ތ. ވަންދޫގައި ކުޑަ ކުއްޖަކަށް މިޔަރެއް ހަމަލާ ދީފިއެވެ.
ވަންދޫ ކައުންސިލްގެ ނައިބު ރައީސް ޝިޔާޒް އިބްރާހިމް "ސަން" އަށް ވިދާޅުވީ އެރަށު ގޮނޑުދޮށަށް މަސްބާނަން ގޮސް އުޅުނު ކުއްޖަކަށް މިޔަރެއް ހަމަލާދިނީ މިއަދު ހެނދުނުގެ ވަގުތެއްގައި ކަމަށެވެ.
"މަސް ބާނަން ގޮސް އުޅެނިކޮށް ބުޅީގައި ގަތް މިޔަރެއް. އޭތި ބާނަފައި މަރާލުނާ ބުޅި ނައްޓަން އުޅެނިކޮށް އޭތި ހިފީ އެ ކުއްޖާ އަތުގައި،" ޝިޔާޒް ވިދާޅުވިއެވެ.
މިޔަރު ހަމަލާ ދިނީ އުމުރުން 10 އަހަރުގެ ފިރިހެން ކުއްޖަކަށެވެ.
ޝިޔާޒް ވިދާޅުވީ ކުއްޖާގެ ކަނާތުގައި މިޔަރު ހިދުމުން، މުލައްދަނޑި ވަރަށް ބޮޑަށް ހަލާކުވެފައިވާ ކަމަށެވެ. ވަންދޫ ހެލްތު ސެންޓަރުން ކުއްޖާއަށް ފަރުވާ ދިނުމަށްފަހު އިތުރު ފަރުވާ އަށް ވޭމަންޑޫ އަށް ކުއްޖާ ފޮނުވާލާފައިވާ ކަމަށާއި ކުއްޖާގެ ހާލު މިހާރު ރަނގަޅު ކަމަށް ކައުންސިލްގެ ނައިބު ރައީސް ވިދާޅުވިއެވެ.
ވަންދޫގައި މަސްބާނަން އުޅުނު ކުއްޖަކަށް މިޔަރެއް ހަމަލާދިން އިރު، ޅ. އަތޮޅުގައި މަސްވެރިކަން ކުރަން އުޅުނު މީހަކު ކަނޑަށް ވެއްޓުނު ވަގުތު ވަނީ މިޔަރެއް ހަމަލާ ދީފައެވެ.