ރަޝިއާގެ ރައީސް ލެޑްމިއާ ޕޫޓިންއާއި އެމެރިކާގެ ރައީސް ޑޮނަލްޑް ޓްރަމްޕް މި މަހުގެ 16 ވަނަ ދުވަހު ސަމިޓެއް ބާއްވާ ގޮތަށް ހަމަޖެހިއްޖެއެވެ.
ފިންލެންޑުގެ ހެލްސިންކީގައި ބާއްވާ ހަތަރު ގަޑިއިރުގެ މި ބައްދަލުވުން ވެގެން ދާނީ، ޓްރަމްޕްއާއި ޕޫޓިން ބާއްވާ މިފަދަ ފުރަތަމަ ބައްދަލުވުމަށެވެ. އެހެން ނަމަވެސް މީގެ ކުރިން މި ދެ ރައީސުން ބައްދަލުވެފައިވެއެވެ.
އެގޮތުން، ފާއިތުވި ނޮވެމްބަރު މަހު ވިއެޓްނާމުގައި ބޭއްވި އޭޝިއާ-ޕެސެފިކް އިކޮނޮމިކް ކޯޕަރޭޝަން ސަމިޓުގައި މި ދެ ރައީސުން ވަނީ ބައްދަލުވެފައެވެ. އަދި މިދިޔަ އަހަރުގެ ޖުލައި މަހު ޖަރުމަނުވިލާތުގެ ހެމްބާގުގައި އޮތް ޖީ20 ސަމިޓުގައިވެސް ބައްދަލުވެފައި ވެއެވެ.
ހެލްސިންކީގައި ބާއްވާ ބައްދަލުކުރެއްވުމުގައި، ދެ ގައުމުގެ ދެމެދުގައި އުފެދިފައިވާ ދެބަސްވުންތަކާއި ބެހޭގޮތުން މަޝްވަރާ ކުރެވިގެންދާނެއެވެ. ބެލެވިފައިވާ ގޮތުގައި މި ބައްދަލުކުރެއްވުމުގައި، 2016 ވަނަ އަހަރު ބޭއްވި އެމެރިކާގެ ރިޔާސީ އިންތިހާބުގެ ނަތީޖާ އަނބުރާލަން ރަޝިއާއިން މަސައްކަތްކުރި ކަމަށް ކުރެވިފައިވާ ތުހުމަތުތަކާއި، ކްރައިމިއާ އެ ގައުމުގެ ބާރުގެ ދަށަށް ގެނައުމާއި، ސީރިއާގައި ހިނގަމުންދާ ހަނގުރާމައާއި، ނިއުކްލިއާ ހަތިޔާރު މަދުކުރުމާއި ބެހޭގޮތުން މަޝްވަރާ ކުރެވިގެންދާނެއެވެ.
ޕޫޓިންއާއި ޓްރަމްޕްގެ ގުޅުމާއި ގުޅިގެން ޓްރަމްޕްއަށް މީގެ ކުރިންވެސް ފާޑުކިޔުން އަމާޒުވެފައި ވެއެވެ. ޓްރަމްޕް ރައީސް ކަމަށް އިންތިހާބުވުމުގެ ކުރިން ޕޫޓިން އޭނާއަށް ތައުރީފުކޮށް ވާހަކަފުޅު ދައްކަވާފައިވެއެވެ. އަދި ޓްރަމްޕް ރައީސް ކަމަށް ގެނައުމަށް ރަޝިއާއިން އެމެރިކާގެ އިންތިހާބަށް ނުފޫޒުފޯރުވަން އުޅުނު ކަމަށް ވެސް ތުހުމަތު ކުރެވުނެވެ.
ޓްރަމްޕްއާއި ޕޫޓިން ބައްދަލުކުރައްވާ ގޮތަށް ހަމަޖެހިފައިވާއިރު، މި އަހަރުގެ ޖޫން މަހުގެ ތެރޭގައި އުތުރު ކޮރެއާގެ ލީޑަރު ކިމް ޖޮން އުންއާވެސް ޓްރަމްޕް ވަނީ ބައްދަލުކުރައްވާފައެވެ. މި ބައްދަލުކުރެއްވުން ވެގެން ދިޔައީ އެމެރިކާ އަދި އުތުރު ކޮރެއާގެ ރައީސުން ބައްދަލުވި ފުރަތަމަ ފަހަރަށެވެ.