މިއަދު އިލެކްޝަން ކޮމިޝަނުން އަލަށް އުފެއްދެމުމަށް ހުއްދަ ދިން މޯލްޑިވްސް ތާޑްވޭ ޑިމޮކްރެޓްސް އަށް ކުރީގެ ނައިބު ރައީސް އަހްމަދު އަދީބު އަބްދުލް ޣަފޫރު ސޮއި ކުރައްވައިފިއެވެ.
ވިޔާފާރިވެރިންގެ ޖަމިއްޔާގެ ރައީސް އިސްމާއިލް އާސިފް އިސްވެ ހުންންވައިގެން އުފައްދަވާ މޯލްޑިވްސް ތާޑްވޭ ޑިމޮކްރެޓްސް އަށް ހުއްދަ ދީފައިވާކަމަށް އިލެކްޝަން ކޮމިޝަނުން މިއަދު ވަނީ ބުނެފައެވެ.
އަދީބުގެ އަނބިކަނބަލުން މަރިޔަމް ނަޝްވާ "ސަން" އަށް ވިދާޅުވީ އަދީބު އެ ޕާޓީ އަށް ސޮއި ކުރެއްވީ މިއަދު ހަވީރުގެ ވަގުތެއްގައި ކަމަށެވެ. މިކަމާ ގުޅޭގޮތުން އިތުރު ތަފްސީލެއް ނަޝްވާ ނުދެއްވައެވެ.
ޓުއަރިޒަމް މިނިސްޓަރު ކަންވެސް ކުރެއްވި އަދީބު، މިނިސްޓަރުކަމަށް ވަޑައިގަތުމުގެ ކުރިން ހުންނެވީ ވިޔަފާރިވެރިންގެ ޖަމިއްޔާގެ ރައީސް އަކަަށެވެ. އޭރު އެ ޖަމިއްޔާގެ ނައިބު ރައީސް އަކީ އިސްމާއިލް އާސިފެވެ.
އެމްއެމްޕީއާރުސީގެ ކޮރަޕްޝަނާއި ރިޔާސީ ލޯންޗުކޮޅުގައި އެއްޗެއް ގޮއްވާލި މައްސަލާގައި ދައުލަތުން ކުރި ތިން ދައުވާއެއް ސާބިތުވެ، 33 އަހަރުގެ ޖަލު ހުކުމްތަކެއް ތަންފީޒު ކުރައްވަމުން ގެންދަވަނިކޮށް މިދިޔަ އަންގާރަ ދުވަހު، ކަރެކްޝަންސް އިން ވަނީ އަދީބް ގޭ ބަންދަށް ބަދަލުކޮށްފައެވެ.
އަދީބުގެ ސިއްހީ ހާލުކޮޅު ގޯސްވެ ދާދި ފަހުން ވަނީ އެމަޖެންސީގައި އައިޖީއެމްއެޗަށް ގެނެސް އޮޕްރޭޝަނެއް ވެސް ކޮށްފަ އެވެ. އެ އޮޕަރޭޝަނަކީ އަދީބުގެ ކިޑްނީގައި ހުރި ހިލައެއް މުގުރާލުމަށް ކުރި އޮޕަރޭޝަނެކެވެ.