މިސް ވޯލްޑު 2019އިގެ ލަގަބު މިއަހަރު ޖަމައިކާގެ ރީތީގެ ރާނީ ޓޯނީ އޭން ސިންހު ހާސިލުކޮށްފި އެވެ.
އެމެރިކާގެ ފްލޮރިޑާ ސްޓޭޓް ޔުނިވާސިޓީން ސައިކޮލޮޖީ އާއި ވިމެންސް ސްޓަޑީސް ކިޔަވާފައިވާ 23 އަހަރުގެ ސިންހު ވަނީ އޭނާ ރަމްޒުކޮށްދެނީ "ދުނިޔެއަށް ރަނގަޅު ބަދަލެއް ގެންނަން މަސައްކަތް ކުރާ ޖީލެއްގެ އަންހެނުން" ކަމަށް ބުނެފަ އެވެ. އަދި ދުނިޔޭގެ ހުރިހާ އަންހެން ކުދިންނަށް އޭނާ ދޭން ބޭނުންވާ މެސެޖަކީ "ކޮންމެ ކުއްޖަކަށްވެސް އެކުއްޖެއްގެ ހުވަފެންތައް ހާސިލު ކުރުމުގެ ގާބިލުކަން ލިބިގެންވާކަން" ކަމަށް ބުނެފަ އެވެ.
އެއީ ޖަމައިކާގެ އަންހެނަކަށް މިސް ވޯލްޑްގެ ލަގަބު ލިބުނު ހަތަރު ވަނަ ފަހަރެވެ. މީގެ ކުރިން 1963 އާއި 1976 އާއި 1993ގައި އެގައުމުގެ އަންހެނުންނަށް މިސް ވޯލްޑުގެ ތާޖު ދީފައިވެ އެވެ.
މިއަހަރުގެ މިސް ވޯލްޑް މުބާރާތުން ދެވަނަ އާއި ތިން ވަނަ ހޯދާފައި ވަނީ ފްރާންސުގެ އޮފެލީ މެޒިނޯ އާއި އިންޑިއާގެ ސުމަން ރާއޯ އެވެ.
މިއަހަރު މިސް ޔޫއެސްއޭ، މިސް ޓީން ޔޫއެސްއޭ، މިސް އެމެރިކާ، މިސް ޔުނިވާސް އަދި މިސް ވޯލްޑަށްވެސް ހޮވިފައި ވަނީ ކަޅު ނަސްލުގެ އަންހެނުންނެވެ. އަދި އެއީ ރީތީގެ ރާނީން ހޮވާ މުބާރާތްތަކުގެ ތާރީހުގައި ވަރަށް ފާހަގަކޮށްލެވޭ ކަމެއް ކަމަށް އެމެރިކާގެ ނޫސްތަކުން ބުނެ އެވެ.
މިމަހުގެ ނުވައެއްގައި ބޭއްވި މިސް ޔުނިވާސް މުބާރާތުން އެ ލަގަބު ހާސިލު ކުރީ ދެކުނު އެފްރިކާގެ ރީތީގެ ރާނީ ޒޮޒިބިނި ޓުންޒީ އެވެ.