މިހާރު ރާއްޖޭގައިވެސް ފެތުރެމުންދާ ކޮރޯނާވައިރަސް، ކޮވިޑް-19 އާ ގުޅިގެން ސިކްސް ސެންސަސް ލާމު ރިޒޯޓުން ދެ ބިދޭސީން އެ ރިޒޯޓުގައި އައިސޮލޭޓްކޮށް މޮނިޓާކުރުމުގެ މަސައްކަތް ފަށައިފި އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ ބުނެފައިވަނީ ރައްކާތެރިކަމުގެ ފިޔަވަޅެއްގެ ގޮތުން، ސިކްސް ސެންސަސް ލާމުން ދެ ބިދޭސީން އައިސޮލޭޓްކޮށް މޮނިޓާ ކުރަމުން ގެންދާ ކަމަށެވެ.
އެ ދެމީހުންނަކީ ރާއްޖެއަށް އެތެރެވުމުގެ ކުރީން ކޮވިޑް-19 އަށް ޕޮޒިޓިވްވި މީހަކާ ކޮންޓެކްޓް ވެފައިވާ ދެމީހުން ކަމަށް އެޗްޕީއޭއިން ބުނެ އެވެ.
އެ ދެ ބިދޭސީންގެ އިތުރުން، ކުރަމަތި އައިލެންޑް ރިޒޯޓުން ކޮވިޑް-19 އަށް ޕޮޒިޓިވްވި ފަތުރުވެރިޔަކާ ކޮންޓެކްޓްވި ދިވެއްސެއްގެ ސާމްޕަލް ނަގާފައިވާ ކަމަށްވެސް އެޗްޕީއޭއިން ވަނީ މިރޭ ބުނެފަ އެވެ.
ރައްކާތެރިކަމުގެ ފިޔަވަޅެއްގެ ގޮތުން ދިވެއްސެއްގެ ސާމްޕަލް ނަގާފައިވާއިރު ޓެސްޓުގެ ނަތީޖާ ލިބެންދެން އެމީހާ ގޭގައި އެކަހެރިކޮށްފައިވާ ކަމަށްވެސް އެޗްޕީއޭއިން ބުނެފައިވެ އެވެ.
ރާއްޖޭގައި މިހާތަނަށް އެ ވައިރަހަށް ޕޮޒިޓިވް އަށް ކޭސް އެއް ފެނިފައިވާއިރު އެ ކޭސްތައް ފެނިފައިވަނީ ކުރަމަތި އައިލެންޑްގެ އިތުރުން ކުރެއްދު އާއި ސޭންޑީސް ބަތަލާ އިންނެވެ. ކުރެއްދޫއިން ހަތަރު މީހަކު ޕޮޒިޓިވް ވެފައިވާއިރު ބަތަލާ އިން ދެ ފަތުރުވެރިއަކު، ކުރަމަތި އައިލެންޑް ރިސޯޓުން ދެ މީހަކު ވަނީ ވައިރަހަށް ޕޮޒިޓިވްވެފަ އެވެ.