ނޮވެމްބަރު 3، 1988ގެ "އުދުވާން"ގެ އިސް މޭސްތިރިޔާ އަދި ތަމަޅަ ޓައިގަރުންނާ ގުޅިގެން ރާއްޖެ އަށް ހަމަލާދީ 19 ދިވެއްސަކު ޝަހީދުކޮށްލުމުގައި އިސްރޯލެއް ކުޅުނު، ހ. ހާޖަރާގޭ އަބްދުﷲ ލުތުފީ ބޭސްފަރުވާ އަށް ސްރީލަންކާ އަށް ދިޔަ މުއްދަތު ފަހަނައަޅައި ދިއުމުން އޭނާ އަކީ "ހޯދައި ނުފެނިފައިވާ މީހެއް ކަމަށް ބަލައި" ފިލިކަމަށް ސަރުކާރުގެ ކަމާ ބެހޭ ފަރާތުން ބަލައިގެންފި އެވެ.
ސަން އަށް ވަރަށް އިތުބާރު ހުރި ގޮތަކަށް އެނގިފައިވާ ގޮތުގައި އުމުރަށް ޖަލަށް ލުމަށް ހުކުމްކޮށްފައިވާ، ލުތުފީގެ އަމިއްލަ ހަރަދުގައި ސްރީލަންކާ އަށް ބޭސް ފަރުވާ އަކަށް ދިޔުމަށް 2009 ވަނަ އަހަރު ޑިޕާޓްމަންޓް އޮފް ޕެނިޓެންޝަރީން ހުއްދަދިނީ 2010 ވަނަ އަހަރުގެ ޖެނުއަރީ މަހު އަނބުރި ރާއްޖެ އަންނަ ގޮތަށެވެ. ނަމަވެސް އެ މުއްދަތު ހަމަވެ، ދެ އަހަރުވުމާ ގާތްވެފައިވާ އިރު، ޕެނިޓެންޝަރީ އިން ސަރުކާރުގެ ބައެއް ފަރާތްތަކަށް ފޮނުވާ ލިއުންތަކުގައި ބުނަނީ އޭނާ އަކީ މިހާރު "ހޯދައި ނުފެނިފައިވާ މީހެއް" ކަމަށެވެ.
ނަމަވެސް ހޯމް މިނިސްޓްރީއަކުން އެކަން އަދި މީޑިއާއަކަށް ކަށަވަރެއް ނުކޮށްދެ އެވެ.
ލުތުފީގެ ޚަބަރެއް ނުވާތާ ދެ އަހަރުއްވާން ކައިރިވެފައިވާ އިރު ލުތުފީ ރާއްޖެ ނުގެނެސް ވަނީ ކީއްވެންތޯ ހޯމް މިނިސްޓްރީގެ ސްޓޭޓް މިނިސްޓަރު މުހައްމަދު ނައީމް (މޮނާޒާ ނައީމް) އަށް މިއަދު ދެންނެވުމުން ވިދާޅުވީ ވަކި މީހެއްގެ މައުލޫމާތު ހޯދަން ބޭނުންވާ ނަމަ ލިޔުމަކުން ފޮނުވުމުން ޖަވާބު ދެއްވާނެ ކަމަށެވެ.
"ކޮންމެ ދުވަހަކު އެތައް ބަޔަކު ބޭސްފަރުވާ އަށް ގޮސް އެތައް ބަޔަކު ބޭސްފަރުވާ އިން ޖަލަށް ވެސް ގެންދާނެ. އެ ހުރިހާ ކަމެއް ވެސް ވާނެ. ވަކި މީހެއްގެ ވާހަކަ ލިޔުމަކުން ފޮނުވީމަ ޖަވާބު ފޮނުވާނަން،" ނައީމު ވިދާޅުވި އެވެ.
ސަން އަށް އެނގިފައިވާ ގޮތުގައި ލުތުފީ ފިލާފައިވާ ކަމަށް ބުނެ ފުލުހުންނަށާއި ހޯމް މިނިސްޓްރީގެ އިތުރުން ކަމާ ބެހޭ މުއައްސަސާތަކަށް ޑިޕާޓްމަންޓް އޮފް ޕެނިޓެންޝަރީ ]ޑީޕީއާރުއެސް[ އިން ވަނީ އަންގާފަ އެވެ.
ފުލުހުންގެ މީޑިއާ އޮފިޝަލު މިއަދު ވިދާޅުވީ އެފަދަ ކަމެއް ފުލުހުންނަށް އަންގާފައިވާ ނަމަ ފުލުހުން އަޅަން ޖެހޭ ފިޔަވަޅެއް އަޅަމުންދާނެ ކަމަށެވެ. ނަމަވެސް ލުތުފީ ހޯދަން އެއްވެސް ކަމެއް މިހާތަނަށް ފުލުހުން ކޮށްފައިވާ ކަމެއް ނުވަތަ ނޫން ކަމެއް ވެސް ފުލުހުންގެ މީޑިއާ އޮފިޝަލް ވިދާޅެއްނުވެ އެވެ. ހަމައެކަނި ވިދާޅުވީ "އެފަދަ ކަމެއް އަންގާފައިވާ ނަމަ އެކަމެއް އޮންނަ އުސޫލުން ފުލުހުން ކުރިއަށްގެންދާނެ،" ކަމަށެވެ.
ލުތުފީ ފިލައިގެން ރާއްޖޭން ބޭރުގައި އުޅެމުންދާ އިރު އޭނާ ދެން ރާއްޖެ ނާންނާނެ ކަމަށް ލުތުފީ ވަނީ އޭނާގެ ބައެއް ރައްޓެހިންގާތު ބުނެފަ އެވެ.
ނޮވެމްބަރު ތިނެއްގެ އުދުވާނީ ހަމަލައަށް 23 އަހަރު ފުރުނު އިރު މީޑިޔާ އަކަށް ލުތުފީ ދިން ފުރަތަމަ އިންޓަވިއު، ލަންކާގެ ދުވަހު ނޫހެއް ކަމައްވާ "ދަ އައިލެންޑް" ނޫހަށް ވަނީ މިމަހު ދީފަ އެވެ. އެ ނޫހަށް ލުތުފީ ދީފައިވާ އިންޓަވިއުގައި ބުނެފައި ވަނީ ނޮވެމްބަރު ތިނެއްގެ ހަމަލައަކީ ކޮންމެ ގޮތެއް ހަދައިގެން ވެސް ރައީސް މައުމޫން، ވެރިކަމުން ބޭރުކުރުމަށް ހިންގި އަމަލެއް ކަމަށެވެ. އިންގިލާބަކުން މައުމޫން ބޭރުކުރަން ކުލީ ސިފައިން ގެނައީ އިންތިހާބެއް މެދުވެރިކޮށް ކާމިޔާބު ހޯދަން އިދިކޮޅު ފަރާތްތަކަށް ރާއްޖޭގައި ފުރުސަތު ނުދޭތީ "ބޭރުގެ ބާރެއް ބޭނުންކޮށްގެން ނޫން އެހެން ގޮތަކަށް" މައުމޫންގެ ސަރުކާރު ވައްޓާލެވެން ނެތިގެން ކަމަށެވެ. އަދި މިހާރުގެ ރައީސް ނަޝީދަކީ ލުތުފީގެ "ރަނގަޅު ރައްޓެއްސެއް" ކަމަށް ވެސް ވަނީ ބުނެފަ އެވެ.
date_range
އާދިއްތަ 24 ނޮވެމްބަރ 2024