ސުކްރޭ (ސެޕްޓެމްބަރު 18): ބޮލީވިއާގައި އަންނަ މަހުގެ 18އިގައި ބާއްވާ ރިޔާސީ އިންތިހާބުގައި އެގައުމުގެ ވަގުތީ ރައީސް ޖެނީން އަންޔޭސް ވާދަ ނުކުރައްވާނެކަން އިއުލާން ކުރައްވައިފި އެވެ.
މިދިޔަ އަހަރު ވެރިކަމަށް ވަޑައިގެންނެވި އަންޔޭސް ވިދާޅުވި ގޮތުގައި އިންތިހާބުގައި ވާދަ ނުކުރަން ނިންމެވީ ކުރީގެ ރައީސް އީވޯ މޮރާލޭސްގެ މޫވްމެންޓް ފޯ ސޯޝަލިޒަމް (އެމްއޭއެސް) ޕާޓީއާ ދެކޮޅަށް އޮތް ވޯޓުތައް އިތުރު ކުރުމަށްޓަކަ އެވެ.
"ބޮލީވިއާގެ ޑިމޮކްރަސީއަށްޓަކައި އަޅުގަނޑުގެ ރިޔާސީ ކެންޑިޑެސީ މިއަދު ދޫކޮށްލައިފިން. އެއީ އެމްއޭއެސްއާ ދެކޮޅަށް އޮތް ވޯޓުތައް އެކި ކެންޑިޑޭޓުންގެ މެދުގައި ބައިބައިވުމުން އެ ޕާޓީ މޮޅުވެދާނެތީ،" އަންޔޭސް ވިދާޅުވި އެވެ.
ބޮލީވިއާގެ ހިޔާލު ހޯދުމުގެ ވޯޓުތަކުން ދައްކާ ގޮތުގައި އެގައުމުގައި އެންމެ ގިނަ މީހުންގެ ތާއިދު އޮތް ކެންޑިޑޭޓަކީ އެމްއޭއެސްގެ ކެންޑިޑޭޓު ލުއީޒް އަރުކޭ އެވެ. އަދި ދެވަނައިގައި ރިވޮލިއުޝަނަރީ ލެފްޓް ފްރޮންޓް (އެފްއާރުއައި)އިން ވާދަ ކުރައްވާ ކުރީގެ ރައީސް ކާލޯސް މީސާ އުޅުއްވާ އިރު ތިން ވަނައިގައި އުޅުއްވަނީ މިނިވަން ކެންޑިޑޭޓެކެވެ. އަދި ހަތަރުވަނައިގައި އޮންނެވި އަންޔޭސްއަށް ލިބިވަޑައިގަންނަވާނެ ކަމަށް ބެލެވެނީ 10.6 ޕަސެންޓު ވޯޓެވެ.
މީގެ ކުރިން ބޮލީވިއާގެ ސެނެޓުގެ މެމްބަރެއްގެ ގޮތުގައި ހުންނެވި އަންޔޭސް މިދިޔަ ނޮވެމްބަރު މަހު އެގައުމުގެ ރައީސް ކަމަށް އިސްވީ، އޭރުގެ ރައީސް އީވޯ މޮރަލެސް އިސްތިއުފާ ދެއްވުމުންނެވެ.
މިދިޔަ އަހަރުގެ ނޮވެމްބަރު 10އެއްގައި މޮރަލެސް ވެރިކަމުން އިސްތިއުފާ ދެއްވީ، ބޮލީވިއާގައި އޮކްޓޯބަރު މަހު ބޭއްވި ރިޔާސީ އިންތިހާބުގެ ނަތީޖާ ގަބޫލު ކުރުމަށް ދެކޮޅު ހަދައި، އިދިކޮޅު ފަރާތްތަކުން ސިލްސިލާ މުޒާހަރާތައް ކުރިއަށްގެންދަނިކޮށެވެ. އަދި އެއިންތިހާބުގައި އޮޅުވާލުންތަކެއް ހުރި ކަމަށް ސަރަހައްދީ ޖަމްއިއްޔާއެއް ކަމަށްވާ އޯގަނައިޒޭޝަން އޮފް އެމެރިކަން ސްޓޭޓްސް (އޯއޭއެސް)އިން ބުނި ފަހުންނެވެ.
އޭގެ ސަބަބުން މޮރަލެސް އާ އިންތިހާބެއް ބާއްވާނެކަން އިއުލާން ކުރެއްވި އެވެ. ނަމަވެސް ފަހުން އެގައުމުގެ ސިފައިންގެ ވެރިޔާ، ޖެނެރަލް ވިލިއަމްސް ކަލިމަން ވަނީ ގައުމުގެ މަސްލަހަތަށް ޓަކައި މޮރަލެސް އިސްތިއުފާ ދެއްވުމަށް ގޮވާލައްވާފަ އެވެ.
އެއަށް ފަހު އެއީ ބަޣާވާތެއް ކަމަށް ވިދާޅުވެ މޮރަލެސް އިސްތިއުފާ ދެއްވި އެވެ. އަދި މިހާރު އަމިއްލައަށް އަރުވާލެވިގެން ދިރިއުޅުއްވަނީ އާޖެންޓީނާގައި ކަމުން އޭނާއަށް މި އަހަރުގެ ރިޔާސީ އިންތިހާބުގައި ވާދަ ކުރައްވަން ޝަރުތު ހަމަ ނުވެ އެވެ.
މޮރަލެސް ވެރިކަމުން އިސްތިއުފާ ދެއްވީ ރައީސްކަން ކުރައްވާތާ 14 އަހަރު ފަހުންނެވެ.