ލޯންޗު ބަންޑުން ޖަހާލުމުން މުޅި ތަން އަނދިރިވީ އެވެ. ތަނެއް ދޮރެއް ނުފެނުނެވެ. އެކަކު އަނެކެއްގެ ގައިގައި އަތްލައި ފެނު އަޑީގައި އޮޅުލެވުނެވެ. ލޯންޗު ދަށުން ނުކުމެވުނު ގޮތެއްވެސް ބައެއް މީހުންނަކަށް ނޭނގެ އެވެ.
މިއީ މިދިޔަ އޮކްޓޯބަރު 29 ވަނަ ދުވަހު ހަނިމާދޫ ފަޅުތެރެއަށް ބަންޑުންޖަހާލި ނޮޅިވަރަންފަރު "އައި-ސްޕީޑު" ލޯންޗުން ދަތުރުކުރި 10 މީހުންގެ ތެރެއިން ސަލާމަތްވި މަރިޔަމް އާސިމާ އޭނާގެ ތަޖުރިބާ ކިޔައިދިން ގޮތެވެ. ކުއްލިއަކަށް އައި ކޮޅިގަނޑާ އެކު، ލޯންޗަށް ބިންދާލި ރާޅެއް އެދުވަހު ފަސް ދިވެހީންގެ ފުރާނަ ދުއްވާލި އެވެ. ކުޑަކުޑަ އާއިލާއެއްގެ ނިމުން ގެނުވި އެވެ. އަދިވެސް އެއީ ނުހިކުނު ކަރުނައެކެވެ.
އޮގަސްޓު 28 ވަނަ ދުވަހުވެސް އާދައިގެ މަތިން "އައި ސްޕީޑް" ލޯންޗު، ހެނދުނު 11:20 އެހާކަންހާއިރު ތައްޔާރުވީ، އެ ދެ ރަށުގެ ދެމެދުގައި އެ ލޯންޗުން އެ ދުވަހު ކުރި ތިން ވަނަ ދަތުރަށެވެ. އޭރު ނޮޅިވަރަންފަރުގެ މޫސުން އޮތީ އާާދައިގެ ގޮތަކަށެވެ. އެހެން ނަމަވެސް ދަތުރުގެ މަންޒިލާ ނުހަނު ގާތްވެފައި ވަނިކޮށް ޖެހުނު ކޮޅިގަނޑުގައި ލޯންޗް ބިޔަ ރާޅުތަކުގެ ތެރެއަށް ގެނބިގެން ދިޔައީ އެވެ.
ބަންޑުން ޖަހާލީ ދެވަނަ ރާޅުން!
ނޮޅިވަރަންފަރު ނެރުން ލޯންޗު ނައްޓާލިތާ ކުޑައިރުކޮޅެއް ތެރޭ ކުއްލިއަކަށް މޫސުން ބަދަލުވެ، ކޮޅިގަނޑެއް ނެގި އެވެ. ދުރުން ރާޅުތައް ބިންދަން ފެށިއެވެ. ލޯންޗު ބަންޑުން ޖަހާލި ބާރުގަދަ ކޮޅިގަނޑު ލައްވާލީ ދަތުރުގެ މަންޒިލް ހަނިމާދޫގެ ދެކުނު ކޮޅާ ހިސާބުންނެވެ.
ލޯންޗު ބަންޑުން ޖަހާލުން: ބަންޑުން ޖަހާލީ ހަނިމާދޫ ފަޅުގެ ދެކުނު ފަރާތުން -- ސަން އިންފޯ ގްރެފިކްސް
ލޯންޗު ދުއްވަން އިނީ އެރަށު މީހުން ބުނިގޮތުގައި ތަޖުރިބާކާރު ހުޝިޔާރު ކެޕްޓަނެކެވެ. އެއީ ހދ. ނޮޅިވަރަމް/މުނިޔާގެ، ސިރާޖު އަދުނާން (36އ) އެވެ. ހުޝިޔާރު ކެޕްޓަނަށް މަޖުބޫރިވީ، ބާރު ކޮޅިގަނޑު ލޯންޗާ އަރާ ހަމަވުމުގެ ކުރިން ސަލާމަތްވާނެ ފަސޭހަ މަގެއް ހޯދުމަށެވެ. އެގޮތުން މިސްރާބު ބައްދަލުކޮށް، ވީހާވެސް އަަވަހަކަށް ހަނީމާދޫއަށް ކައިރި ކުރުމަށް އެ ރަށު ދެކުނު ކޮޅުން ފަޅުތެރެެއަށް ވަންނަން އޭނާ މަސައްކަތް ކުރި އެވެ. ނަމަވެސް އެ މަންޒިލާ ހަމައަށް ވާސިލް ނުވެވެނީސް، ކޮޅިގަނޑު އަރާ ލޯންޗާ ހަމަކުރި އެވެ. ކޮޅިގަނޑުގެ ބާރުގައި ބޮޑުވެ އުފެދެމުން ދިޔަ ރާޅުތައް ލޯންޗުގެ އެއް އަރިއަކަށް ބިންދަން ފެށީ އެވެ. ފުރަތަމަ ރާޅު ޖަހާ، ލޯންޗު ހަމައަކަށް ނޭޅެނީސް ދެވަނަ ރާޅެއް ޖަހާ ލޯންޗުން ބަންޑުން ޖަހާލީ އެވެ.
އެއް އާއިލާއެއްގެ 4 މަރު، އޭގެ ތެރެއިން އެކަކީ "ބޮޑު ޓީޗަރު"!
ލޯންޗް ބަންޑުން ޖަހާލައިގެން މަރުވި، (ވ-ކ) ހުސެއިން އަބްދުﷲ، އޭނާގެ އަންހެނުން މަރިޔަމް މަނިކެ އަދި ދެމަފިރިންގެ ހަމައެކަނި އަންހެން ދަރިފުޅު ގުރައިޝާ އަބްދުﷲ
އެ ދުވަސްވަރަކީ ސްކޫލްތަކުގެ މިޑް ޓާމް ބްރޭކަށް ވުމުން އެ ދަތުރަކީ ބައެއް މީހުން އެކި އެކި ސަބަބުތަކަށްޓަކައި މާލެ އައުމަށްޓަކައި ހަނިމާދޫ އެއާޕޯޓަށް ފުރަން ދިޔަ ދަތުރުވެރިންނެވެ.
އޭގެ ތެރޭގައި އެއް އާއިލާއަކީ އެރަށު ސްކޫލުގެ ޕްރިންސިޕަލް ހދ. ނޮޅިވަރަންފަރު އަހިމާގެ، ހުސެއިން އަބްދުﷲ ނުވަތަ އޭނާގެ ދަރިވަރުންގެ ނަމުން ނަމަ ”ބޮޑު ޓީޗަރު“ގެ އާއިލާއެވެ. އެ ދަތުރުގައި ބޮޑު ޓީޗަރާއެކު، އޭނާގެ އަންހެނުން މަރިޔަމް މަނިކެ އާއި އެ ދެމަފިރިންގެ ހަމައެކަނި އަންހެން ދަރިފުޅު، ގުރައިޝާ އަބްދުﷲ، 30، އާއި ގުރެއިޝާގެ ފަސް އަހަރުގެ އަންހެން ދަރިފުޅު އީރާ ވެސް ބައިވެރިވި އެވެ. ގުރައިޝާއާއި އީރާ މާލެ އައުމަށްޓަކައި ނޮޅިވަރަންފަރުން ފުރީ މާލޭގައި ވަޒީފާ އަދާކުރާ އޭނާގެ ފިރިމީހާ ގާތަށް އައުމުގެ ފޮނި އުންމީދާ އެކު އެވެ. ނަމަވެސް އެދަތުރުވީ، އެ ދެމައިންނާއި ކުޑަ ކުޑަ އީރާގެ ކާފަ އައި މާމަގެ ފަހު ދަތުރަށެވެ. އެ ދަތުރުގައި މަރުވި ފަސް މީހުންގެ ތެެރޭ އެ ކުޑަ އާއިލާގެ ފަސް މެންބަރުން ހިމެނުނެވެ.
ދެން އެދަތުރުގައި ފުރާނަ ގެއްލުނީ، ނޮޅިވަރަންފަރު/ ވީނަސް، އާއިޝަތު އަލީ(51އ) އެވެ. އޭނާއާ އެކު އޭނާގެ ފިރިމީހާ ނޮޅިވަރަންފަރު/ ވީނަސް، އަބްދުލް ޝުކޫރުވެސް އެ ދަތުރުގައި ބައިވެރިވި އެވެ. ޝުކޫރު ވަނީ އެ ލޯންޗުން މީހުން ސަލާމަތް ކުރުމުގައި ބޮޑު ރޯލެއްވެސް އަދާކޮށްފަ އެވެ. އެގޮތުން އޭނާ ދެ މީީހުންގެ ފުރާނަ ސަލާމްކޮށް ހިތްވަރު ދެއްކި އެވެ.
ފަސް މީހުންގެ މަރުވުމުގެ އިތުރުން ލޯންޗުން ދަތުރު ކުރި ތިން މީހަކު ހާލު ބޮޑުވެ ހޮސްޕިޓަލަށް ގެނެސް ފަރުވާވެސް ދިނެވެ.
ފަސް މީހުންގެ ޖަނާޒާ އެއް ވަޅެއްގައި، ފެނުނީ އެއްބައިވަންތަކަން!
އޮގަސްޓް 30، 2019: ހދ. ނޮޅިވަރަންފަރުން ފުރައިގެން ހަނިމާދުއަށް ދަތުރުކުރި ލޯންޗެއް ބަންޑުން ޖަހާލައިގެން ނިޔާވި ފަސް މީހުންގެ ޖަނާޒާ ހަނިމާދޫގައި ބޭއްވުން: ނިޔާވީ ލޯންޗުން ދަތުރު ކުރި އެއް އާއިލާގެ ހަތަރު މީހަކާއި އިތުރު އަންހެނެއް -- ސަން ފޮޓޯ/ މުހައްމަދު ޝަފީއު
ފަސް މީހުންގެ ޖަނާޒާ އޮތީ ހދ. ހަނިމާދޫގަ އެވެ. އެރޭ ދަންވަރު 2:00 ގައި ބޭއްވި އެ ޖަނާޒާއަށް ދެ ރަށު އެކި އުމުރުފުރައިގެ މީހުން ބައިވެރިވި އެވެ.
އޭރު އެރަށުގައި ހުރި "ސަން" ގެ ވީޑިއޯ ޖާނަލިސް މުހައްމަދު ޝަފީއު (އެއްޕަސް) ބުނި ގޮތުގައި ނޮޅިވަރަންފަރުން ހަނިމާދޫޫއަށް އެކި އުޅަނދުތަކުގައި 200 އެއްހާ މީހުން ޖަނާޒާއަށް ހަނިމާދޫއަށް ދިޔަ އެވެ.
"ފުލުހުންނާއި އެމްއެންޑީއެފް އަދި ރަށުގެ ބައެއް އަމިއްލަ މީހުންގެ އުޅަނދުތަކުގައި އެކި އުމުރުފުރައިގެ މީހުން އެރޭ ހަނިމާދޫއަށް ދިޔަ. ހަނިމާދޫ އިން ބޭރު ރަށެށްގެ އިހުސާސެއް ނާދޭ. އެރަށު ރައްޔިންތުން ވަރަށް ބޮޑު އެއްބާރުލުމަކާއި ހިތްވަރެއް ލިބުނު. އެރަށުން ކަމެއް ބޭނުންވިސް އެކަމެއް ފަސް ނުޖެހި ކޮށްދިން. ވަރަށް ބޮޑު އެއްބައިވަންތަކަމެއް ފެނުނު." ނޮޅިވަރަންފަރަށް ނިސްބަތްވާ އެއްބަސް ކިޔައިދިނެވެ.
އޮގަސްޓް 29، 2019:: ނިޔާވި ފަސް މީހުންގެ މޫނުދެއްކުން -- ސަން ފޮޓޯ/ މުހައްމަދު ޝަފީއު
އޭނާ ބުނި ގޮތުގައި، މޫނު ދެއްކުން އޮތް ހަނިމާދޫ ހިނަވާގޭގެ ތެރޭގައި އޮތީ މުޅިންވެސް ރުއިމުގެ އަަޑެވެ. ހަނިމާދޫ އާއި ނޮޅިވަރަންފަރުގެ ކޮންމެ ރައްޔިތަކުވެސް އެތަނަށް ވަދެ ނިކުމެގެން ދަނީ ގިސްލާ ރޮމުންނެވެ.
"ކަރުނަ ތިކި ވައްޓާނުލާ އެކަކުވެސް އެތަނަކުން [ހިނަވާގެން] ނުފެނޭ. އެއީ ކޮންމެ ރަށަކަށް ނިސްބަތްވިޔަސް އެތާ އޮތީ މުޅިން ރުއިމުގެ އަޑު. އެންމެންގެ މޫނު މަތިން ފެންނަން އޮތީ ހިތާމަ.،" އޭނާ ކިޔައިދިނެއެވެ.
މޫނު ދެއްކުމަށް ފަހު ފަސް މީހުންގެ މައްޗަށް އެރަށު މަސްޖިދު މޫސާ އަލީ ގައި ކަށުނަމާދު ކުރި އިރު، އެ މިސްކިތް އޮތީ މުޅިން ފުރާލާފަ އެެވެ. އެކި އުމުރުފުރައިގެ މީހުންނެެވެ. އެއްޕަސް ސިފަ ކުރި ގޮތުގައި އެއީ މޮޅިވެރި ކަމުގެ ވަގުތުކޮޅެކެވެ.
އޮގަސްޓް 30، 2019: މަރުވި ފަސް މީހުންގެ މައްޗަށް ކަށުނަމާދު ކުރުން: މުޅި މިސްކިތް އޮތީ ފުރިފައި -- ސަން ފޮޓޯ/ މުހައްމަދު ޝަފީއު
ފަސް މީހުން ފަސްދާނުލީ، އެއް ވަޅެއްގަ އެވެ. ބޮޑު ވަޅެއް ކޮނެ ފަސް ސަންދޯއް އެއް ވަޅަަކަށް ލައި ފަސް ލީވެސް އެތަނުގައި ތިބި ގިނަ ބައެއްގެ މަސައްކަތުންކަން އެއްޕަސް ފާހަގަ ކުރި އެވެ. އެއްބަޔަކު ވަރުބަލިވާއިރަށް، އަނެއްބަޔަކު ފަސް ލުމުގައި އުޅުނު ކަމަށް އެއްޕަސް ބުންޏެވެ. އޭނާ ބުނީ، އޭރުވެސް މަރުވި އާއިލާގެ މީހުންނަށް އެތަނުގައި ތުިބި މީހުން ހިތްވަރުދީ ތައުޒިޔާ ކިޔަމުން ދިޔަ އެވެ.
ހިތާމަވެރި ހާދިސާއިން އެތަށް ފިލާވަޅެއް!
ބަންޑުން ޖަހާލި ލޯންޗު: ހިތާމާވެރި ހާދިސާއިން އެތަށް ފިލާވަޅެއް --
ފަސް މީހެއްގެ ހަޔާތުގެ ދަތުރު ކުރުކޮށްލަން ޖެހުނު ލޯންޗުގެ އެ ދަތުރުން ދިވެހިނަނަށް އެތަށް ފިލާފަޅެއް ލިބިގެންދިޔަ އެވެ. މޫސުމާ ބެހޭ ގައުމީ އިދާރާ އިން އެ ސަރަހައްދަށް ޔެލޯ އެލާޓް ނެރެފައިވަނިކޮށް 10 މިނިޓްއިރުގެ އެ ދަތުރުން މިދުނިޔެއާ ވަކިވާން އެޖެހުނީ، ފަސް ފުރާނަ އެވެ. ދަތުރު ކުރި 10 މީހުންވެސް ތިބީ ލައިފް ޖެކެޓް ނާޅަ އެވެ. ކިތަންމެ ކުރު ދަތުރަކަށް ނަމަވެސް މޫސުމަށް ސަމާލުވެ، ރައްކާތެރި ފިޔަވަޅު އަޅަން ދިވެހިންނަށް ހަނދާންކޮށްދިން ދަތުރަކަށް އެ ދަތުރުވި އެވެ. ދިވެހިން ކަނޑަށް ކިތަންމެ ގަދަ ނަމަވެސް، މޫސުން ގޯސް ދުވަސް ދުވަހު ދަތުރު ކުރުމަކީ އެހާ ލުއިކޮށް ނަގާވަރުގެ ކަމެއް ނޫންކަން އެ ދަތުރުން އެކަނިވެސް ސާބިތުކޮށްދިނެވެ.
އެ ހަދިސާއަށް ފަހު، ކަނޑު ދަތުރުކުރާއިރު، ލައިފް ޖެކެޓް އެޅުން މަޖުބޫރު ކުރުމުގެ ބަހުސްވެސް ފެށުނެވެ. އަދި އެލާޓްތައް ނެރެފައި ވަނިކޮށް، މީހެއްގެ ފުރާނައަށް ގެއްލުން ލިބިއްޖެ ނަމަ ޒިންމާވާ ފަރާތްތަކާމެދު ފިޔަވަޅު އަޅާނެ ކަމުގެ ހަރުކަށި އިންޒާރުވެސް ކޯސްޓްގާޑުން ވަނީ ދީފަ އެވެ.