ދެހާސް ތޭވީސް ވަނަ އަހަރު އޮންނަ އިންޑިއަން އޯޝަން އައިލަންޑް ގޭމްސް (އައިއޯއައިޖީ) ރާއްޖޭގައި ބޭއްވުމަށް ރާއްޖެއިން ކުރާ ބިޑު ކާމިޔާބުވި ނަމަވެސް، އެ ގޭމްސްއަށް ބޭނުންވާ އިންފްރާސްޓްރަކްޗާ ގާއިމް ކުރަން ދައުލަތުގެ ބަޖެޓުން ބޮޑެތި ހަރަދުތަކެއް ސަރުކާރުން ނުކުރާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު އެހެން ވިދާޅުވީ، މި މަހުގެ 19 ވަނަ ދުވަހު މޮރިޝަސްގައި ފަށާ 10 ވަނަ އައިއޯއައިޖީ ގޭމްސްއަށް ރާއްޖެއިން ފޮނުވާ ކުޅުންތެރިންނާ ބައްދަލުކުރަން ރައީސް އޮފީހުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ، 2023 ވަނަ އަހަރުގެ އައިއޯއައިޖީ ރާއްޖޭގައި ބޭއްވުމަށް ރާއްޖެއިން ކުރާ ބިޑަށް ބައެއް ގައުމުތަކުގެ ތާއީދު ލިބިފައިވާ ކަމަށެވެ.
އެމަނިކުފާނު ވިދާޅުވީ، އެ ބިޑު ކާމިޔާބު ވެއްޖެ ނަމަ އެ މުބާރާތް ބާއްވަން ބޭނުންވާ ސްޓޭޑިއަމްތަކާއި އިންފްރާސްޓްރަކްޗާ ގާއިމް ކުރާނީ ކިހިނެއްތޯ ބައެއް ފަރާތްތަކުގެ ހިތްތަކުގައި ސުވާލު އުފެދިދާނެ ކަމަށެވެ. އެމަނިކުފާނު ގަބޫލު ކުރައްވާ ގޮތުގައި، ސަރުކާރުގެ ވައުދުތައް ފުއްދަމުން ގޮސް 2023 ވަނަ އަހަރާ ހަމައަށް ދެވޭ އިރު، އެފަދަ މުބާރާތެއް ބޭއްވޭނެ ވަރުގެ އިންފްރާސްޓްރަކްޗާ ހުންނާނީ ގާއިމްވެފައެވެ.
"ސީދާ އެ މުބާރާތަށް އަމާޒުކޮށްގެން ބޮޑެތި ހަރަދުތަކެއް ކުރަން ގަސްދެއް ނުކުރަން. އަޅުގަނޑުގެ ވިސްނުން ހުރީ ރާއްޖޭގެ ގައުމީ ތަރައްގީގެ މަޝްރޫއުތަކާ ގުޅުވައިގެން އެ މުބާރާތް ރާއްޖޭގައި ބޭއްވުން. އަޅުގަނޑުމެންގެ ވައުދުތައް ފުދިގެންދާ އިރު ގައުމަށް އަންނަ ކުރިއެރުމަކީ މި މުބާރާތަށް މަގު ކޮށައިދޭނެ ކަމެއް،" އެމަނިކުފާނު ވިދާޅުވިއެވެ.
އެ މުބާރާތަށް ބޮޑު ހަރަދެއް ދައުލަތުގެ ބަޖެޓުން ނުކުރިޔަސް ކުޅުންތެރިން ތަމްރީނު ކުރުމުގައި ސަރުކާރުގެ އެއްބާރުލުން ވަރަށް ބޮޑަށް ލިބިގެންދާނެ ކަމަށް ރައީސް ވިދާޅުވިއެވެ. އެގޮތުން ވަރަށް ދުރާލައި ރާއްޖޭގައި ބާއްވަން އުންމީދު ކުރާ ގޭމްސްއަށް ދިވެހި ކުޅުންތެރިން ތަމްރީނު ކުރަން ފަށާނެ ކަމަށް ރައީސް ވިދާޅުވިއެވެ. އެގޮތުން، މިފަހަރުގެ ގޭމްސް ނިމުމުން އެ ތަމްރީނުތަކުގެ މަސައްކަތް ފަށާނެ ކަމަށް ވިދާޅުވި އެވެ.
"އިރާދަ ކުރެއްވިއްޔާ އެއީ ހަތަރު އަހަރުގެ މުއްދަތަކަށް ހިނގާ ޕްރޮގްރާމަކަށް ވާނެ،" ރައީސް ވިދާޅުވިއެވެ.
ރައީސް ސޯލިހު ވިދާޅުވީ، ކުޅުންތެރިން ތަމްރީނު ކުރުމަށް ބޭނުންވާ ބަޖެޓު މިހާރު ވަނީ އެސޯސިއޭޝަންތަކާ ހަވާލުކޮށްފައި ކަމަށެވެ.
އެމަނިކުފާނު މިއަދު އިތުރަށް ވިދާޅުވީ، އައިއޯއައިޖީ ގޭމްސްއަކީ ރާއްޖެއަށް ވަރަށް މުހިންމު ގޭމްސްއެއް ކަމަށާއި، އެ ގޭމްސްއަށް ދިވެހި ކުޅުންތެރިން ދާން ވާނީ ވަރުގަދަ އަޒުމަކާ އެކު ކަމަށެވެ.
"އިންޑިއަން އޯޝަން އައިލެންޑް ގޭމްސްއަކީ ރާއްޖެއަށް ވަރަށް މުހިންމު މުބާރާތެއް. ރާއްޖެއަކީ އެ މުބާރާތުގެ ފައުންޑާ މެމްބަރު ގައުމަކަށް ވާތީ އަޅުގަނޑުމެން އެ މުބާރާތަށް ވާނީ ވަރަށް ވަރުގަދަ އަޒުމަކާއި ވަރަށް މަތިވެރި ރޫހެއްގައި. މިހާރު ތި ކުޅުންތެރިންނަކީވެސް މި ސަރަހައްދުގެ ގައުމުތަކަށް ދޫނުކުރާ ހުނަރުވެރި މޮޅު ކުޅުންތެރިން،" ރައީސް ވިދާޅުވިއެވެ.
ދިވެހި ކުޅުންތެރިން މުބާރާތަށް ގޮސް އުޅޭ އިރު، ރީތި އަހުލާގު ދެއްކުމަށް ވެސް ރައީސް އިލްތިމާސްކުރެއްވި އެވެ. އަދި ހުރިހާ ކުޅިވަރަކުންވެސް ދިވެހި އެތްލީޓުންނަށް ކާމިޔާބީއަށް އެދިވަޑައިގެންނެވިއެވެ.