ސިންގަޕޫރުގެ އެންމެ ބޮޑު ހެލްތްކެއާ އިންސްޓިޓިއުޝަން "ސިންގްހެލްތް" އިން ފަރުވާހޯދި 1.5 މިލިއަން މީހުންގެ މައުލޫމާތު ފޭރިގަނެފިއެވެ.
ހެކަރުންގެ ހަމަލާއެއް އަމާޒުވެ ސިންގްހެލްތުގެ 1.5 މިލިއަން ޕޭޝަންޓުންގެ މައުލޫމާތުގެ އިތުރުން އިތުރު 160،000 މީހުންގެ ބޭސް ސިޓީގެ މައުލޫމާތުވެސް ވަނީ ފޭރިގަނެފައެވެ.
އެކަން ހާމަކޮށް ސިންގަޕޫރުގެ ސަރުކާރުން ބުނީ މިއީ "އާދައިގެ ހެކަރުންގެ ހަލަމާއެއް ނޫން" ކަމަށާއި މިއީ އެއަށްވުރެ ނުރައްކާތެރި ހަމަލާއެއް ކަމަށެވެ. ބަލިމީހުންގެ މައުލޫމާތު ފޭރިގަތް ބަޔަކު އަދި ހޯދިފައެއް ނުވެއެވެ.
"މިއީ ބަޔަކު ގަސްތުގައި ދުރާލާ ރާވައިގެން ދިން ހަމަލާއެއް" ސިންގަޕޫރުގެ ސަރުކާރުން ބުނެފައިވެއެވެ.
އެގައުމުގެ ބޮޑުވަޒީރު ލީ ގެ ފޭސްބުކް ޕޯސްޓެއްގައި ވިދާޅުވެފައިވަނީ ހެކަރުން ހޯދަން ބޭނުންވަނީ ކޮން މައުލޫމާތެއްކަން އެނގިވަޑައި ނުގަންނަވާ ކަމަށާއި ހީވާގޮތުގައި އެބަޔަކު ބޭނުންވެގެން އުޅެނީ ސަރުކާރު ބަދުނާމުވާނެކަހަލަ މައުލޫމާތެއް ހޯދަން ކަމަށެވެ.
ލީގެ ސިއްހީ މައުލޫމާތު ބޭނުންވެގެން މައުލޫމާތު ހެކް ކުރަން ނުޖެހޭނެ ކަމަށާއި ރައްޔިތުންނާ ގުޅުމެއްވަނަމަ އެމަނުކުފާނުގެ ސިއްހީ މައުލޫމާތު ހާމަކުރައްވާނެ ކަމަށްވެސް ލީ ވަނީ ވިދާޅުވެފައެވެ.
މައުލޫމާތު ހެކް ކުރުމުގެ ސަބަބުން އެއްވެސް މީހެއްގެ މައުލޫމާތަށް އުނި އިތުރެއް އައިސްފައި ނުވާ ކަމަށާއި ހަމައެކަނި ހެކަރުންނަށް ހޯދިފައުވަނީ އެމީހުންގެ ނަމާއި އައިޑީކާޑު ނަންބަރު ފަދަ މައުލޫމާތު ކަމަށް ސިންގަޕޫރު ސަރުކާރުން ބުނެއެވެ. އަދި އެއްވެސް މީހެއްގެ ސިއްހީ މައުލޫމަތު ހެކަރުންނަށް އަތުލައި ނުގަނެވޭ ކަމަށްވެސް ބުނެފައިވެއެވެ.