ވިހި ވަނަ އެސޯސިއޭޝަން ޗެމްޕިއަންޝިޕް:
ފަނަ އަހަރުން މަތީގެ ފިރިހެން ޗެމްޕިއަންކަން މުންސިފް ހޯދިއިރު، އަންހެން ބައިން މުއިނާ

ވިހި ވަނަ ޓޭބަލް ޓެނިސް އެސޯސިއޭޝަން ޗެމްޕިއަންޝިޕުގެ 15 އަހަރުން މަތީގެ ފިރިހެން ސިންގަލްސް ޗެމްޕިއަންކަން މޫސާ މުންސިފް ހޯދައިފި އެވެ.

ކުޅިވަރު އެކުވެނީގެ ޓީޓީ ހޯލުގައި އިއްޔެ އޮތް ފައިނަލް މެޗްގައި ތަމޫހު އަހުމަދާ ބައްދަލުކޮށް ސިންގަލްސް ބައިގެ ޗެމްޕިއަންކަން މޫސާ މުންސިފް ހޯދީ، 4-3 ން މޮޅުވެގެން ނެވެ. އަދި މިބައިގެ އަންހެން ޗެމްޕިއަންކަން މުއިނާ މުޙައްމަދު ހޯދައިފައިވަނީ ފާތިމަތު ޖުމާނާ ނިމާލް އާއި ބައްދަލުކޮށް 4-2 ން މޮޅުވެގެންނެވެ.

މީގެއިތުރުން މުބާރާތުގައި އިއްޔެ ކުޅުނު 12 އަހަރުން ދަށުގެ އަންހެން ސިންގަލް ބައިގެ ފައިނަލް މެޗް ވެސް ވަނީ ކުޅެފައެވެ. އެ ބައިގެ ޗެމްޕިއަންކަން ހޯދީ ލައިސާ ފަތުހުﷲ އެވެ. ލައިސާ ޗެމްޕިއަންކަން ހޯދީ ފައިނަލްގައި އައިސަތު ރަފާ ނާޒިމާ އާއި ބައްދަލުކޮށް 3-2 އިން މެޗް ކާމިޔާބު ކޮށްގެންނެވެ.

އިއްޔެ ފައިނަލް މެޗްތަކަށްފަހު މުބާރާތުގެ ޗެމްޕިއަންކަން ހޯދި ކުޅުންތެރިންނަށް ވަނީ ހަދާނީ ލިޔުމާއި މެޑަލް ހަވާލްކޮށްފައެވެ. މުބާރާތް ނިންމުމުގެ ރަސްމިއްޔާތު ޝަރަފްވެރި ކޮށްދެވީ ވޮލީ ބޯޅަ އެސޯސިއޭޝަންގެ ރައީސް މުހައްމަދު ރިޔާޒެވެ.