10:00
ކްލިންޓަން ގްލޯބަލް އިނީޝިއޭޓިވްގެ އަހަރީ ޖަލްސާގައި ބައިވެރިވެ ވަޑައިގަތުމަށް އެދިވަޑައިގެން އެމެރިކާގެ ކުރީގެ ރައީސް ބިލް ކްލިންޓަން، ރާއްޖޭގެ ކުރީގެ ރައީސުލްޖުމްހޫރިއްޔާ އަލްއުސްތާޒު މައުމޫނު އަބުދުލް ގައްޔޫމަށް ދަޢުވަތު އަރުވައިފި އެވެ.
އަންނަ ސެޕްޓެމްބަރު މަހުގެ 21 ން 23 އަށް ނިޔުޔޯކް ސިޓީގައި އޮންނަ މިޖަލްސާގައި ބައިވެރިވެ ވަޑައިގެންދެއްވުމަށް އެދިވަޑައިގެން ރައީސް ކްލިންޓަން ރައީސް މައުމޫނަށް ފޮނުއްވި ސިޓީފުޅުގައި، މިވޭތުވެދިޔަ ފަސް އަހަރުދުވަހުގެ ތެރޭގައި ސީ.ޖީ.އައި ގެ ފަރާތުން ހިތްވަރުލިބިގެން، 170 ޤައުމުގައި 220 މިލިއަން މީހުންނަށް ފައިދާކުރަނިވި 1،700 މަޝްރޫޢު ހިންގާފައިވާ ކަމަށް ބުނެފައިވާ ކަމުގައި ފޯމަރ ޕްރެޒިޑެންޓްގެ އޮފީހުން ބުނެ އެވެ.
ސީ.ޖީ.އައި ގެ އަހަރީ ޖަލްސާގައި ބޭރު ޤައުމުތަކުގެ ގާތްގަނޑަށް 1،200 މަންދޫބުން ބައިވެރިވާނެ ކަމަށާއި، މިއަހަރުގެ ޕްރޮގްރާމްގައި އިސްކަންދެއްވާނެ ދާއިރާތަކަކީ، އަންހެން ކުދިންނާއި އަންހެނުން ބާރުވެރި ކުރުވުމާއި، ވިޔަފާރީގެ އުސޫލުން މައްސަލަތަކުގެ ޙައްލުތައް ހޯދުން ވަރުގަދަ ކުރުމާއި، ޒަމާނީ ޓެކްނޮލޮޖީއަށް ވާސިލުވުން ހަރުދަނާ ކުރުމާއި، އިންސާނީ ހުނަރުވެރިކަމުގެ ފައިދާ އިތުރުކުރުން، މި ހަތަރު ދާއިރާ ކަމަށް ރައީސް ކްލިންޓަންގެ އެ ސިޓީގައިވެ އެވެ.
އެމަނިކުފާނުގެ ސިޓީފުޅު ނިންމަވައިލައްވަމުން، ރައީސް މައުމޫނުގެ ތާއީދާއެކު މިއަހަރުގެ އަހަރީ ޖަލްސާ، ސީ.ޖީ.އައި ގެ އެންމެ ކާމިޔާބު ޖަލްސާ އަށް ވެގެންދާނެ ކަމަށް ޔަޤީންކުރައްވާ ކަމަށާއި، އެޖަލްސާގައި ރައީސް މައުމޫން ބައިވެރިވެވަޑައިގެން ދެއްވާނެ ކަމުގައި އުންމީދު ކުރައްވާ ކަމަށް ވިދާޅުވެފައިވާ ކަމަށް ވެސް ފޯމަރ ޕްރެޒިޑެންޓްގެ އޮފީހުން ބުނެ އެވެ.