އުރީދޫ އިން މި އަހަރުގެ ރޯދަ މަހަށް ވައިބާ "ބަންގި ޗެނަލް" އާއި އޮންލައިން ސިޔަރަތު ތައާރަފް ކޮށްފި އެވެ.
މިއަދު އުރީދޫގައި ބޭއްވި ރަސްމިއްޔާތުގައި ވާހަކަ ދައްކަމުން އެ ކުންފުނީގެ އެސިސްޓެންޓް މެނޭޖަރު އަހުމަދު ނުއުމާން ވިދާޅުވީ، މި ފަހަރު ތައާރަފް ކުރި ހިދުމަތަތްތަކުގެ ތެރެއިން އެންމެ ތަފާތު އެއްކަމަކީ އުރީދޫ އިން ވައިބާއާ ގުޅިގެން "ވައިބާ ބަންގި" ތައާރަފް ކުރުން ކަމުގަ އެވެ.
ނުއުމާން ވިދާޅުވީ އެ ޕޭޖުން ނަމާދު ވަގުތުތައް ބަލާލައި ނަމާދު ވަގުތު ޖެހުމުން ނޮޓިފިކޭޝަން ލިބިގެން ދާނެ ކަމުގަ އެވެ. އަދި ގިބުލަ ބަލާލުމާއި ޒަކާތް ހިސާބު ކުރުމާއި ހެނދުނާއި ހަވީރުގެ ދުއާތައް ވެސް މި ޕޭޖުން ފެންނާނެ ކަމުގަ އެވެ.
މީގެ އިތުރުން އުރީދޫ އިން ވަނީ މި ރޯދަ މަހު ފަސޭހައިން ސިޔަރަތު އަޑު އަހާލެވޭނެ ގޮތް ވެސް ތައާރަފް ކޮށްފަ އެވެ.
އުރީދޫގެ ކަސްޓަމަރުންނަށް ލަވަފޮށި އެޕް މެދުވެރިކޮށް ކޮންމެ ތަނެއްގައި، ކޮންމެ ވަގުތެއްގައި ހުރެގެން ވެސް ފޯނުން ސިޔަރަތު އަޑު އަހާލެވޭނެ ކަމަށް ނުއުމާން ވަނީ ވިދާޅުވެފަ އެވެ.
ރޯދަ މަހަށް ހާއްސަކޮށް ކޮންމެ އަހަރު ވެސް އުރީދޫ އިން ނެރޭ ވީޑިއޯ މި އަހަރު ބިނާކޮށްފައި ވަނީ ރޯދަ މަހު އާއިލާ އާއި ރައްޓެހިންނާ ގުޅުން ބަދަހިކޮށް، ގާތްތިމާގެ ގުޅުންތައް އަލުން އާލާކުރުމުގެ މުހިއްމުކަމުގެ މައްޗަށެވެ.