ލަންޑަން (މާޗް 13): އިނގިރޭސިވިލާތް ޔޫރަޕިއަން ޔޫނިއަންއިން ވަކިވުމާ ބެހޭ ގޮތުން ބޮޑުވަޒީރު ތެރީސާ މޭ އެކުލަވާލެއްވި އެއްބަސްވުމާ ދެކޮޅަށް އެގައުމުގެ ޕާލިމެންޓުން އަނެއްކާވެސް ވޯޓު ދީފި އެވެ.
އިނގިރޭސި ޕާލިމެންޓުގެ 242 މެމްބަރުން އެ އެއްބަސްވުމަށް ތާއީދު ކުރެއްވި އިރު 391 މެމްބަރުން ވަނީ އެއްބަސްވުމާ ދެކޮޅަށް ވޯޓު ދެއްވާފަ އެވެ. މިދިޔަ ޖެނުއަރީ މަހު މޭ ޕާލިމެންޓަށް ހުށަހެޅުއްވި އެއްބަސްވުމަށް 202 މެމްބަރުން ތާއިދު ކުރެއްވި އިރު އެއާ ދެކޮޅަށް 432 މެމްބަރުން ވޯޓު ދެއްވި އެވެ. އަދި އެއީ އެގައުމުގެ ތާރީހުގައިވެސް ޕާލިމެންޓުގައި ސަރުކާރަށް ލިބުނު އެންމެ ބޮޑު ނާކާމިޔާބީ އެވެ.
އިއްޔެގެ ވޯޓު ބާއްވާފައި ވަނީ މޭ، ޔޫރަޕިއަން ކޮމިޝަންގެ ރައީސް ޖޯން ކްލޯޑް ޔަންކާއާ ބައްދަލު ކުރެއްވުމަށް ފަހު ބްރެގްޒިޓް އެއްބަސްވުމަށް ބަދަލުތަކެއް ގެންނެވި ފަހުންނެވެ.
އެ އެއްބަސްވުމާ ބެހޭ ގޮތުން އެންމެ ބޮޑަށް ދެބަސްވުން އުފެދިފައި ވަނީ އީޔޫއާ އެކު ހަދާފައިވާ ކަސްޓަމްސް އެއްބަސްވުމަކާ ގުޅިގެންނެވެ. އެއެއްބަސްވުމުގައި ވަނީ ނޮދަން އަޔަލޭންޑާއި ރިޕަބްލިކް އޮފް އަޔަލޭންޑުގެ ބޯޑަރުގައި އީޔޫގެ ޗެކް ޕޮއިންޓުތައް ބެހެއްޓުމުގެ ބަދަލުގައި، ޔޫކޭގެ އެހެން ސަރަހައްދުތަކުން ނޮދަން އަޔަލޭންޑަށް ފޮނުވާ އުފެއްދުންތައް އީޔޫގެ ހަމަތަކަށް ފެތޭތޯ ބަލަން ނިންމާފައެވެ.
ނަމަވެސް އެ އެއްބަސްވުމާ ދެކޮޅު ހަދާ މެމްބަރުން ވަނީ އޭގެ ސަބަބުން ނޮދަން އަޔަލޭންޑާއި ޔޫކޭގެ އެހެން ސަރަހައްދުތަކާ ތަފާތު ކުރެވޭ ކަމަށާއި އޭގެ ސަބަބުން އިނގިރޭސިވިލާތް އީޔޫއިން ވަކިވި ނަމަވެސް، އެގައުމުން އީޔޫގެ ގަވާއިދުތަކަށް ތަބާވާން ޖެހޭނެ ކަމަށް ވިދާޅުވެފައެވެ.
އިނގިރޭސިވިލާތް އީޔޫއިން ވަކިވުމާ ބެހޭ ގޮތުން ފެންނަ ނުފެންނަ ވޯޓެއް ނެގީ 29 މާޗް 2017ގައެވެ. އެވޯޓުގައި ބައިވެރިވި މީހުންގެ ތެރެއިން 51.9 ޕަސެންޓު މީހުން ވޯޓު ދިނީ އީޔޫއިން ވަކިވާށެވެ.