ގައުމީ ސްކައުޓް އެސެމްބްލީގެ މިއަހަރުގެ ފުރަތަމަ ހާއްސަ ޖަލްސާއަށް ދައުވަތުދީ އޮންލައިންކޮށް ކުރިއަށް ގެންދިޔުމަށް ނިންމައިފި އެވެ.
ސްކައުޓް އެސޯސިއޭޝަން އޮފް މޯލްޑިވްސް އިން މިއަދު ނެރެފައިވާ ނޯޓިސްއެއްގައި ބުނެފައިވަނީ އޮންލައިންކޮށް ބާއްވާ މިއަހަރުގެ ފުރަތަމަ ހާއްސަ ޖަލްސާއަށް ދައުވަތު އަރުވާ ކަމަށެވެ. އަދި އެ ޖަލްސާ މި މަހުގެ 27ގައި ބޭއްވުމަށް ނިންމާފައިވާ ކަމަށް ސްކައުޓް އެސޯސިއޭޝަނުން ވަނީ ބުނެފައެވެ.
ހާއްސަ ޖަލްސާ ކުރިއަށް ގެންދިޔުމަށް ނިންމާފައިވަނީ ދެ ކަމަކާ ގުޅިގެންނެވެ. އެގޮތުން ފުރަތަމަ ކަމަކީ އެ އެސޯސިއޭޝަންގެ ހަޒާންދާރު އިސްތިއުފާ ދީފައިވުމުން އެ މަގާމަށް މީހަކު އައްޔަނުކުރުމެވެ. އަދި ދެވަނަ ކަމަކީ ގައުމީ ސްކައުޓް ކައުންސިލްގެ ދައުރު އިތުރު ކުރުމަށް ގޮތެއް ނިންމުން ކަމަށް ސްކައުޓް އެސޯސިއޭޝަނުން ބުނެއެވެ.
އެސޯސިއޭޝަނުން ބުނާގޮތުގައި ސްކައުޓް ކައުންސިލްގެ ދައުރު އަންނަ އަހަރުގެ ސެޕްޓެމްބަރު 27ގައި ހަމަވާއެވެ.
އެ ޖަލްސާގައި ބައިވެރިވެވޭނީ މިދިޔަ އަހަރުގެ ނިޔަލަށް އަހަރީ ފީ ދައްކާފައިވާ ސްކައުޓް ގްރޫޕުތަކުގެ މަންދޫބުންނަށެވެ.