ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމް އިސްވެ ހުންނަވައިގެން އުފެއްދެވުމަށް މަސައްކަތް ކުރައްވާ އާ ސިޔާސީ ޕާޓީގެ ރިޔާސީ ޕްރައިމަރީގައި ވާދަކުރެއްވުމުގެ ޝައުގުވެރިކަން ހުރިކަމަށް، ޑީއާރުޕީ ޒެޑްފެކްޝަންގެ އިސް އެކްޓިވިސްޓް އުމަރު ނަސީރު މިއަދު ވިދާޅުވެއްޖެ އެވެ.
ނަމަވެސް ސިންގަޕޫރުގައި ހުންނަވައިގެން ސަން އަށް ފޯނުން ދެއްވި އިންޓަވިއުއެއްގައި އުމަރު ވިދާޅުވީ އެކަން ފައިނަލް ކުރައްވާނީ މިހާރު މަހަކު 10 ދުވަހު ސިންގަޕޫރުގައި ހުންނަވައިގެން އޭނާ ހައްދަވަމުން ގެންދަވާ މާސްޓާސް ޕްރޮގްރާމް ނިމުން ކަމަށެވެ.
މިދިޔަ މަހު އުމަރު ފެއްޓެވި، ޕާޓް ޓައިމްކޮށް، މާސްޓާސް އިން ބިޒިނަސް އެޑްމިނިސްޓްރޭޝަން ހެއްދެވުމުގެ ޕްރޮގްރާމް ނިމޭނީ އަހަރު ދުވަހުން ކަމަށް އޭނާ ވިދާޅުވި އެވެ.
އުމަރު ވިދާޅުވީ ޑީއާރުޕީގައި ވެސް އޭނާ އެންމެ ބޮޑަށް ވަކާލާތު ކުރެއްވީ ވާދަވެރި ޕްރައިމަރީއަކުން ރިޔާސީ ކެންޑިޑޭޓަކު ކަނޑައެޅުން ކަމަށާއި ވާދަކުރުމަކާ ނުލައި "އެކަން ފެން"ވުމުގެ ފުރުސަތު ނުދެއްވާނެ ކަމަށެވެ.
އާ ޕާޓީގެ ޕްރައިމަރީއެއް އޮންނާނީ އިންތިހާބު ބޭއްވުމަށް ހަ މަސް ދުވަހަށް ކައިރިވުމުން ކަމަށް ލަފާ ކުރެވޭ ކަމަށާއި އެއިރަށް އޭނާ ހައްދަވާ މާސްޓާސް ޕްރޮގްރާމް ވެސް ނިމޭނެ ކަމަށް އުންމީދު ކުރައްވާ ކަމަށް ވެސް އުމަރު ވިދާޅުވި އެވެ.
ޑީއާރުޕީގެ ލީޑަރު އަހުމަދު ތަސްމީނަކީ ޕާޓީއެއް ހިންގޭ ވަރުގެ ގާބިލް ބޭފުޅެއް ނޫން ކަމަށް ވިދާޅުވެ، އެ ޕާޓީ އަނބުރާ ޒެޑް ފެކްޝަނަށް ހޯއްދެވުމަށް އެންމެ ބޮޑަށް ވަކާލާތު ކުރެއްވީ އުމަރެވެ. އަދި އޭނާ ވަނީ ފުރަތަމަ އާ ޕާޓީއެއް ހެދުމަށް ވެސް އިންކާރު ކުރައްވައިފަ އެވެ. ނަމަވެސް އުމަރު މިއަދު ވިދާޅުވީ އޭނާގެ ހިޔާލުތަފާތުވި މައްސަލަތައް ވާހަކަ ދައްކައިގެން ހައްލު ކުރެވިފައިވާ ކަމަށާއި އާ ޕާޓީ ހެދުމަށް އޭނާ ވެސް މިހާރު ފުރިހަމަ އަށް ތާއީދު ކުރައްވާ ކަމަށެވެ.
އޭނާ ވިދާޅުވީ އާ ޕާޓީއެއް ހެދުމަށް ފުރަތަމަ އިއުތިރާޒު ކުރެއްވީ މައިގަނޑު ގޮތެއްގައި ޕާޓީ ހިންގުމަށް ބޭނުންވާ ފައިސާ ހޯދުމާ ބެހޭ ގޮތުން ކަމަށެވެ. ނަމަވެސް އެކަމަށް ހައްލުތަކެއް ހޯދިފައިވާ ކަމަށް އޭނާ ވިދާޅުވި އެވެ.
ޒައީމް މައުމޫން ހައްދަވާ އާ ޕާޓީގެ ރިޔާސީ ޕްރައިމަރީގައި ވާދަކުރެއްވުމުގެ ޝައުގުވެރިކަން ޕީއޭގެ ލީޑަރު އަބްދުﷲ ޔާމީން އަބްދުލްގައްޔޫމް ވެސް ވަނީ ފާޅުކުރައްވައިފަ އެވެ. ޔާމީން ވަކާލާތު ކުރައްވަމުން އަންނަނީ ރިޔާސީ ކެންޑިޑޭޓަކު ކަނޑައަޅަން ވާނީ ޕްރައިމަރީއަކުން ކަމަށެވެ.
date_range
އާދިއްތަ 22 ޑިސެމްބަރ 2024