ރާއްޖެއަށް ކުޅިވަރުގެ ރޮނގުން މިހާތަނަށް ލިބިފައި ހުރި ކާމިޔާބީތަކަކީ ލިިބުނު އެއްޗެއ ނޫން ކަމަށާއި، އެއީ ކުޅުންތެރިންނާއި ކޯޗުންގެ ބުރަ މަސައްކަތުން ހޯދި އެއްޗެއް ކަމަށް ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އަލީ ސުޒޭން ބުނެފި އެވެ.
އޮލިމްޕިކް ކޮމިޓީގެ ސެކްރެޓަރީ ޖެނެރަލް އަހުމަދު މަރުޒޫގު (މަރޭ) "އިންސްޓަގްރަމް" މެދުވެރިކޮށް ކުރިއަށްގެންދާ "ޗެޓް ވިތު ޗެމްޕިއަންސް" ލައިވްގައި ވާހަކަދައްކަމުން ސުޒޭން ބުނީ ރާއްޖޭގައި މިހާތަނަށް ކުޅިވަރުން ބޮޑެތި ކާމިޔާބުތަކެއް ހޯދީ ގިނަ ބައެއްގެ ބުރަ މަސައްކަތުން ކަމަށެވެ.
"ރާއްޖެއަށް އެއްވެސް މެޑަލެއް ނުއެއް ލިބޭ. ހޯދީ! ކަލްކިއުލޭޓެޑް އެއްޗެއް." ސުޒެއިން ބުންޏެވެ.
ސުޒެއިން ބުނީ ރާއްޖޭގައި ހޯދި މެޑަލްތައް ހޯދުމަށް ރަނގަޅު މެނޭޖްމެންޓެއްގެ ދަށުން ގިނަ ބަޔަކު މަސައްކަތް ކުރީ މެޑަލް ހޯދުމުގެ އަމާޒު ހިފައިގެން ކަމަށެވެ. އަދި މިއަދު އެ ފެންނަނީ އެކަމުގެ ފޮނި ނަތީޖާ ކަމަށް ވެސް ސުޒެއިން ބުނެފައިވެ އެވެ.
"އޭރު ކުލަބުތަކަށް [ފުޓުބޯޅަ ކުލަބުތަކަށް] ވަރަށް ބޮޑެތި ބާރުތަކެއް ދީގެން މައިނާ އިބްރާހިމް ނޫރުއްދީން، ހަސަން މަނިކް ކަހަލަ، ހިޔަލީމެން ކަހަކަ ބޭފުޅުން އެކުލަވާލައިގެން ބޮޑު ކޮމެޓީއެއް ހަދައިގެން، ކޮމިޓީގެ ބެލުމުގެ ދަށުން ވަރަށް ރަނގަޅަށް ގައުމީ ޓީމުގެ ކަންކަން ގެންދިޔައީ."
ސުޒެއިން ބުނީ ގައުމީ ފުޓުބޯޅަ ޓީމުތަކަށް މިހާރު އައިސްފައިވާ ކުރިއެރުމަކީ އޭރު އެބޭފުޅުން ކުރެއްވި މަސައްކަތްތަކުގެ ނަތީޖާ ކަމަށެވެ.
ސުޒޭން ބުނީ ދިވެހި ފުޓްބޯޅައިގެ ޅަފަތުގައި އޭރު އޮތް ހަމައެކަނި ޗެލެންޖަކީ ތަށި ކާމިޔާބުކުރުމުން ކަމަށްވާތީ ކުޅިވަރު ބާރު ބޭނުންކޮށްގެން އިތުރު ކަންތައްތަކެއް ހާސިލްކުރުމަށް ވުރެ އޭރު އެންމެން ވެސް އިސްކަން ދިނީ ކްލަބަށް ކާމިޔާބީ ހޯދައިދޭން ކަމަށެވެ. އެގޮތުން ފުޓްބޯޅައިން ގައުމަށް ކަމެއް ކޮށްދިނުމުގެ ވިސްނުން ވެސް ބަދަލުވެގެން އައީ 1991 ވަނަ އަހަރުގެ ސާފް ގޭމްސްއާ ހަމައިން ކަމަށާއި އޭގެ ކުރިން ބޭރުގެ މުބާރާތަކަށް ދާދިއުން ސިފަކުރެވިފައި އޮތީ ހަމައެކަނި ދަތުރެއްކޮށްލުމުގެ ގޮތުގައި ކަމަށް ސުޒޭން ބުންޏެވެ.
"މެޑަލްއަކަށް ނޫނީ ކާމިޔާބީއަކަށް ޓާގެޓު ކޮށްގެން ކުރެވުނު ނަތީޖާ އެއީ. ލިބުނު އެއްޗެއް ނޫން. ހޯދި އެއްޗެއް އެއީ. ހަމަ އެގޮތަށް މިސާލަކަށް ސާއިދުގެ ވާހަކަ ދައްކަންޏާމު، ސާއިދު އެހެން އުޅެނިކޮށް މެޑައްޔެއް ލިބުނީއެއް ނޫނޭ. ސާއިދު އެފަހަރު ދިޔައީ މެޑަލް ބަލައި. އެޔަށް ތައްޔާރުވެގެން އޭނަ އެޓެމްޕްޓް ކުރީ،"
ސުޒޭން ބުނި ގޮތުގައި މެޑަލްއެއް ރާއްޖެއަށް ލިބޭނީ ތިން ކުޅުންތެރިން ވާދަ ކުރާ މެޗަކުން ތިންވަނައިގައި ހިމެނުމުން ކަމަށެވެ. އަދި އުފަލަކީ މިހާތަނަށް ރާއްޖެއިން ހޯދި މެޑަލްތަކަކީ އެގޮތަށް ހޯދި މެޑަލްތަކަށް ނުވުން ކަމަށް ސުޒޭން ބުންޏެވެ