އަބޫދާބީގައި ކުރިޔަށް ދާ ބައިނަލްއަގުވާމީ ދިފާއީ މަހާސިންތާއެއްގައި ރާއްޖޭގެ ދިފާއީ ވަޒީރު މާރިޔާ އަހުމަދު ދީދީ ބައިވެރިވެވަޑައިގެންފިއެވެ.
މާރިޔާ އިއްޔެ އެ މަހާސިންތާގައި ބައިވެރިވުމަށްފަހު ކުރެއްވި ޓުވީޓެއްގައި ވިދާޅުވީ އެ މަހާސިންތާގައި ދުނިޔޭގެ އެކި ގައުމުތަކުގެ މާހިރުން ބައިވެރިވި ކަމަށާއި އަދި އެ މަހާސިންތާއިން ޝައުގުވެރި ގިނަ ކަންތައްތަކެއް ފެނިގެން ދިޔަ ކަމަށެވެ.
މާރިޔާ ދާދި ފަހުން ވަނީ އިންޑިއާއަށް ރަސްމީ ދަތުުރެއް ކުރައްވައި އިންޑިއާގެ ދިފާއީ ވަޒީރު ނިރަމަލާ ސިތަރަމަންއާ ވަނީ ބައްދަލުކުރައްވައިފަ އެވެ.
At the IDEC Conference in Abu Dhabi yesterday. The Conference had many expert contributors from the world over & many interesting perspectives were put forward by the distinguished panelists. pic.twitter.com/utpvfr9Xm3
— Mariya Didi ???? (@MariyaDidi) February 17, 2019
އެ ބައްދަލުވުމަށް ފަހު މާރިޔާ ވިދާޅުވީ އެ ބައްދަލުވުމުގައި ރާއްޖޭގެ ކަނޑުގެ ސަރަހައްދުގައި ގަވައިދާ ހިލާފަށް މަސްވެރިކަން ކުރާ ފަރާތްތައް ހުއްޓުވައި މަސްތުވާތަކެތި އެތެރެކުރުން ހުއްޓުވުމުގެ ގޮތުން ދެ ގައުމުގެ ދެމެދުގައި އަސްކަރީ ގުޅުން ބަދަހިކުރުމަށް މަޝްވަރާ ކުރެވުނު ކަމަށެވެ.
އެ ދަތުރަށްފަހު އިންޑިއާ އިން ރާއްޖޭގައި ގާއިމްކުރަން އުޅޭ ކޯސްޓަލް ސަވައިލަންސް ރާޑާ ސިސްޓަމް (ސީއެސްއާރުއެސް) ހަރުކުރުމުގެ މަސައްކަތް ވަނީ ފަށައިފައެވެ.
އިންޑިއާއިން މިހާރު ވެސް ރާއްޖޭގައި އަސްކަރީ ދެ ހެލިކޮޕްޓަރު ބޭނުންކުރަމުންދާތީވެ، އެކަމަށް ދަނީ ވަރަށް ބޮޑަށް ފާޑުކިޔުންތައް އަމާޒުވަމުންނެވެ. އެކަމަށް ރައްދު ދެއްވައި މާރިޔާ ކުރިން ވިދާޅުވީ އެ ހެލިކޮޕްޓަރަކީ އިންޑިއާއިން ރާއްޖެއަށް ދިން ހަދިޔާއެއް ކަމަށެވެ. އަދި ހަދިޔާއެއް އަނބުރާ ފޮނުވާލުމަކީ ރާއްޖޭގެ ސަގާފަތެއް ނޫން ކަމަށް ވެސް މާރިޔާ ވިދާޅުވެފައިވެ އެވެ.
އެ ދެ ހެލިކޮޕްޓަރު އޮޕަރޭޓް ކުރަނީ އިންޑިއާއިންނެވެ. އެކަމަކު ފުރަތަމަ އެއްބަސްވީ އަހަރު ދުވަހުގެ ތެރޭގައި ދިވެހިން ތަމްރީންކޮށް ދިވެހިންނާ ދެ ހެލިކޮޕްޓަރު ހަވާލު ކުރުމަށެވެ. ނަމަވެސް އެކަމެއް އިންޑިއާއަކުން ނުކުރެ އެވެ.
އެ ހެލިކޮޕްޓަރުތަކުގެ ހަރަކާތްތަކަކީ އިންޑިޔާގެ ކޯސްޓްގާޑުގެ ރަސްމީ ހަރަކާތެއްގެ ގޮތުގައި އެ ގައުމުގައި ދަނީ ތަފްސީލުކޮށް ރިޕޯޓު ކުރަމުންނެވެ.