ލަންޑަން (ޑިސެމްބަރު 12): އިނގިރޭސި ބޮޑުވަޒީރު ތެރީސާ މޭގެ އިތުބާރު ނެތް ކަމުގެ ވޯޓެއް، ވެރިކަން ކުރާ ކޮންޒަވޭޓިވް ޕާޓީން މިއަދު ނަގަން ނިންމައިފި އެވެ.
ރިޕޯޓުތަކުގައިވާ ގޮތުން މޭގެ އިތުބާރު ނެތް ކަމުގެ ވޯޓެއް ނެގުމަށް އެދި ކޮންޒަވޭޓިވް ޕާޓީގެ 48 މަޖިލިސް މެމްބަރުން ވަނީ ޕާޓީގެ ޕާލިމެންޓަރީ ގުރޫޕު، "1992 ކޮމިޓީ"އަށް ސިޓީ ހުށަހަޅާފަ އެވެ.
1992 ކޮމިޓީގެ ޗެއާމަން ގްރަހަމް ބްރޭޑީ ވިދާޅުވި ގޮތުގައި މޭގެ އިތުބާރު ނެތް ކަމުގެ ވޯޓެއް ނަގަން ބޭނުންވާ މިންވަރަށް ސިޓީ ވަނީ ކޮމިޓީއަށް ލިބިފަ އެވެ. އަދި އެވޯޓު މިއަދު 18:00 އާއި 20:00އާ ދޭތެރޭގެ ވަގުތެއްގައި ނަގާނެ އެވެ.
މޭގެ އިތުބާރު ނެތް ކަމަށް ކޮންޒަވޭޓިވް މެމްބަރުންގެ ދެބައިކުޅަ އެއްބަޔަށް ވުރެ ގިނަ މެމްބަރުން ވޯޓު ދީފި ނަމަ، އޭނާ ޕާޓީގެ ލީޑަރު ކަމުންނާއި ބޮޑުވަޒީރު ކަމުން ދުރުކުރެވޭނެ އެވެ. އަދި އެމަގާމަށް އިތުރު ބޭފުޅަކު ގެނައުމަށް ވޯޓަށް އަހާނެ އެވެ.
މޭ ބޮޑުވަޒީރު ކަމަށް ވަޑައިގެންނެވީ 2016 ވަނަ އަހަރު، އިނގިރޭސިވިލާތް ޔޫރަޕިއަން ޔޫނިއިން ވަކިވުމަށް ފެންނަ ނުފެންނަ ވޯޓެއް ނެގި ފަހުންނެވެ. އެވޯޓުގައި އީޔޫއިން ވަކިވާން ފާސްވުމުން، އޭރުގެ ބޮޑުވަޒީރު ޑޭވިޑް ކެމެރަން އިސްތިއުފާ ދެއްވި އެވެ.
އީޔޫ އިން ވަކިވުމަށް މޭ ހައްދަވާފައިވާ އެއްބަސްވުމާ ބެހޭ ގޮތުން ގިނަ އަދަދެއްގެ މަޖިލިސް މެމްބަރުން ވަނީ ނުރުހުން ފާޅުކޮށްފަ އެވެ. އަދި އެއެއްބަސްވުމަށް ރުހުން ހޯދުމަށް އިއްޔެ މަޖިލީހުގައި ވޯޓެއް ނަގަން އޮތް ނަމަވެސް، މޭ ވަނީ އެވޯޓު ފަސްކޮށްފަ އެވެ. އޭގެ ސަބަބުން ގިނަ އަދަދެއްގެ މެމްބަރުން ވަނީ މޭ މަގާމުން ދުރުކުރުމަށް ގޮވާލައިފަ އެވެ.