 ހުއްދަ ލިބޭނެ ކަމަށް އޭނާ ވިދާޅުވި އެވެ.
އާންމު ދަތުރުފަތުރުގައި ހިމެނޭ ފެރީ އަދި ބަސްތައް ބޭއްވޭނެ އެންމެ ފަހު ގަޑިއަކީ ރޭގަނޑު 10:30 ކަމަށްވެސް ސަމީރު ވިދާޅުވި އެވެ.
ސަމީރު އިތުރަށް ވިދާޅުވީ، ޔުނީފޯމް އެޅި މުވައްޒަފުންނާއި އަދިވެސް އެހެނިހެން ޑިއުޓީ ކުރާ މުވައްޒަފުން މަސައްކަތުގެ ކާޑު ދެއްކުމުން ގެއަށް ދިޔުމަށް ނުވަތަ އޮފީހަށް ދިޔުމަށް ހުރަހެއް ނޯންނާނެ ކަމަށެވެ. އެވަގުތުތަކުގައި ވެސް މަގުމަތީގައި ބޭނުމެއް ނެތް ގޮތުގައި ނޫޅުމަށް އޭނާ އިލްތިމާސް ކުރެއްވި އެވެ.
އެއާޕޯޓަށް ފުރަންދާ މީހުން ޓިކެޓާއި ޕާސްޕޯޓު ދެއްކުމުން ފުރަން ދެވޭނެ ކަމަށްވެސް ސަމީރު ވިދާޅުވި އެވެ. އަދި ހޮސްޕީޓަލުގައި އެޑްމިޓްކޮށްފައިވާ ބަލީ މީހެއްގެ އެހީތެރިން، ހޮސްޕިޓަލު ފާސް ދެއްކުމުން އެތަންތަނަށް ދިޔުމަށް ހުރަހެއް ނޯންނާނެ ކަމަށް އޭނާ ވިދާޅުވި އެވެ.
އެޗްޕީއޭ އިން މިހާރު އަޅާފައިވާ ފިޔަވަޅުތަކަށް ބޯނުލަބާ ފަރާތްތައް މީގެ ކުރިން ނަސޭހަތް ދިނުމަށްފަހު، ތަކުރާރުވާނަމަ ޖޫރިމަނާ ކުރެ އެވެ. އެހެން ނަމަވެސް މިފަހަރު ނަސޭހަތް ދިނުމެއް ނެތި، ފުރަތަމަ ފަހަރުން ޖޫރިމަނާ ކުރާނެ ކަމަށް ސަމީރު ވިދާޅުވި އެވެ.
"މިދިޔަ އަހަރު މާޗު މަހުން ފެށިގެން މިއައީ ނަސޭހަތް ދެމުން. އެހެން ނަމަވެސް މިހާރު ނަސޭހަތް ދިނުން ހުއްޓާލާ ސީދާ ޖޫރިމަނާ ކުރާނެ،" ސަމީރު ވިދާޅުވި އެވެ.