ކުރީގެ ރައީސް މައުމޫން އަބްދުލްގައްޔޫމް އުފައްދަވާ ސިޔާސީ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް )ޕީޕީއެމް( އުފެއްދުމަށް އަންނަ ހަފުތާ އިލެކްޝަންސް ކޮމިޝަނަށް ހުށަހަޅުއްވާނެ ކަމަށް އެ ޕާޓީން މިއަދު ބުނެފި އެވެ.
ޑީއާރްޕީން ވަކި ކޮށްފައިވާ އެޕާޓީގެ ކުރީގެ ޑެޕިއުޓީ ލީޑަރު އަދި ޕީޕީއެމް އުފެއްދުމުގައި އިސްކޮށްއުޅުއްވާ އުމަރު ނަސީރު މިއަދު ޕީޕީއެމްގެ ވަގުތީ އިދާރާގައި ނޫސްވެރިންނަށް މައުލޫމާތު ދެއްވަމުން ވިދާޅުވީ ސިޔާސީ ޕާޓީއެއް ރަޖިސްޓަރީ ކުރަން އިލެކްޝަންސް ކޮމިޝަނަށް ހުށަހަޅަންޖެހޭ ގާނޫނީ އަދަދަށް ސޮއި އަންނަ ހަފުތާގައި އިލެކްޝަނަށް ހުށަހަޅުއްވާނެ ކަމަށެވެ.
"އަޅުގަނޑުމެން ރަސްމީކޮށް ފޯމް ފުރަން ނުފެށިއަސް ވަރަށް ގިނަ ބަޔަކު އެދިގެން ސޮއިކުރަމުން މި އަންނަނީ. އުންމީދު މިކުރަނީ އަންނަ ހަފުތާގައި ސޮއި ހަމަކޮށް އިލެކްޝަނަށް ހުށަހެޅޭނެ ކަމަށް. ފުރަތަމަ ގާނޫނީ އަދަދަށް ހުށަހަޅާނީ. މިހާރު ވެސް ޕާޓީ އުފެއްދުމުގެ މަސައްކަތަށް އެދި ހުށަހެޅި ފޯމް ތަކުގެ ތެރެއިން ވެސް 698 ސޮއި އޮތީ ބަލައިގެންފައި. އެހެންވީމާ އަޅުގަނޑުމެން މިބަލާގޮތުން މިފަހަރު ވެސް ޕައިޕްލައިންގައި ފޯމް ހުންނާނެ،" އުމަރު ވިދާޅުވި އެވެ.
ސިޔާސީ ޕާޓީތަކުގެ ގަވާއިދުގެ 10 ވަނަ މާއްދާ ބުނާގޮތުން ސިޔާސީ ޕާޓީއެއް ރަޖިސްޓްރީ ކުރުމަށް މަދުވެގެން 3000 މީހުންގެ ސޮއި އިލެކްޝަންސް އަށް ހުށަހަޅަންޖެހެ އެވެ.
ޕީޕީއެމް އުފެއްދުމަށް ސޮއި ހޯދުމުގެ މަސައްކަތް މިދިޔަ ހަފުތާ ބަންދު ތެރޭގައި ފެށުމަށް ނިންމާފައި އޮތް ނަމަވެސް ހިރިޔާ ދަތުރުގެ ހިތާމަވެރި ހާދިސާއާ ގުޅިގެން އެކަން ވަނީ ފަސްކޮށްފަ އެވެ.
އުމަރު ވިދާޅުވީ ޕީޕީއެމްއަށް ސޮއި ކުރުމަށް "ސިޔާސީ މައިދާނުގެ އިސް ފަރާތްތަކުން" އެދޭތީ އެ ބޭފުޅުން ޕާޓީއަށް ވެއްދުމަށް "މަވެސް ޕީޕީއެމް"ގެ ނަމުގައި ހާއްސަ ކެމްޕޭނެއް މިރޭ ލޯންޗްކުރާނެ ކަމަށެވެ.
"ސިޔާސީ މައިދާނުގައި ތިއްބެވި އެހެން ޕާޓީތަކުގެ އިސް ބައެއް ފަރާތްތަކުން ސޮއި ކުރަން އެދެމުންދާތީ މި ކެމްޕޭން މިރޭ މި ފަށަނީ. މީގެ ތެރެއިން ސޮއި ހޯދުމަށް ޕީޕީއެމް ޕްރޮމޯޓް ކޮށް ހަރަކާތްތައް ހިންގޭނެ،" އުމަރު ވިދާޅުވި އެވެ.
"މަވެސް ޕީޕީއެމް" ކެމްޕޭން މިރޭ ފަށާއިރު ބޮޑުތަކުރުފާނު މަގުން އާޓިފިޝަލް ބީޗަށް ކުރިތިވާ ގޮތަށް ހުންނަ "ޑީއާރުޕީގެ މައި ޖަގަހަ"އިގެ ނަން ވެސް މިރޭ "މަވެސް ޕީޕީއެމް" އަށް ބަދަލުކުރުމުމަށް ވަނީ ނިންމާފަ އެވެ. އެގޮތުން އެ ޖަގަހައިގާ މިރޭ ހާއްސަ ރަސްމިއްޔާތެއް އޮންނާނެ ކަމަށް ވެސް އުމަރު ވިދާޅުވި އެވެ. އެކަން ޝަރަފުވެރިކޮށްދެއްވާނީ ސަރުކާރަށް ގިނަ ދުވަހު ހިދުމަތް ކުރައްވާފައިވާ އުމަރު ޒާހިރެވެ. އެ ރަސްމިއްޔާތަށް މައުމޫން ވަޑައިނުގެންނެވި ނަމަވެސް ރަސްމިއްޔާތުގެ ކޮންމެވެސް ހިސާބަކުން މައުމޫން ވަޑައިގަންނަވާނެ ކަމަށް އުމަރު ވިދާޅުވި އެވެ.
"މިރޭ އެހާރަޖަހާ އެހާކަންއިރު މައުމޫން، ޖަގަހައަށް ވަޑައިގަންނަވާނެ" އުމަރުވިދާޅުވި އެވެ.
އުމަރު ވިދާޅުވީ "މަވެސްޕީޕއެމް" ކެމްޕޭން މިރޭ ފެށިނަމަވެސް ރަސްމީކޮށް އެ ޕާޓީއަށް ސޮއިކުރަން ފެށުމަށް ހާއްސަ ޖަލްސާއެއް މާލޭގައި ވަރަށް އަވަހަށް ބާއްވާނެ ކަމަށެވެ. އަތޮޅުތަކުގެ ތެރޭގައިވެސް ސޮއި ކުރުމުގެ މަސައްކަތް މިހާރުވެސް ފަށާފައިވާ ކަމަށް އުމަރު ވިދާޅުވި އެވެ.
"އެ މަސައްކަތްތަކުގެ ދަށުން ޑީއާރުޕީގެ ޖަގަހަތަށް 'މަވެސް ޕީޕީއެމް' އަށް ބަދަލުވެގެން ދާނެ. މިހާރުވެސް ކޮލަމާފުށި، ގުރައިދޫ އަދި ނ.އަތޮޅުގައި ހުރި ޑީއާރުޕީގެ ޖަގަހަތަށް ޕީޕީއެމްގެ ޖަގަހަތަކަށް ބަދަލުވެއްޖެ. ވަރަށް ގިނަ ރައްޔިތުން ސޮއި ކުރުމަށް އެދެމުން އަންނަނީ. މިރޭ މި ހުޅުވޭ ޖަގަހައިގައި ވެސް އެ ކަންތައްތައް ކުރިއަށް ދާނެ. ދެން ޑީއާރް ޕީގައި ތިބޭނީ ތަސްމީނާއި އާއިލާގެ ބޭފުޅުންނާއި އެބޭފުޅާއާއި އެކު ވިޔަފާރި ކުރައްވާ ބޭފުޅުން. އެހެން ބަޔަކު ނުތިބޭނެ. އޮންނާނީ ހަމައެކަނި ތޮށިގަނޑު،" އުމަރު ވިދާޅުވި އެވެ.
date_range
އާދިއްތަ 22 ޑިސެމްބަރ 2024