ސްކޫލް ކުދިން ބައިވެރިކޮށްގެން މޫދުގައި ހިންގާ، ފަތަން ދަސްކޮށްދިނުމާއި ކުޅިވަރުގެ ހަރަކާތްތަކުގައި އަމަލުކުރަންވީ ގޮތުގެ ގަވައިދުގައިވާ ގޮތުން އުމުރުން 13 އަހަރާއި 19 އަހަރާ ދެމެދުގެ އުމުރުފުރާގެ ދަރިވަރުންނަށް ހިންގޭ ހަރަކާތްތަކުގައި މަދުވެގެން ކޮންމެ 10 ކުށްޖަކަށް ޓީޗަރަކާއި ބެލެނިވެރިއެއް ބައިވެރިވާން ވާނެ ކަމަށް ގަވައިދު ބުނެ އެވެ. އަދި ހަ އަހަރާއި 13 އަހަރުގެ އުމުރުފުރާގެ ދަރިވަރުންގެ މެދުގައި ހިންގާ މޫދު ހަރަކާތްތަކުގައި ކޮންމެ ފަސް ކުއްޖަކަށް ޓީޗަރަކާއި ބެލެނިވެރިޔަކު ބައިވެރިކުރަން ޖެހޭނެ ކަމަށް ވެސް އެ ގަވައިދުގައިވެ އެވެ.
ދެ ހާހުގެ އަހަރުތަކުގެ ކުރީ ކޮޅު ކަބް ދަތުރެއްގައި ފޭދޫ ފިނޮޅަށް ދަތުރުގޮސް އުޅެނިކޮށް، ކުއްޖަކު މަރުވުމާ ގުޅިގެން އާންމުކޮށްފައިވާ ސާކިއުލާއެއްގައި ބުނެފައި ވަނީ ކުދިން މޫދުގައި ހޭދަކުރާ ކޮންމެ ވަގުތެއްގައި ވެސް މަދުވެގެން ކޮންމެ ފަސް ކުއްޖަކަށް އެކަކު މޫދުގައި ދަރިވަރުންނާ އެކު ހުންނަން ވާނެ ކަމަށެވެ. ގަވައިދުގައި އިތުރަށް ބަޔާންކޮށްފައިވާ ގޮތުގައި މޫދާއި ފަތާ ފެންގަނޑުގައި ހިންގޭ ހަރަކާތްތަކުގައި އެއް ގްރޫޕެއްގައި ނުވަތަ އެއް ޓީމެއްގެ ގޮތުގައި އެންމެ ގިނަވެގެން ބައިވެރިކުރެވޭނީ 30 ކުދިންނެވެ. އަދި ކުދިން ހަރަކާތްތެރިވާން ވާނީ ގަވައިދުގައި ވާ ގޮތުގެ މަތިން ]ކޮންމެ ފަސް ކުއްޖަކަށް ބެލެނިވެރިއަކު ހުންނަ ގޮތަށް[ ގްރޫޕްތަކަށް ބަހާލައިގެން ކަމަށް ވެސް އެގަވައިދުގައިވެ އެވެ.
ހިރިޔާ ސްކޫލްގެ ހަތަރު ދަރިވަރުންނާއި ޕްރިންސިޕަލް ގެނބިގެން ނިޔާވި ދަތުރުގައި އެއްވެސް ބެލެނިވެރިއަކު ބައިވެރި ނުވާ ކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބުދުﷲ ނަޒީރު އިއްޔެ ވަނީ ވިދާޅުވި އެވެ. ނަމަވެސް އެ ދަތުރުގައި ބެލެނިވެރިން ބައިވެރިވެފައި ނުވަނީ ކީއްވެގެން ކަމެއް ނޭނގޭ ކަމަށް ވެސް ނަޒީރު ވިދާޅުވި އެވެ.
އެޑިއުކޭޝަން މިނިސްޓްރީގެ ގަވައިދުގެ އެއް ވަނަ ނަމްބަރުގައި ބުނެފައި ވަނީ އެގަވައިދުގައިވާ ކަންތައްތައް ފުރިހަމަ ނުކޮށް، ސްކޫލް ކުދިން ބައިވެރިކޮށްގެން މޫދުގައި އެއްވެސް ހަރަކާތެއް ހިންގުމަކީ މަނާ ކަމެއް ކަމަށެވެ. ސަލާމަތީ ގޮތުން އަޅަން ޖެހޭ ވަރަށް ގިނަ ފިޔަވަޅުތަކެއް އެގަވައިދުގައި ވަނީ ވަރަށް ތަފްސީލުކޮށް ބަޔާންކޮށްފަ އެވެ.
އެފަދަ ހަރަކާތްތައް ހިންގާ އިރު ސަލާމަތީ ގޮތުން އަޅަން ޖެހޭ ފިޔަވަޅުތަކެއް ވެސް އެ ގަވައިދުގައި ކަނޑައަޅާފައިވެ އެވެ. އެގޮތުން ހަރަކާތް ހިންގަމުންދާ ވަގުތު އެހަރަކާތް ހިންގުމާ ހަވާލުވެ ހުންނަ މީހަކު ކޮންމެ ވަގުތެއްގައި ވެސް ކަމާ ބެހޭ ފަރާތްތަކާ ގުޅޭނެ އިންތިޒާމް ހަމަޖެހިފައި އޮންނަން ޖެހޭނެ ކަމަށް އެގަވައިދުގައިވެ އެވެ.
އަދި ހަރަކާތުގައި ބައިވެރިވާ ފަތަން ނުދަންނަ ކޮންމެ ކުއްޖަކަށް ލައިފް ޖެކެޓް ނުވަތަ ކުއްޖާ ފެންމަތީގައި އޮތުމަށް އެހީވެދޭ ވަސީލަތެއް ހަމަޖައްސާފައި އޮތުމާއި ހަރަކާތް ހިނގަމުންދާ ތަނުގައި ލައިފް ގާޑުން ބައިތިއްބަން ޖެހޭނެ ކަމަށް ވެސް އެގަވައިދުގައިވެ އެވެ. އަދި ފަސްޓް އެއިޑް ކިޓްގައި ހުންނަން ޖެހޭ ތަކެތި ފުރިހަމަ ކުރުމަށް ފަހު ފަސޭހައިން ބޭނުން ކުރެވޭނެ ތަނެއްގައި ހުންނަން ޖެހޭނެ ކަމަށާއި ކުއްލި ހާލަތެއްގައި ފަސްޓް އެއިޑް ދެވޭ ފެންވަރުގެ ތަމްރީން ލިބިފައިވާ ހެލްތު ވޯކަރުން، ނަރުހުން ނުވަތަ ޑޮކްޓަރުން، އެއިން ފަރާތެއްގެ ހިދުމަތް ބޭނުން ވެއްޖެ ހިނދެއްގައި އެފަދަ އިންތިޒާމް ހަމަޖައްސާފައި ހުންނަން ވާނެ ކަމަށް ވެސް އެގަވައިދުގައިވެ އެވެ.
ހިރިޔާ ސްކޫލްގެ 32 ދަރިވަރުންނާއި ޓީޗަރުންތަކެއް ހުކުރު ދުވަހު ހުރާގެ ކޭމްޕަށް ގޮސް އުޅުމުގެ ތެރޭ ހަތަރު ދަރިވަރުންނާއި ޕްރިންސިޕަލް އަލީ ނާޒިމް ވަނީ މޫދަށް ގެނބިގެން މަރުވެފަ އެވެ. ހިރިޔާ ދަރިވަރުން ހުރައަށް ދިޔައީ ފިޝަރީޒް ސައިންސް ޕްރޮޖެކްޓެއް ފުރިހަމަ ކުރުމަށެވެ.
date_range
ހޯމަ 30 ޑިސެމްބަރ 2024