އާސެނަލްގެ ކޯޗުކަމުގެ މަގާމުގައި 22 އަހަރު ހޭދަކުރުމަށްފަހު، އާސެން ވެންގާ އެޓީމު ދޫކޮށްލުމުން ހުސްވެފައިވާ ކޯޗުކަމުގެ މަގާމާ ހަވާލުވުމަށް ކުރިން އާސެނަލަށް ކުޅުނު މިޑްފީލްޑަރު މިކޭލް އާޓެޓާ އެއްބަސްވެއްޖެ ކަމަށް މީޑިއާ ރިޕޯޓުތައް ބުނެފިއެވެ.
ގޯލް ޑޮޓް ކޮމްއިން އިން ބުނެފައިވަނީ އާޓެޓާއާއި އާސެނަލާ ދެމެދު އެއްބަސްވުމަކަށް އައިސްފައިވާ ކަމަށާއި، މި ހަފްތާ ތެރޭގައި ކޮންޓްރެކްޓްގައި ސޮއިކުރެވޭނެ ކަމަށެވެ. އާޓެޓާ މިވަގުތު ހުރީ މެންޗެސްޓާ ސިޓީގެ ކޯޗު، ޕެޕް ގާޑިއޯލާގެ އެސިސްޓެންޓް ކޯޗުގެ މަގާމުގައެވެ. ސިޓީން މި ސީޒަންގައި ރެކޯޑުތަކަކާއެކު ލީގު ކާމިޔާބުކުރުމުގެ ފަހަތުގައި އާޓެޓާގެ ހިއްސާވެސް ބޮޑެވެ.
އާސެނަލްގެ ކޯޗުގެ މަގާމަށް އަންނާނެ ކަމަށް ބެލެވޭ ކޯޗުންގެ ލިސްޓްގައި ބާސެލޯނާއާއެކު ކާމިޔާބީތަކެއް ހޯދި ލުއިސް އެންރިކޭގެ އިތުރުން ޔުވެންޓަސްއަށް ކޯޗު ކޮށްދެމުން އަންނަ މަސިމިލިއާނޯ އަލެގްރީވެސް ހިމެނުނެވެ. އެހެން ނަމަވެސް އާސެނަލްގެ ސީއީއޯ އީވަން ގަޒީޑީސް ފާހަގަކުރެވެނީ ޒުވާން ކޯޗުންނަށް ލޯބިކުރާ މީހެއްގެ ގޮތުގައެވެ. އެގޮތުން އޭނާ ކުރިންވެސް ބުނެފައިވަނީ ބޭނުން ވަނީ ޒަމާނީ ފުޓުބޯޅަ ޓީމެއް ބިނާކުރެވޭނެ ޒުވާން ކޯޗެއް ކަމަށެވެ.
އާސެނަލަށް 100 އަށްވުރެ ގިނަ މެޗު ކުޅެދިން އާޓެޓާއަކީ އެޓީމުގެ ކެޕްޓަން ބޭއްޑުވެސް އެޅި ނުފޫޒުގަދަ ކުޅުންތެރިއެކެވެ. އާސެނަލްގެ ކޯޗުކަމުގެ މަގާމަށް އާޓެޓާ ހަވާލުވެއްޖެ ނަމަ، ކުރިން ޓީމުގެ ކޯޗިން ސްޓާފުންގެ ތެރޭގައި ތިބި ގިނަ ކޯޗުންތަކެއް ވަކިވާނެ ކަމަށް ބެލެވެއެވެ. އެގޮތުން އާޓެޓާގެ ވިސްނުން ހުރީ ޒުވާން ކޯޗިން ޓީމެއް ނެރުމަށް ކަމަށްވެސް މީޑިއާ ރިޕޯޓުތައް ބުނެއެވެ.
އާސެނަލްގެ ކޯޗިން ޓީމަށް އެޓީމަށް ކުޅެމުން އަންނަ ސަންތި ކަޒޯލާއާއި ކުރިން ޓީމުގެ ގޯލް ބެލެހެއްޓި ޖޭން ލެހްމަންވެސް ގެންނަން އާޓެޓާ މަސައްކަތް ކުރާކަމަށް ގޯލް ޑޮޓް ކޮމްއިން ބުނެފައިވެއެވެ.