ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގައި ތުހުމަތުވާ އަލީ ސިފާމް އެއް ކަންފަތުގެ އަޑުއެހުމުން މަހުރޫމްވެފައިވާ ކަމަށް ބުނެ ބަންދަށް ލުއި ދިނުމަށް އޭނާ ޝަރީއަތުގެ މަޖިލީހުގައި އެދެފި އެވެ.
އުމުރުން 29 އަހަރުގެ ޒިޔަދަމް މަރާލާފައި ވަނީ މާޗް 20، 2015 ދުވަހުގެ ރޭ 10:30 އެހައިކަންހާއިރު ވަޅިން ހަމާލާދީ އެވެ. އޭނާ މަރާލި މައްސަލައިގައި ދައުވާ ކޮށްފައިވަނީ، ލ. މުންޑޫ، ބީޗްވިލާ، އަލީ ސިފާމާއި ހަމަ އެރަށު ހިނާވިލާ، މުހައްމަދު ޝަނޫނުގެ މައްޗަށެވެ.
މައްސަލަ ބައްލަވާ ގަޒީ މުހައްމަދު ސަމީރު މިއަދު ވަނީ، އެ ދެމީހުންގެ މައްޗަށް މީގެ ހަތަރު އަހަރު ކުރިން ކުރި އެ ދައުވާ މަދަނީ މިންގަނޑުން ކުރިއަށް ދިޔުމަށް ނިންމައި، އެ މައްސަލަ ބެލޭނެ ކަމަށް ކަނޑައަޅާފައެވެ.
ޝަރީއަތުގެ މަޖިލީހުގައި ވާހަކަ ދައްކަމުން އަލީ ސިފާމް ބުނީ، އޭނާ ސިއްހީ ފަރުވާ ދިނުމުގައި މޯލްޑިވްސް ކަރެކްޝަނަލް ސާވިސް އާއި ހިއުމަން ރައިޓްސް ކޮމިޝަނުން އިހުމާލުވެފައިވާ ކަމަށެވެ. އެގޮތުން އޭނާ ބަންދުކުރި އިރު، އޭނާ އަކީ ސިއްހަތު ރަނގަޅު މީހެއް ކަމަށާއި ނަމަވެސް މިހާރު އެތައް ސިއްހީ މައްސަލައެއް ކުރިމަތިވެ، ފަރުވާ ނުލިބުމުގެ ސަބަބުން އިތުރަށް ސިއްހީ ހާލަތު ގޯސްވެފައިވާ ކަމަށް ވެސް ސިފާމް ބުންޏެވެ.
ސިފާމް ދައުލަތުގެ ފަރާތުން އޭނާގެ ސިއްހީ ހާލަތާމެދު ސުވާލު ކުރުމުން ދައުލަތުުގެ ވަކީލު ވިދާޅުވީ، އޭނާގެ ދަތަށް ގެއްލުމެއް ލިބިފައި ހުުރުމުން ފަރުވާ ދެމުންދާ ކަމަށެވެ. އަދި އޭނާގެ ހާލަތު އެޗްއާރުސީއެމް އިން ބަލަމުންދާ ކަމަށް ވެސް ދައުލަތުގެ ވަކީލު ވިދާޅުވިއެވެ.
ސިފާމް ބުނީ، އޭނާއަށް ދިމާވެފައި ހުރީ ދަތުގެ މައްސަލަ އެކަނި ނޫން ކަމަށާއި އުނަގަނޑާއި އަތުގައި ރިއްސަމުންދާ ކަމަށެވެ. އޭގެ އިތުރުން އޭނާގެ ވާތު ކަންފަތުގެ އަޑުއެހުމުން މަހުރޫމްވެފައިވާ ކަމަށް ޑޮކްޓަރު ލިޔުން ދެއްވާފައިވާ ކަމަށް ސިފާމް ބުންޏެވެ.
ސިފާމް ބުނީ، އެކަށީގެންވާ ފަރުވާ ނުލިބޭ ކަމަށްބުނެ އެތައް ފަހަރަކު ކަރެކްޝަންސްއާ އެޗްއާރުސީއެމަށް ސީޓީވެސް ލާފައިވާ ކަމަށެވެ. ނަމަވެސް އެކަށީގެންވާ ފަރުވާ ލިބިފައި ނުވާ ކަން އޭނާ ފާހަގަ ކުރެއްވި އެވެ.
"ދަތް މިހާރު ހުރީ އުފުރާލަން ޖެހިފައި. ކަންފަތުގެ އެއްފަޅި އަޑުއެހުމުން މަހުރޫމްވެފައި. އަޅުގަނޑުގެ ހާލަތު މިހާ ދަށްވީ، އެކަށީގެންވާ ފަރުވާ ނުލިބުމުން،" ސިފާމް ބުންޏެވެ.
އެނާ ބުނީ، މިހާރު އޭނާ ހުރީ ރިމާޑް ޖަލެއްގައި ކަމަށްވިޔަސް "އެއީ ނަމުގައި ރިމާންޑް ޖަލެއް" ކަމަށެވެ. ޖަލުގެ ހާލަތު ވަރަށް ދަށްކަމަށް ސިފާމް ފާހަގަ ކުރެއްވިއެވެ.
ސިފާމްގެ އެވާހަކަތައް އަޑުއެހުމަށް ފަހު، ދައުލަތުގެ ފަރާތުން ބުނީ، އެންމެ ފަހުން މިދިޔަ މެއި މަހު، ކަންފަތުގެ މައްސަލައިގައި ސިފާމް ޑޮކްޓަރަށް ދައްކާފައިވާ ކަމަށް ކަރެކްޝަންސް އިން ލިޔުންދީފައިވާ ކަމަށެވެ.
ސިފާމްގެ ގާނޫނީ ވަކީލް ވިދާޅުވީ، މީއީ ސީރިއަސް މައްސަލައެއް ކަމަށާއި ހައްޔަރުކުރާ މީހުންގެ ސިއްހީ ފަރުވާ ފަދަ އަސާސީ ހިދުމަތް ފުރިހަަމަވެފައިވޭތޯ ދައުލަތުން ޔަގީން ކުރަން ޖެހޭ ކަމަށެވެ.
މި ހުރިހާ ކަމަކަށް ބަލައި ސިފާމްގެ ފަރާތުން އެދުނީ، އޭނާގެ ބަންދަށް ލުޔެއް ދިނުމަށް ކަމަށެވެ.
ގަޒީ މުހައްމަދު ސަމީރު މިއަދުގެ އަޑުއެހުން ނިންމަވާލެއްވީ ސިފާމްގެ ބަންދަށް ލުޔެއް ދިނުމާ މެދު ދެން އޮންނަ އަޑުއެހުމެއްގައި ގޮތެއް ނިންމަވާނެކަން އިއުލާން ކުރެއްވުމަށްފަހުއެވެ.
އެ މައްސަލައިގެ އަޑުއެހުމެއް ދެން އޮންނާނީ އަންނަ މަހުގެ 20 ވަނަ ދުވަހުއެވެ.