އިންތިހާބުތަކުގެ ނަތީޖާ މިހާރު ނުކުންނަނީ ރައްޔިތުން ވޯޓްލާ ގޮތަށް ނޫން ކަމަށް ކުރީގެ ރައީސް މައުމުން އަބުދުލް ގައްޔޫމް ވިދާޅުވީ ސަރުކާރުން ވޯޓަށް ނުފޫޒް ފޯރުވަން ކުރާ މަސައްކަތަށް އިޝާރާތް ކުރައްވާ ކަމަށް މައުމޫނުގެ ތަރުޖަމާނު އަދި ޕީޕީއެމްގެ ކައުންސިލް މެންބަރު މުހައްމަދު ހުސައިން ޝަރީފު( މުންދު) ވިދާޅުވެއްޖެ އެވެ.
ވީޓީވީގެ ފަސްމަންޒަރު ޕްރޮގްރާމްގައި ވާހަކަފުޅު ދައްކަވަމުން މުންދު ވިދާޅުވީ ޕީޕީއެމްގެ ޖަލްސާގައި މައުމޫނު އެގޮތަށް ވިދާޅުވީ އިލެކްޝަން ކޮމިޝަނުގެ އިހުމާލެއް އޮވެގެން ނޫން ކަމަށާއި އެމަނިކުފާނު އިޝާރާތް ކުރެއްވެވީ މިހާރު އިންތިހާބެއް ބާއްވާނަމަ ސަރުކާރުން ނުފޫޒް ފޯރުވާ ވާހަކައަށް ކަމަށެވެ. އަދި ވިދާޅުވީ މައުމޫންގެ ވާހަކަފުޅުތަކަކީ ޒިންމާދާރުކަން ކުޑަކޮށް ވިދާޅުވި ވާހަކަފުޅުތަކެއް ކަމަށް ގަބޫލު ނުކުރައްވާ ކަމަށެވެ.
"އެހެން ވިދާޅުވުމުން އިލެކްޝަން ކޮމިޝަނަށް އޮޅިވަޑައިގަތީކަން ނޭނގެ. އެއްގޮތަކަށް ވެސް އެއީ އިލެކްޝަން ކޮމިޝަނާއި ދިމާލަށް ދިއްކުރެއްވި އިނގިއްޔެއް ނޫން. އެއީ ސަރުކާރުގެ ވާހަކަ މިހާރު މިއޮތް ސަރުކާރުން ނުފޫޒު ފޯރުވާ ވާހަކަ،" މުންދު ވިދާޅުވި އެވެ.
އޭނާ ވިދާޅުވީ އިލެކްޝަން ކޮމިޝަނުން ހެޔޮ ބަދަލުތައް ގެންނަން މަސައްކަތް ކުރި ނަމަވެސް ސަބަބުތަކާހުރެ އެކަންކަން އެންމެ ފުރިހަމަ ގޮތުގައި ފަހިވެގެން ނުދާކަމަށާއި އަންނަ އަހަރުގެ ރިޔާސީ އިންތިހާބު ކައިރިވާ ވަރަކަށް ސަރުކާރުން އެކި ގޮތްގޮތަށް އިލެކްޝަން ކޮމިޝަނުގެ ތެރެއަށް ވަންނަން މަސައްކަތް ކުރާނެ ކަމަށެވެ.
"[ރައީސުލް ޖުމްހޫރިއްޔާ] މުހައްމަދު ނަޝީދުގެ މިގެން ގުޅުއްވާ ޑިމޮކްރަސީގެ އުސޫލްތަކާ ހިލާފު ހުދުމުހުތާރު ވިސްނުން އަޅުގަނޑުމެން ސަރުކާރުގައި ތިބިއިރު ގެންގުޅުނުނަމަ ލާހިކު ކުޅަދާނައެއް ނޫން [މިހާރުގެ ސަރުކާރަށް] ވެރިކަމަށް އަންނާކަށް،"
މުންދު ވިދާޅުވީ މި ސަރުކާރަށް ވެރިކަމަށް އާދެވުނީ ކުރީގެ ސަރުކާރުން ރައްޔިތުން ބޭނުންވާ ގޮތަކީ ކޮބައިކަން ދަނެގެނެ ޑިމޮކްރަސީގެ އުސޫލުތަކާއި އެއްގޮތަށް ކުރި މަސައްކަތްތަކެއްގެ ނަތީޖާއިން ކަމަށެވެ.
މިދިޔަ ބުރާސްފަތި ދުވަހުގެ ރޭ ޕީޕީއެމުން ބޭއްވި އެޕާޓީގެ ޖަލްސާގައި ވާހަކަފުޅު ދައްކަވަމުން މައުމޫން ވިދާޅުވީ އިންތިހާބުތަކުގެ ނަތީޖާ މިހާރު ނުކުންނަނީ ރައްޔިތުން ވޯޓްލާ ގޮތަށް ނޫން ކަމަށެވެ. އެ ވާހަކަފުޅާ ގުޅިގެން އިލެކްޝަންސް ކޮމިޝަނުގެ ރައީސް ފުއާދު ތައުފީޤު ވިދާޅުވީ އެ ކޮމިޝަނުގެ މައްޗަށް ރައްޔިތުންގެ އިތުބާރު ގެއްލޭ ގޮތަށް މައުމޫނު ދެއްކެވި ސަބަބަބީ ކޮބައިތޯ ބެއްލެވުމަށް މައުމޫނަށް ސިޓީއަކުން ދަންނަވާނެ ކަމަށެވެ.
date_range
ހުކުރު 03 ޖެނުއަރީ 2025