މި އަހަރު އިންޑޮނޭޝިއާގައި ބާއްވާ 18 ވަނަ އޭޝިއަން ގޭމްސްގައި ބައިވެރިވުމަށް ރާއްޖޭގެ ބެޑްމިންޓަން ޓީމް ރޭ އެ ގައުމަށް ފުރައިިފި އެވެ.
އޭޝިއަން ގޭމްސްއަށް ހޮވާފައިވާ ރާއްޖޭގެ ބެޑްމިންޓަން ޓީމުގައި ހިމެނެނީ ހަތަރު އަންހެން ކުޅުންތެރިންނާއި ހަތަރު ފިރިހެން ކުޅުންތެރިންނެވެ.
ބެޑްމިންޓަންގައި ރާއްޖެ ތަމްސީލު ކުރާ ފިރިހެން ކުޅުންތެރިންނަކީ، މުހައްމަދު އަޖްފާން ރަޝީދު، އަހްމަދު ތޯއިފް މުހައްމަދު، މުހައްމަދު ސާރިމް އަދި ހުސެއިން ޒަޔާން ޝަހީދު ޒަކީ އެވެ.
ރާއްޖެ ތަމްސީލު ކުރާ އަންހެން ކުޅުންތެރިންނަކީ ފާތިމަތު ނަބާހާ އަބްދުލްރައްޒާގު، އައިމިނަތު ނަބީހާ އަބްދުލްރައްޒާގު، އައިމިނަތު ޝަހުރުނާޒް އަދި ނީލާ އަހްމަދު ނަޖީބު އެވެ.
އޭޝިއަން ގޭމްސްގައި ރާއްޖޭގެ ބެޑްމިންޓަން ޓީމުން މެންސް ސިންގަލް، ވިމެންސް ސިންގަލް، މެންސް ޑަބަލް، ވިމެންސް ޑަބަލް، މިކްސްޑް ދަބަލް އަދި ޓީމް އިވެންޓުތަކުގައި ބައިވެރިވާނެ އެވެ.
ދިވެހި ކުޅުންތެރިން ބައިވެރިވާ އިވެންޓުތައް އޮންނާނީ މި މަހުގެ 19 ވަނަ ދުވަހުން ފެށިގެން 28 ވަނަ ދުވަހާ ހަމައަށެވެ.
އޭޝިއަން ގޭމްސް ކުރިއަށް ދާނީ އިންޑޮނޭޝިއާގެ ޖަކާޓާ އަދި ޕަލެމްބަންގައި މި މަހުގެ 18 ވަނަ ދުވަހުން ފެށިގެން ސެޕްޓޭމްބަރު މަހުގެ ދެ ވަނަ ދުވަހުގެ ނިޔަލަށެވެ.