ރާއްޖޭގައި އިންޓަނެޓުގެ ހިދުމަތް ފޯރުކޮށްދޭ ރާއްޖެ އޮންލައިން (އާރްއޯއެލް) އިން އިންޓަނެޓުގެ ހިދުމަތް ފޯރުކޮށްދިނުމަށް ކަނޑުގެ އަޑިން އަޅާފައިވާ ސަބްމެރިން ކޭބަލް ބުރިވެ ހިދުމަތަށް ބުރޫ އަރައިފިއެވެ.
އާރްއޯއެލްއިން މިއަދު ނެރުނު ބަޔާނެއްގައި ބުނީ އެ ކުންފުނީގެ އިންޓަނެޓުގެ ހިދުމަތް ހޯދާ ކަސްޓަމަރުންނަށް ހިދުމަތް ލިބުމުގައި ދަތިތައް ކުރިމަތިވެދާނެ ކަމަށެވެ. މި ދަތިތައް ކުރިމަތިވަނީ އިންޑިއާގެ ޓްރެވިންޑްރަމް ކައިރިން ސަބްމެރިން ކޭބަލް ބުރިވެފައިވާތީ ކަމަށް އެ ކުންފުނިން ބުނެއެވެ.
މައްސަލަ ހައްލު ކުރުމަށް 72 ގަޑިއިރު ވަރު ނަގާނެ ކަމަށް އާރްއޯއެލް އިން ބުނެއެވެ.
"އިންޓަނެޝަނަލް ކެރިއާ ޕާޓްނަރުންނާއެކު ކޭބަލްގެ މައްސަލަ ހައްލު ކުރުމަށް މިދަނީ މަސައްކަތް ކުރަމުން، ކަސްޓަމަރުންނަށް ދިމާވެދާނެ ދަތިތަކަށް މައާފަށް އެދެން،" އާރްއޯއެލްގެ ހެޑް އޮފް ކަސްޓަމާ ސާވިސަސް އައިމިނަތު ސަނީތާ ވިދާޅުވިއެވެ.
ވީހާވެސް އަވަހަކަށް މައްސަލަ ހައްލުކޮށް އަލުން ހިދުމަތް ދިނުމަށް މަސައްކަތް ކުރަމުންދާކަމަށް އޭނާ ވިދާޅުވިއެވެ.