މެންޗެސްޓާ ޔުނައިޓެޑަށް ކުޅޭ ފްރާންސްގެ މިޑިފީލްޑަރު ޕޯލް ޕޮގްބާއަށް ވުރެ ލާޒިއޯގެ ސާގޭ މިލިންކޮވިޗް-ސަވިޗްގެ އަގުބޮޑުވާނެ ކަމަށް އެ ކްލަބުގެ ރައީސް ކްލޯޑިއޯ ލޮޓީޓޯ ވިދާޅުވެއްޖެ އެވެ.
އިޓަލީގެ ނޫހަކަށް ދެއްވި އިންޓަވިއުއެއްގައި ލޮޓީޓޯ ވިދާޅުވީ އުމުރުން 23 އަހަރުގެ މިލިންކޮވިޗް-ސަވިޗް އަކީ މިހާރު ދުނިޔޭގައި ހުރި އެންމެ މޮޅު ޒުވާން ކުޅުންތެރިޔާ ކަމަށެވެ. އަދި އޭނާ މުސްތަބުލަގައި އިތުރަށް ކުރިއަރައިދާނެ ކަމަށް ލޮޓީޓޯ ވިދާޅުވި އެވެ.
އޭނާ ވިދާޅުވީ ޕޮގްބާ ގެންނަން މެންޗެސްޓާ ޔުނައިޓެޑުން ޔުވެންޓަސްއަށް 105 މިލިއަން ޔޫރޯ ދައްކާފައިވާއިރު މިލިންކޮވިޗް-ސަވިޗް ގަންނަން ބޭނުންވާ ނަމަ އެއަށް ވުރެ ބޮޑު އަދަދެއް ދައްކަން ޖެހޭނެ ކަމަށެވެ.
"އަހަރެން އޭނާ [މިލިންކޮވިޗް-ސަވިޗް] ވިއްކަން މަސައްކަތެއް ނުކުރަން، އެކަމަކު އޭނާގެ އަގު އަހަރެން ގާތުގައި އަހައިފި ނަމަ އަހަރެން ހަނދާންވާ ގޮތުގައި މިދިޔަ އަހަރުގެ އޮގަސްޓު މަހުގެ 29 ވަނަ ދުވަހު އޭނާ ގަންނަން 110 މިލިއަން ޔޫރޯގެ އޮފާއެއް އައުމުން އަހަރުން ދެކޮޅު ހެދިން." ލޮޓީޓޯ ވިދާޅުވިއެވެ.
ޕޮގްބާއަށް ވުރެ މިލިންކޮވިޗް-ސަވިޗް އަގުބޮޑުވާނެ ކަމަށް ލޮޓީޓޯ ވިދާޅުވި ނަމަވެސް އޭނާ ބުނީ މިދިޔަ އަހަރުގެ ފަހުން އޭނާ ގަންނަން އޮފާއެއް އައިސްފައި ނުވާ ކަމަށެވެ.
ބޭރުގެ ރިޕޯޓުތައް ބުނާ ގޮތުން ރިއާލް މެޑްރިޑް، މެންޗެސްޓާ ޔުނައިޓެޑް، އޭސީ މިލާން އަދި ޔުވެންޓަސް ފަދަ ބޮޑެތި ކްލަބުތަކުން މިލިންކޮވިޗް-ސަވިޗް ހޯދުމަށް ޝައުގުވެރިކަން ފާޅުކުރެއެވެ.
ސެރީ އޭގެ ފަސްވަނައިގައި މިދިޔަ ސީޒަން ލާޒިއޯ ނިންމާލި އިރު މިލިންކޮވިޗް-ސަވިޗް ވަނީ އެ ކްލަބަށް 35 މެޗު ކުޅެދީ 12 ގޯލު ޖަހައިދީފައެވެ. ސީޒަނަށް ފަހު އޭނާ ވަނީ ވޯލްޑްކަޕުގައި ސާބިއާ ތަމްސީލުކޮށް މޮޅު ކުޅުމެއް ދައްކާފައެވެ.