ކޮންމެ އަހަރަކު ވެސް ބާއްވަަމުން އަންނަ މެޑިކަލް އެންޑް ހެލްތު އެކްސްޕޯ އޮކްޓޫބަރު ތިނެއްގައި ފަށާގޮތަށް ނިންމައިފި އެވެ.
އެ އެކްސްޕޯ އިންތިޒާމްކުުރަނީ ރާއްޖޭގެ އެމްވީ މެޑިކަލްސްއާއި އިންޑިއާގެ މެޑް ލައިފް އޭޝިއާ ގުޅިގެންނެވެ.
އެމްވީ މެޑިކަލްސްގެ މާކެޓިން އެންޑް ޕީއާރު ޑިރެކްޓަރު އަބްދުލް ޖަލީލް ހުސެއިން "ސަން" އަށް މިއަދު ވިދާޅުވީ އެ އެކްސްޕޯ އޮކްޓޫބަރު ފަހަކާ ހަމައަށް ކުރިއަށް ދާނެ ކަމަށެވެ.
އެ އެކްސްޕޯ އޮންނާނީ ދަރުބާރުގޭގައި މެންދުރު ތިނަކުން ރޭގަނޑު 11 އަށް ކަމަށް ވެސް އޭނާ ވިދާޅުވި އެވެ.
ޖަލީލް ވިދާޅުވީ މިއަހަރު ވެސް ރާއްޖޭގެ ކުންފުނިތަކާއި އިންޑިއާގެ ސިއްހީ ދާއިރާގައި ހަރަކާތްތެރިވާ ކުންފުނިތަކުން ބައިވެރިވާނެ ކަމަށެވެ.
އޭގެ އިތުރުން ސްރީލަންކާ އަދި މެދު އިރުމަތީގެ ކުންފުނިތަކުން ވެސް އެކްސްޕޯގައި ބައިވެރިވުމަށް ޝައުގުވެރިކަން ފާޅުކުރަމުންދާ ކަމަށް ވެސް ޖަލީލް ވިދާޅުވި އެވެ.
މޯލްޑިވްސް މެޑިކަލް އެންޑް ހެލްތު އެކްސްޕޯ އަކީ ރާއްޖޭގެ ސިއްހީ ދާއިރާ ކުރިއެރުވުމަށް ޓަކައި، އެދާއިރާއިން ދުނިޔޭގެ ފެންވަރުގެ ޓެކްނޮލޮޖީއާއި ހިދުމަތްތައް ދޭނެގޮތްތަކަށް ވިޔަފާރިތައް އަހުލުވެރިކުރުވުމާއި، އެފަދަ ހިދުމަތްތައް ލިބިގަނެވޭނެ ގޮތްތައް ރައްޔިތުންނާ ހަމަޔަށް ފޯރުކޮށްދިނުުގެ ގޮތުން ބާއްވަމުން އަންނަ އެކްސްޕޯއެކެވެ.
އެމްވީ މެޑިކަލްސްއިން ބުނީ ސިއްހީ ދާއިރާއާ ގުޅުންހުރި ކޮންމެ ހިދުމަތެއް ދޭ ފަރާތަކަށް ވެސް އެ އެކްސްޕޯގައި ބައިވެރިވެވޭނެ ކަމަށެވެ. އޭގެ ތެރޭގައި ހާއްސަކޮށް ހޮސްޕިޓަލްތަކާއި ކްލިނިކްތަކުގެ އިތުރުން މެޑިކަލް ލެބްތަކާއި، ފާމަސީގެ އިތުރުން ފިޓްނަސް ސެންޓަރުތަކާއި މެޑިކަލް އިންފޮމޭޝަން ޓެކްނޮލޮޖީ އަދި މެޑިކަލް ޓޫރިޒަމް ފެސިލިޓޭޓަރުން ފާހަގަކޮށްލެވެ އެވެ.