ލަންޑަން (ޖުލައި 13): އިނގިރޭސިވިލާތުގެ ބޮޑުވަޒީރު ތެރީސާ މޭ އާއެކު އޮތީ 'ވަރަށް، ވަރަށް ވަރުގަދަ' ގުޅުމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އިނގިރޭސިވިލާތަށް ދެ ދުވަހުގެ ރަސްމީ ދަތުރުފުޅެއް ކުރައްވަމުން ގެންދަވާ ޓްރަމްޕް ވިދާޅުވި ގޮތުގައި ރޭ ބޮޑުވަޒީރު މޭއާ އެކު ބޭއްވި ފަރިއްކޮޅުގައި ދެބޭފުޅުން ވަނީ 'އެއް ގަޑި އިރު ނުވަތަ އެއް ގަޑި އިރާއި ތިރީސް މިނިޓު' ވަންދެން ވާހަކަ ދައްކަވާފައި އެވެ.
"އަޅުގަނޑަށް ލަފާ ކުރެވޭ ގޮތުގައި މީގެ ކުރިން އެއްވެސް އިރެއްގައި (މޭ އާއެކު އޮތް ގުޅުން) މިހާވަރަށް ރަނގަޅުވެފައެއް ނުވޭ،" ޓްރަމްޕް ވިދާޅުވި އެވެ.
އަދި އެބައްދަލުވުމުގައި އެދެ ބޭފުޅުންގެ ވަނީ އެމެރިކާއާ ގުޅިގެން އިނގިރޭސިވިލާތުން ޓެރަރިޒަމާ ދެކޮޅަށް ކުރަމުންދާ މަސައްކަތްތަކާ ބެހޭ ގޮތުން ވާހަކަ ދައްކަވާފައި ކަމަށް ޓްރަމްޕް ވިދާޅުވި އެވެ.
ޓްރަމްޕް އެފަދައިން ވިދާޅުވީ، އިނގިރޭސިވިލާތް ޔޫރަޕިއަން ޔޫނިއަން އިން ވަކިވުމަށް ބޮޑުވަޒީރު މޭ އެކުލަވާލެއްވި ޕްލޭނަށް ޓްރަމްޕް ފާޑު ވިދާޅުވެފައިވާ އިންޓަވިއުއެއް ޝާއިއު ކުރި ފަހުންނެވެ. އެއިންޓަވިއުއަކީ މިދިޔަ ހަފްތާގައި ބްރަސެލްސްގައި ބޭއްވި ނޭޓޯ ސަމިޓުގެ ތެރެއިން ޓްރަމްޕް ދެއްވި އިންޓަވިއުއެކެވެ.
އެމެރިކާގެ ރައީސާ ދެކޮޅަށް އިނގިރޭސިވިލާތުގައި ކުރާ މުޒާހަރާއެއްގައި، ޓްރަމްޕްގެ ސޫރަ ސިފަވާ ގޮތަށް ހަދާފައިވާ ފުއްޕާހަމެއް މައްޗަށް އަރުވާފައި -- ފޮޓޯ: ގެޓީ
އިނގިރޭސި ނޫހެއް ކަމަށްވާ ދަ ސަންއާ ވާހަކަ ދައްކަވަމުން ޓްރަމްޕް ވިދާޅުވި ގޮތުގައި އޭނާ ވަނީ އީޔޫއިން ވަކިވުމާ ބެހޭ ގޮތުން މޭއަށް ލަފާ ދެއްވާފައި އެވެ. ނަމަވެސް ބޮޑުވަޒީރު މޭ އެނަސޭހަތުގެ އަޑު އައްސަވާފައި ނުވެ އެވެ.
މިދިޔަ ހަފްތާ ތެރޭގައި މޭ ވަނީ އިނގިރޭސިވިލާތް އީޔޫއިން ވަކިވި ނަމަވެސް، އީޔޫއާ އެކު ވަރަށް ގާތް ވިޔަފާރީގެ ގުޅުންތައް ބާއްވާނެ ކަމަށް ވިދާޅުވެފައި އެވެ.
ނަމަވެސް ޓްރަމްޕް ވަނީ މޭގެ އެނިންމެވުމުގެ ސަބަބުން، އިނގިރެސިވިލާތާއި އެމެރިކާއާ ދެމެދު ވިޔަފާރީގެ އެއްބަސްވުމެއް ހެދުމުގެ ފުރުސަތު ވަރަށް ކުޑަވެފައިވާ ކަމަށް ވިދާޅުވެފައި އެވެ.
"(އިނގިރޭސިވިލާތުން) އެގޮތަށް ނިންމައިފި ނަމަ، އެގައުމާއި އެމެރިކާއާ ދެމެދު ވިޔަފާރީގެ އެއްބަސްވުމެއް ހެދޭނެ ކަމަށް ގަބޫލު ނުކުރެވޭ. އެއީ މިހާރުވެސް އީޔޫގެ ސަބަބުން އަޅުގަނޑުމެންނަށް އެތައް އުނދަގޫތަކެއް ކުރިމަތިވޭ،" ޓްރަމްޕް ދެއްވި އިންޓަވިއުގައި ވިދާޅުވި އެވެ.
މީގެ އިތުރުން ޓްރަމްޕް ވަނީ ކުރީގެ އިނގިރޭސި ފޮރިން ސެކްރެޓަރީ ބޯރިސް ޖޯންސަންއަށް ތައުރީފުކޮށްވެސް ވާހަކަ ދައްކަވާފައި އެވެ. އަދި ޖޯންސަންއަކީ ބޮޑުވަޒީރުގެ މަގާމު ވަރަށް ރަނގަޅަށް އަދާ ކުރެވޭނެ ބޭފުޅެއް ކަމަށް ގަބޫލުކުރައްވާ ކަމަށް ވިދާޅުވެފައި އެވެ.
މިދިޔަ ހަފްތާގައި ޖޯންސަން މަގާމުން އިސްތިއުފާ ދެއްވީ، އިނގިރޭސިވިލާތް އީޔޫއިން ވަކިވުމަށް އެކުލަވާލާފައިވާ ޕްލޭނާ ބެހޭ ގޮތުން ސަރުކާރާ ދެމެދު އުފެދުނު ދެބަސްވުންތަކާ ގުޅިގެންނެވެ.
ޓްރަމްޕްގެ ދަތުރުފުޅާ ދިމާކޮށް އިނގިރޭސިވިލާތުގެ އެކި ސަރަހައްދުތަކުގައި އެތައް ހާސް މީހުން ދަނީ މުޒާހަރާ ކުރަމުންނެވެ. އެގޮތުން ލަންޑަނުގައި ބާއްވާ މުޒާހަރާގައި ވަނީ ޓްރަމްޕްގެ ސޫރަ ސިފަވާ ގޮތަށް ހަދާފައިވާ ބޮޑު ފުއްޕާހަމަކަށް ހީލިއަމް އަޅައި، މައްޗަށް އަރުވާފައި އެވެ. (ބީބީސީ)