އަށް ސަތޭކައަށް ވުރެ ގިނަ މީހުންގެ ސޮޔާއެކު މާލޭގައި ކުލި ދައްކައިގެން އުޅޭ މީހުންގެ ޔޫނިއަން، މާލޭ ޓެނަންޓްސް ޔޫނިއަން (އެމްޓީޔޫ)ގެ ފަރާތުން ކުލި ކޮންޓްރޯލް ކުރަން ގޮވާލާ ޕެޓިޝަން ރައްޔިތުންގެ މަޖިލީހަށް ހުށަހަޅައިފިއެވެ.
އެ ޕެޓިޝަނުގައި ސޮއި ކުރުމުގެ މަސައްކަތް އެމްޓީޔޫއިން ފެށީ މިދިޔަ ޑިސެމްބަރު މަހުގެ ތެރޭގައެވެ. ޕެޓިޝަނުގެ ސޮއިކުރުމުގެ މަސައްކަތް ކުރިއަށް ގެންގޮސްފައި ވަނީ ކޮންމެ ހަފްތާ ބަންދެއްގައެވެ.
މިއަދު އެ ޕެޓިޝަން ރައްޔިތުންގެ މަޖިލީހަށް ހުށަހަޅާފައި ވާއިރު، ޕެޓިޝަނުގައި 800 އަށް ވުރެ ގިނަ މީހުން ސޮއިކޮށްފައިވާކަމަށް އެމްޓީޔޫ އިން ބުންޏެވެ.
ޕެޓިޝަންގައި މަޖިލިސް މެމްބަރެއްގެ ގޮތުގައި ސޮއި ކުރެއްވީ ކެންދޫ ދާއިރާގެ މެމްބަރު އަލީ ހުސެއިނެވެ.
އެމްޓީޔޫއިން ބުނީ ޕެޓިޝަނުގައި ކުލީގެ މައްސަލައަށް އެކަށީގެންވާ ގޮތެއްގެ މަތިން ފިޔަވަޅު އަޅައި ހައްލު ކުރުމަށް މަޖިލީހުންނާއި ސަރުކާރުން މަސައްކަތް ނުކުރާކަން ފާހަގަކޮށްފައި ވާނެ ކަމަށެވެ.
އަދި ކުލީގެ މައްސަލައަކީ މަޖިލީހުންނާއި ސަރުކާރުން ވަގުތުން ވަގުތަށްވެސް ފިޔަވަޅު އަޅަންޖެހޭ ސީރިއަސް މައްސަލައެއް ކަމަށާއި މިހާރުވެސް ގިނަބަޔަކަށް ލިބޭ އާމްދަނީއާއި ނުބައްދަލު އަދަދެއް ކުއްޔަށް ހޭދަކުރަމުންދާކަން ފާހަގަ ކޮށްފައިވާނެ ކަމަށެވެ.
ޓެނެންޓްސް ޔުނިއަންއަކީ ކުއްޔަށް ދިރިއުޅެމުން އަންނަ މީހުންނަށް ދިމާވާ އުނދަގޫތައް ހިއްސާކުރުމަށާއި ކުއްޔަށް ދިރިއުޅޭ މީހުންގެ އަޑަށް ރަސްމީ ސިފައެއް ގެނެސްދިނުމަށް މިދިޔަ އޮކްޓޫބަރު މަހުގެ 15 ވަނަ ދުވަހު އުފައްދާފައިވާ ޖަމިއްޔާއެކެވެ.
އެމްޓީޔޫއިން ކުލި ކޮންޓުރޯލު ކުރުމަށް ގޮވާލާ ޕެޓިޝަންގައި ސޮއި ކުރުމުގެ މަސައްކަތް ފެށީ ސަރުކާރުން މަޖިލީހަށް ކުއްޔާ ބެހޭ ބިލެއް ހުށަހަޅާފައި ވަނިކޮންނެވެ. ނަމަވެސް އެ ބިލުގައި ކުލި ކޮންޓުރޯލު ކުރުމުގެ ވާހަކަ ނެތުމުން ގިނަ ބަޔަކު ވަނީ ފާޑުކިޔައިފައެވެ.