ފްރެންޗް އޯޕަން ޓެނިސް މުބާރާތުގެ ފައިނަލުގައި ދުނިޔޭގެ ރޭންކިން އެއް ވަނައިގައި އޮތް ނޮވަކް ޖޮކޮވިޗް ބަލިކުރުމަށް އިހުނަށްވުރެން ކުޅުން ރަނގަޅު ކުރަން ޖެހޭ ކަމަށް އެ މުބާރާތުގެ އެންމެ ކާމިޔާބު ކުޅުންތެރިޔާ ރަފައެލް ނަޑާލް ބުނެފި އެވެ.
މި މުބާރާތުގައި ތޭރަ ފަހަރު ފައިނަލުގައި ކުޅެ މިހާތަނަށް އެ މުބާރާތުގެ ފައިނަލުގައި ސައްތަ އިން ސައްތަ ރެކޯޑެއް ދަމަހައްޓަމުން އައި ނަޑާލް ފައިނަލުގެ ފުރުސަތު ހޯދީ ސެމީގައި އާޖެންޓީނާގެ ޑިއޭގޯ ޝްވާޓްޒްމަން ބަލިކުރުމަށް ފަހު އެވެ. ކެރިއަރުގެ 16 އަހަރުގައި ވެސް މި މުބާރާތުގައި ދެފަހަރަށް ބަލިވި ނަޑާލްގެ ރެކޯޑް ކިތަންމެ ރަނގަޅު ނަމަވެސް މިއަދު ކުޅޭ ފައިނަލުގައި ސާބިއާގެ އެއްވަނަ އަތުން މޮޅުވުމަކީ މިވަގުތު އެންމެ އުނދަގޫ ޗެލެންޖެވެ.
ތަފާތު ފޯމެއްގައި ހުރި ޖޮކޮވިޗް ފައިނަލުގެ ޖާގައެއް ހޯދީ ސެމީގައި ފޯރިގަދަ ކުޅުމަކަށް ފަހު ގްރީސްގެ ސްޓެފާނޯ ސިޓްސިޕާސް ބަލިކޮށްފަ އެވެ. ޖޮކޮވިޗް ފުރަަތަމަ ދެ ސެޓު ގެންދިޔައީ 6-3، 6-2 އިންނެވެ. އެކަމަކު ތިން ވަނަ ސެޓާއި ހަތަރު ވަނަ ސެޓުގައި ޖޮކޮވިޗް ހައިރާންކޮށްލައި ސިޓްސިޕާސް ވަނީ މޮޅު ކުޅުމެއް ދައްކައި ދެ ސެޓު ގެންގޮސްފަ އެވެ. ސިޓްސިޕާސް މި ދެ ސެޓުން ކުރިހޯދީ 5-7 އާއި 4-6 އިންނެވެ. އެކަމަކު ނަތީޖާ ނެރުނު ސެޓުގައި ޖޮކޮވިޗް ނުކުތީ ތަފާތު ރޫހެއްގަ އެވެ. އޭނާ މި ސެޓު 6-1 އިން ގެންގޮސް މެޗުން މޮޅުވީ އެވެ.
"އަހަރެންނަށް އިނގޭ ނޮވަކް ބަލިކުރަން. އަހަރެންގެ ކުޅުން އެންމެ ރަނގަޅު ފެންވަރެއްގައި ބަހައްޓައިގެން ކުޅޭނީ،" ފްރެންޗް ލީގުގެ ފައިނަލުގައި ދެފަހަރު މަތިން މީގެ ކުރިން ޖޮކޮވިޗް ބަލިކުރި ނަޑާލް ބުންޏެވެ.
މީގެ ކުރިން މި މުބާރާތުގައި ޖޮކޮވިޗް ވަނީ އެއްފަހަރު ނަޑާލް ބަލިކޮށްފަ އެވެ. އަދި ފޯމުގައި މިވަގުތު ހުރި ޖޮކޮވިޗް މި އަހަރު ބަލިވެފައިވަނީ އެންމެ މެޗަކުންނެވެ. އެއީ ޔޫއެސްއޯޕަންގައި އޭނާ ކުޅުނު މެޗެއްގައި ލައިންސްމަން ގައިގައި ބޯޅަޔަކުން ޖަހައިގެން ޑިސްކޮލިފައި ކުރުމުންނެވެ. އެ މުބާރާތުގައި ނަޑާލް ކުޅެފައެއް ނުވެ އެވެ. އެހެން ކަމުން މި ފަހަރުގެ ގްރޭންޑް ސްލޭމެއް ނުކުޅެ ނަޑާލް މި މުބާރާތުގެ ފައިނަލާ ކުރިމަތިލާ އިރު އުނދަގޫތަކެއް ހުރިކަން އޭނާ ވަނީ ފާހަގަ ކޮށްފަ އެވެ.
"އަހަރެންގެ ފުލް ފޯމަށް ނުކުޅެ ޖޮކޮވިޗް ބަލިކުރުމަކީ ވާނޭ ކަމެއް ނޫން. މި ކޯޓަކީ އަހަރެން ވަރަށް ދުވަސްވަންދެން ކާމިޔާބީ ހޯދި ކޯޓެއް. އިދިކޮޅުގައި ހުރީ މިހާތަނަށް ވާދަކުރަން ޖެހުނު އެންމެ އުނދަގޫ އެއް ކުޅުންތެރިޔާ. އެކަމަކު މިކަން ކުރަން މިހުރީ ތައްޔާރަށް."
މި މުބާރާތުގެ ތަށި ނަޑާލަށް މުހިއްމު ވަނީ ޓެނިސް ލެޖެންޑް ރޮޖާ ފެޑެރާގެ ރެކޯޑާ ހަމަކުރާށެވެ. ނަޑާލް މިހާތަނަށް ގްރޭންޑް ސްލޭމް 19 ތަށި ހޯދާފައިވާއިރު، ފެޑެރާ ވަނީ 20 ތަށި ހަމަކޮށްފަ އެވެ. ފައިނަލުގައި ޖޮކޮވިޗް މޮޅުވެއްޖެނަމަ އޭނާ އަށް 18 ގްރޭންޑް ސްލޭމް ތަށި ހަމަވާނެ އެވެ. ފްރެންޗް އޯޕަން ފައިނަލް އޮންނާނީ މާދަމާ ރާއްޖެ ގަޑިން އިރުއޮއްސި ހައެއް ޖަހާއިރު އެވެ.