ހިތާމަވެރި ހުރާ ދަތުރު:
އެފަދަ އިތުރު ހާދިސާއެއް މެދުވެރިވިޔަ ނުދިނުމަށްޓަކައި ރައްކާތެރިކަމުގެ ފިޔަވަޅު އެޅުމަށް އެޗްއާރުސީއެމުން ގޮވާލައިފި

ކ. ހުރައަށް ދަތުރުގޮސް އުޅެނިކޮށް، ހިރިޔާ ސްކޫލްގެ ހަތަރު ދަރިވަރުންނާއި އެ ސްކޫލްގެ ޕްރިންސިޕަލް މަރުވި ހިތާމަވެރި ހާދިސާ ފަދަ އިތުރު ހާދިސާއެއް މެދުވެރިވިޔަ ނުދިނުމަށްޓަކައި އަޅަން ޖެހޭ ރައްކާތެރިކަމުގެ ފިޔަވަޅުތައް އެޅުމަށް ކަމާ ގުޅޭ ހުރިހާ ފަރާތްތަކަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ގޮވާލައިފި އެވެ.

އެ ހާދިސާގައި މަރުވި މަރުހޫމުންގެ އާއިލާތަކަށް ތައުޒިޔާ ކިޔުމުގެ ގޮތުން އެކޮމިޝަނުން މިއަދު ނެރެފައިވާ ތައުޒިޔާގެ މެސެޖްގައި ބުނެފައި ވަނީ ހިރިޔާ ސްކޫލްގެ ދަރިވަރުންތަކެއް ހުރައަށް ދިޔަ ފިޝަރީޒް ސައިންސްގެ ތަޖުރިބާ ދަތުރުގައި ހިނގައިދިޔަ ހިތާމަވެރި ހާދިސާއަކީ އެ ކޮމިޝަނަށް ކުއްލި ހައިރާންކަމާއި ފުން ހިތާމައެއް އިހްސާސްކުރުވި ހާދިޝާ އެއް ކަމަށެވެ. އަދި އެ ހާދިޝާގައި ނިޔާވި އެހަތަރު ދަރިވަރުންނަށާއި އެސްކޫލްގެ ޕްރިންސިޕަލް އަށް ހެޔޮ ރަހްމަތް ލެއްވުމަށް އެދި ދުއާ ކުރާ ކަމަށާއި އެ މަރުހޫމުންގެ އާއިލާތަކަށާއި ތިމާގެ މީހުންނަށާއި ރަހުމަތްތެރިންނަށް އިހްލާސްތެރިކަމާ އެކު ތައުޒިޔާ ކިޔާ ކަމަށް ވެސް އެމެސެޖްގައިވެ އެވެ.

ހުރާގައި ހިނގައިދިޔަ ފަދަ ހިތާމަވެރި ހާދިޝާތައް އިތުރަށް ކުރިމަތިވިޔަ ނުދިނުމަށްޓަކައި އެފަދަ ހާލަތްތަކުގައި ސަލާމަތީ ކަންކަމާއި ކުއްލި ހާލަތްތަކުގައި އަމަލް ކުރުމުގެ އިޖުރާތު ހަރުދަނާ ކުރުމަށް އެޗްއާރުސީއެމުން އެދިފައިވެ އެވެ.

ހުރާ ދަތުރުގައި މޫދަށް ގެނބިގެން މަރުވީ ހިރިޔާ ސްކޫލްގެ ޕްރިންސިޕަލް އަލީ ނާޒިމްގެ އިތުރުން އެސްކޫލް ގްރޭޑް 9 އެފްގެ ހަތަރު ދަރިވަރުން ކަމުގައިވާ މަރިޔަމް ނާޒް، ހއ.ހޯރަފުށީ ސުވާސާގެ (ގ.އޮއިވާލި) އާއި މަރިޔަމް ޝައިހާ، މ.މޮއިޝާ އާއި ނަޝްއަތު ސައީދު، ގއ. ދެއްވަދޫ މީނާޒް އާއި އައިޝަތު ޝާނިހާ، ރ.ރަސްމާދޫ ހަނދުވަރީ ވިލާ (މ.ފެއަރީ ވިލާ) އެވެ.

ހަބަރާ ގުޅޭ ވީޑިއޯ

http://www.youtube.com/watch?v=ODPluM4VLuI&feature=player_profilepage