މައުމޫން ޒައީމުކަމުން އިސްތިއުފާދެއްވައި ޑީއާރުޕީން ވަކިވެވަޑައިގެންފި

ކުރީގެ ރައީސް އަދި ޑީއާރްޕީގެ ޒައީމް މައުމޫން އަބްދުލްގައްޔޫމު ޑީއާރުޕީގެ ޒައީމުކަމުން އިސްތިއުފާ ދެއްވައި ޕާޓީން ވަކިވެވަޑައިގެންފި އެވެ.

އަދި މައުމޫނާ އެކު ޑީއާރްޕީގެ އިސްބޭފުޅުންތަކެއް ޕާޓީން މިއަދު ވަނީ ވަކިވެވަޑައިގެންފަ އެވެ.

ޒެޑް ފެކްޝަނުގެ އިސް އޮފިޝަލަކު ސަން އަށް ކަށަވަރުކޮށްދެއްވި ގޮތުގައި ޒެޑް ފެކްޝަނުގައި ހަރަކާތްތެރިވެވަޑައިގަންނަވައި 227 ބޭފުޅުން ވަނީ ޒައީމް މައުމޫން އާއެކު މިއަދު އިސްތިއުފާދެއްވައިފަ އެވެ. އެބޭފުޅުންގެ ތެރޭގައި ޒައީމް މައުމޫންގެ އާޕާޓީ އުފެއްދެވުމުގައި އިސްކޮށް އުޅުއްވާ ޑީއާރްޕީގެ ޕާލިމެންޓްރީ ގްރޫޕާއި ކައުންސިލް މެމްބަރުން ވެސް ހިމެނެ އެވެ.

އޭގެ ތެރެއިން ބައެއް ބޭފުޅުންގެ އިސްތިއުފާގެ ސިޓީ ލިބިފައިވާކަން ޑީއާރްޕީގެ މީޑިއާ އޮފިޝަލް ކަށަވަރުކޮށްދެއްވި އެވެ. ނަމަވެސް އޭގެ ތެރޭގައި ޒައީމްގެ ސިޓީ ނެތް ކަމަށް ވެސް އޭނާ ވިދާޅުވި އެވެ.

ސަން އަށް އެނގިފައިވާ ގޮތުގައި ޒައީމް މައުމޫން ވަނީ އިސްތިއުފާގެ ސިޓީގައި މިހާރު ސޮއިކުރައްވައިފަ އެވެ. އެ ސިޓީ މިހާރު ވަނީ ޑީއާރްޕީގެ އިދާރާއަށް ފޮނުއްވައިފަ އެވެ. ކުޑައިރުކޮޅެއްފަހުން ޒައީމްގެ ފަރާތުން މީޑިއާ އަށް ބަޔާނެއް ނެރުއްވާނެ ކަމަށްވެސް ވެއެވެ.

ޑީއާރްޕީ އުފެއްދެވުމަށްފަހު އެޕާޓީގެ ފުރަތަމަ ލީޑަރެއްގެ ގޮތުގައި ވެސް ހުންނެވި ކުރީގެ ރައީސް މައުމޫން އެޕާޓީން އިސްތިއުފާދެއްވުމަށް ފަހު މިހާރު މަސައްކަތްކުރައްވަނީ އާ ޕާޓީއެއް އުފެއްދެވުމަށެވެ.