މިދިޔަ އަހަރުގެ ފެބްރުއަރީ މަހުގެ އެއްވަނަ ދުވަހު، އޭރުގެ އިދިކޮޅު ސިޔާސީ ލީޑަރުންތަކެއް މިނިވަންކުރަން އަންގައި ސުޕްރީމް ކޯޓުން ނެރުނު އަމުރު ތަންފީޒު ނުކުރި މައްސަލަ ތަހުގީގުކުރަން ޖަލުތައް އޮޑިޓްކުރަން އެލުލަވާލި ކޮމިޝަނުން ހޯމް މިނިސްޓަރު އިމްރާން އަބްދުﷲއަށް ލަފާ ދީފިއެވެ.
އެކެއް ފެބްރުއަރީގައި ސުޕްރީމް ކޯޓުގެ ފަސް ފަނޑިޔާރުން ސޮއި ކުރައްވައި ނެރުއްވި އަމުރުގައި، ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި ހޯމް މިނިސްޓަރު އިމްރާން އަބްދުﷲ އާއި ކުރީގެ ނައިބު ރައީސް އަހްމަދު އަދީބާއި އޭރުގެ މަޖިލިސް މެމްބަރު އަހްމަދު ފާރިސް މައުމޫނާއި ކުރީގެ ޑިފެންސް މިނިސްޓަރު ކާނަލް (ރޓޑ) މުހައްމަދު ނާޒިމް ދޫކޮށްލަން އަންގާފައިވެއެވެ. ނަމަވެސް، އެ އަމުރު ތަންފީޒުނުކޮށް، ސުޕްރީމް ކޯޓުން ދެ ފަނޑިޔާރަކު ވަކިކޮށް، އެ ކޯޓުގައި އަމުރުގައި ސިޔާސީ ލީޑަރުން ވަކި ކުރަން އަންގާފައި އޮތް ބައި ބާތިލު ކުރީއެވެ.
މިއަދު އާންމު ކުރި ޖަލު އޮޑިޓް ރިޕޯޓުގައި ބުނެފައި ވަނީ، ސުޕްރީމް ކޯޓުން ނެރޭ އަމުރުތަކަކީ ތަންފީޒުކުރުން ލާޒިމު އަމުރުތަކަކަށް ވީ އިރު، އަދި އެފަދަ އަމުރުތައް ތަންފީޒުނުކުރުމަކީ ކުށަކަށް ވާއިރު، ދައުލަތުގެ ކަމާގުޅުންހުރި މުއައްސަސާތަކުން އެ އަމުރު ތަންފީޒުކުރަން އިއުތިރާޒްކޮށްފައިވާކަމާއި، އަދި އެގޮތަށް ކަންކުރުމުން، އެ އަމުރު ނެރުމުގެ ފަހުން ހިނގައިދިޔަ ކޮންމެ ދުވަހެއްގައި އެ އަމުރުގައި ފާހަގަކޮށްފައިވާ މީހުން ބައިތިއްބާފައިވަނީ ޣައިރު ގާނޫނީ ބަންދެއްގައި ކަމަށެވެ.
އަދި އެ އަމުރު ތަންފީޒްކުރުމަށް މޯލްޑިވްސް ޕޮލިސް ސާވިސްއާއި، މޯލްޑިވްސް ކަރެކްޝަނަލް ސާވިސްއިން ކަނޑައެޅިގެން ހުރަސްއަޅާފައިވާކަމަށް އެ ރިޕޯޓުގައި ބުނެފައިވެއެވެ. އޭގެ އިތުރުން، ޖަލުތަކުގައި ބަންދުކުރެވޭ މީހުންގެ ހައްގުތައް ކަށަވަރުކުރުމުގެ ޒިންމާ މަތިކުރެވިފައިވާ، ދައުލަތުގެ ބަންޑާރަ ނައިބާއި، އިންސްޕެކްޓާ އޮފް ކަރެކްޝަނަލް ސަރވިސްއާއި، ހިއުމަން ރައިޓްސް ކޮމިޝަނާއި، އަދި ނެޝަނަލް އިންޓެގްރިޓީ ކޮމިޝަނުންވެސް ޣައިރު ގާނޫނީ ބަންދު ބާތިލުކޮށް އެ ފަރާތްތަކަށް ސުޕްރީމް ކޯޓުގެ އަމުރުން ލިބިދިނުމަށް ކަނޑައެޅުނު އެއްވެސް ހައްގެެއް ކަށަވަރުކޮށްދިނުމަށް އެ މުއައްސަސާތަކުން އެއްވެސް މަސައްކަތެއް ކޮށްދީފައި ނުވާކަން ބަންދުގައި ހުރި ފަރާތްތަކުންވެސް ފާހަގަކޮށްފައިވާ ކަމަށެވެ.
އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން އެއްވެސް އެއްޗެއް ބުނެފައި ނުވާކަމާއި، އެ ކޮމިޝަނަށް ގާނޫނެއް ލިބިދީފައިވާ އެއްވެސް ބާރެއްގެ ބޭނުންކޮށްގެން ހައްގުތައް ގެއްލުނު އެއްވެސް މީހެއްގެ ހައްގު ހޯދައިދިނުމަށް މަސައްކަތް ކޮށްފައިނުވާކަން ކޮމިޝަނުން ފާހަގަކޮށްފައިވެއެވެ.
"މީގެ އިތުރުން ކުއްލި ނުރައްކަލުގެ ހާލަތުގައި ފުލުހުން ހައްޔަރުކުރި މީހުންނާއި މޯލްޑިވްސް ނޭޝަނަލް ޑިފެންސް ފޯސްއިން ފޮރުވާފައި ބޭތިއްބި ފުލުހުންގެ އާއިލާތަކުން އަނިޔާގެ މައްސަލަތައް އެޗްއާރްސީއެމްއަށް ހުށަހެޅުމުންވެސް އެ މައްސަލަތަކަށް ފަރުވާ ކުޑަކޮށް، މަދު އާއިލާއަކަށް ނޫނީ އެހީތެރިކަން ނުދޭކަމަށް އަނިޔާ ލިބުނު މީހުންނާއި އެމީހުންގެ އާއިލާތަކުން ކޮމިޝަނަށް މައުލޫމާތު ދީފައިވާކަން ފާހަގަކުރަމެވެ،"
ޖަލު އޮޑިޓް ރިޕޯޓުގައި މިނިސްޓަރަށް ލަފާ ދީފައި ވަނީ އެ ކަންތައްތައް ރިޕޯޓު ހުށަހެޅޭތާ ހަތް ދުވަހުގެ ތެރޭގައި ބަލައިދިނުމަށް ތަހުގީގީ މުއައްސަސާތަކަށް ހުށަހަޅައި ތަހުގީގުކުރުމަށެވެ.