ފިތުރު އީދުގެ އުފާ ފާޅުކުރަމުންދާއިރު، ދުނިޔޭގެ އެކި ކަންކޮޅުތަކުގައި ހިޔާވަހިކަމެއް ނުލިބި، ބަނޑުހައިހޫނުކަން ތަހައްމަލުކުރަމުން ގެންދާ ނިކަމެތި މުސްލިމުންގެ ހިތްދަތި ހާލާމެދު ހަމްދަރުދީވެ، އެހާލުން ނަޖާކޮށްދެއްވުން އެދި މާތް ﷲގެ ޙަޟްރަތުގައި އިބްތިހާލުވެ، ދުއާ ދެންނެވުމަށް ރައީސުލްޖުމްހޫރިއްޔާ ދިވެހި ރައްޔިތުންނަށް ގޮވާލައްވައިފިއެވެ.
ރައީސް މިފަދައިން ގޮވާލެއްވީ ބަރަކާތްތެރި ފިތުރު އީދުގެ މުނާސަބަތުގައި ފޮނުއްވި ޚިތާބުގައެވެ.
ރައީސް ވިދާޅުވީ އީދު ދުވަހު، މުސްލިމުން އެކަކު އަނެކަކާ ބައްދަލުވެ ހެޔޮއެދުމުގެ ޝުޢޫރުތައް ފާޅުކުރުމަކީ، އިސްލާމީ ރިވެތި އަހުލާގުގެ މަތިވެރި ނަމޫނާއެއް ކަމަށާއި، މިފަދަ އުފާވެރި ދުވަހެއްގައި އުފާފާޅުކުރަމުންދާއިރު އިސްލާމީ ރިވެތި ހަމަތަކާއި އުސޫލުތަކަށް ތަބާވެ އެކަންކަމަށް މުސްލިމުން އަބަދުވެސް ރައްކާތެރިވާންޖެހޭނެ ކަމަށެވެ.
ރައީސް ވަނީ ދިވެހި ރައްޔިތުންނަށާއި މުސްލިމު ގައުމުތަކުގެ ވެރިންނަށް އީދުގެ ތަހުނިޔާ ފޮނުއްވައިފައެވެ.